Егит семьялэн шунытэз

Оксана али дыре пичи пиналзэ уте. Дима полициын ужа, со-шофёр. Оксана монэ пальпотыса пумитаз, верась­конмы но капчи пӧрмиз. Дима корказы дырын-дырын гинэ пыраз, юрт котыраз, шӧдске, пиосмуртлэн ужъёсыз трос. Оксана но монэным верась­кыкуз пӧртэм ужъёсты лэсь­тыны вутскиз. Пичи нылзэ сюдӥз, али гинэ изьыса сул­тэм пиеныз вераськиз-ке­нешиз. Со куспын семьяез сярысь но мадьыны вутскиз.

- Азьвыл ми Янаулын улӥмы, собере отысь корка­мес вузаса гуртамы бертӥмы. Дима Каймашабаш гуртын вордӥськемын но будэмын. Мон ачим Шудекысь, выль юртмес но татчы ӝутыны мылкыд каримы. Вордӥськем гуртэ туж дуно но матын потэ. Ӝутӥськон ужъёсмес асьме люкам коньдонэн но кужымен радъямы. Димае туж тыршись, мон со мыш­кын из борддор сьӧрын кадь улӥсько. Киосыз котькыӵе ужлы мыно, ваньзэ ачиз лэсьтыны тырше. Дима до­рын туж шер луэ, ялан ужын. Атаймы дорын дыръя ми понна со бадӟым праздник, шумпотӥськомы. Ӝутӥськыку Дималэн но аслам анайёсмы но атаймы юрттӥзы. Соостэк ми таӵе бадӟым ужез кутскы­ны ӧм дӥсьтысалмы, дыр. Ту­ганъёсмы но юрттыны котьку дась, матысь адямиос валаны быгатыку ужъёсты капчиен радъяны луэ. Гуртамы ка­лык ужась, тыршись, соин ик егитъёс но бадӟымъёслэсь адӟем карыса уло. Гурт по­селениысь кивалтэт но сюл­мысь ужась калыкез понна дурбасьтэ, юрттэ.

Оксаналэн кылъёсаз ас гуртэныз, семьяеныз, анай-атаеныз, вордӥськем палъё­сыныз данъяськон мылкыд шӧдӥське. Егитысен улонысь дунлыкъёсты валамез син­маськымон. Дима но вӧзамы ог дырлы пуксиз. Пичи нылзэ вешамезъя тодмо: атаймурт туж яратэ семьязэ. Костя пизы но анай-атайзэ школаын шумпоттэ, спортэн эшъяське. Покчи классын дышетскись пияшлэн трос грамотаосыз, куасэн бызьылыса басьтэм медальёсыз вань ини. Выль юрт котыразы лэсьтоно ужзы трос ке но ай, туннэ соос юртазы шумпотыса уло. Котькытын љикыт, кузё ки­ослэн пытьызы шӧдӥське. Дима тросгес кылзӥськыса пукиз ке но, шуныт, лякыт пальпотонэзъя, нылпиоссэ мусоямезъя со зэмос са­бырлы удмурт воргорон. Ма, Оксаналэн кузпалыз шоры лякыт учкыса верамезъя но валано: семьяязы татулык но ог-огдэ валан кузёяське. Нош соку котькыӵе ужез вормоно, лул пушкын но яратонлэн зэ­мос италмас сяськаез будэ.

Выль юртысь потыса, Ис­ламгареевъёсын келясь­кыку, мынам сюлэмам но италмас сяська пушйиз кадь. Сайкыт, чебер но шуныт луиз. Егит удмурт семьялэн шу­нытэныз тырмыса сюресме азьланьтӥ.

Ирина САМИГУЛОВА.

Янаул ёрос.