icon_gotop
18+
autorisation
Войти | Регистрация
Время в Татышле
12:43
Пятница, 29 Марта
Рекламный баннер 990x90px top

Ульчаосын нылпи куараос мед чузъяськозы

08:52 24.07.2014

Арлян Сандугач, Бара­бановка, Рабак, Выль Кирга, Норкан гуртъёсын ӵош Сан­дугач гурт поселение пыре. Татын огъя 30-лэсь тросгес улон юртъёс лыдъясько. Нош азьвыл со, татын улӥсьёслэн верамзыя, шӧдскымон трос­гес вылэм. 1921-тӥ арын Ар­лянэ сельсовет интыяське­мын вылэм. Соин Губайдул­ла Хайруллин кивалтэм. Та вакытэ гуртын улон пӧзем. Пӧртэм аръёсы татын сельпо, библиотека, магазин, клуб, связья ёзэт, ыж, ош, курег вордон фермаос луиллям. Нош туннэ Арлянысь егитъёс соос сярысь оло уг но тодо ни, дыр. Табере татын одӥг уж инты но ӧвӧл ни уго. Соосты Сандугаче выжтӥзы. Соос пӧлысь куд-огезлэн юртъёс­сы гинэ огназы мӧзмыса сыло на. Клублэн пулэсь ӝутэм юр­тэз, кылсярысь, гурт калыкез туннэ но шумпотыса котыраз люкасал, нош кирпичлэсь пуктэм магазин басьясь­кисьёсты пӧртэм вузъёсын тырмытысал. Но соос туала улонлэсь куронъёссэ вор­миллямтэ. Табере арлянъёс шутэтскыны-концерт учкы­ны Сандугачысь, Янаулысь культура юртъёсы ветло. Си­ён-юон, пӧртэм вузъёс бась­тон ласянь но шуг-секытъёс ӧвӧл кадь. Адямиос городэ вуылыкузы, буш сумкаосын бертыны уг тыршо. Озьы ке но гуртын магазин мултэс ӧй луысал. Зэм, сиён-юонэн, пӧртэм арбериосын вуз карисьёс татчы ӵемысь пырало. Ми вуылон нуналэ но соос «Нива» машинаен вуэмын вал. Солэн котыраз калык лачак кисьтӥськиз. Автолав­ка быдэс гуртэз котыртӥз. Бадӟым ӧвӧл уга со, кык пась­кытэсь «Центральная» но «Родниковая» урамъёслэсь гинэ сылэ.

«Родниковая» ульча жи­льыр бызись ошмес доры вут­тэ. Татчы, гурт калык сяна, Янаулын, Истякын улӥсьёс но, пе, вулы ветло. Пере­сьёс юнме уг верало, вылды, лымшор палась виясь ву ческытгес но ӟечгес луэ шуыса. Азьло татысь вуэн Арлянысь котькуд семья кутӥськем. Нош берло тросэз колодча гудӥллям, юртазы ву пыртӥллям. Собере ош­меслэн куноосыз ӧжытлы кулэсмиллям. Но озьы ке но солэн мӧзмыны дырыз ӧвӧл, нуналлы быдэ сямен татын ведра куараос шалтыр вазё. Ошмеслэсь котырзэ тазаты­ны но гурт калык ӵемысь ву­ылэ. Туннэ соос огез пумысен гинэ жаляло, ошмес дурысь одӥгзэ писпуэз ӵашйиз. Со­лэсь усем «мугорзэ» но тӥни октоно на.

Арлянысь ошмес дуре ву­ытозь, быдэс гуртэз пыр пото­но. Соин, вылды, отчы вамыш­тон тодмотэм адямилы бы­дэс экскурси выллем пӧрме. Тани «Родниковая» ульчалэн бур палаз кирпичлэсь ӝутэм бадӟым юрт сылэ. Татысь мукет сыӵезэ уд пумита. «Центральная» ульчаысь гинэ со­осты адӟод на. Ар­лянын уго тросэз коркаос пулэсь ӝутэмын.Отчы чагырэстӥськон но кыскемын. «Родниковая» ульчаысь кирпич­лэсь юртын Витя пиезлэн семьяе­ныз Шамсия Юсу­пова улэ. «Татчы мон жугиськон дыръя лыктӥ, - тодаз вае Шамсия песянай.- Гуртмы­лэн тусыз соку воксё мукет вал. Нош табере со чебер но чылкыт луэмын». Шамсия песянайлы туннэ 89 арес тырмемын. Гуртын со арлыдо песянайёс пӧлысь одӥгеныз лыдъяське. Шамсия Юсупова Арлянэ Пермь шаерысь Куеда ёросысь Позырес гуртысь ву­эмын. Быдӟым Атыкай ожысь ветеранэн, кузпалыныз Галим Шараевен соос вить нылпи будэтӥзы. Со вакытэ ик анай­мурт колхозазы пӧртэм ужъ­ёсты быдэсъяны вутскылӥз. Колхоззылэн кивалтэтэз выль кенэз но мурт карымтэ, уж борды ӝог «кыткем». Соин Шамсия Юсупова гуртын ассэ дораз кадь шӧдэм. Быдӟым Атыкай ож но со бере аръёсы татысь колхозын котькуд ужась килы шумпотӥллям. Пудо утьыны, бусыосты гы­рыны-кизьыны но мукет чы­ры-пыры ужъёсты быдэсъяны трос кужым кулэ луэм уга. Озьы котькуд нунал арлыдо­ез но, егитэз но гараже яке фермае, школае яке бусые ва­мыштылэм. Берло гинэ татын, котькытын сямен ик, ужась киос мултэс луиллям. Озьы Арлянысь тросэз пиосмур­тъёс Янаулэ, Нефтекамске, Свердловск улосвылэ, Ижев­ске ужаны интыясько. Нош юрт котырзы кузпалъёссы, атай-атайзы вылын возиське. Вераны кулэ, соос но гуртазы тэк уг пуко. Татысь калык тросэн пудо вордэ, 5-6 семья муш уте. Поттэм сиён-юонзэс вузаны Янаулэ ветлӥсьёс но вань. Городэ вуылон пумысен татын шугъяськонэз ӧвӧл уга, котькуд юртын сямен капчи машиназы вань. Зэм, тол куа­зен со ласянь ӧжыт секытгес йӧтэ. Татысь ульчаос куддыр лымылэсь, пе, уг тазатӥсько. Нош гужем куазен соос ӟеч утисько. Ульчаосысь сюресъ­ёс гравиен шобыртэмын. Отын но калыклэн гуртэз шоры кузё синъёсын учкемез адӟиськиз.

Пиосмуртъёслэн палэ­нын ужамзылэн пытьыез шӧдӥськымон: гурт пересь­ме. Егитъёс семьяосынызы городэ улыны интыяськыны тыршо. Туннэ, кылсярысь, Сандугач шор ёзо школае тямыс пиналъёс ветло. Ныл­пиосты дышетскон юртазы автобусэн нулло-ваё. Шко­лазэс йылпумъямзы бере соослэн но гуртэ улыны ин­тыяськонзылы оскон бадӟым ӧвӧл. «Татын уж ӧвӧл. Мон но Нефтекамскын улӥсько. Гуртэ шутэтскон нуналъёсы гинэ бертӥ», - вераз Арля­нын будэм одӥгез егит пи. Озьы ке но «Центральная» ульчаысь куинь муспотон пи­налъёсты адӟыса, мӧзмытэсь малпанъёс тӧлӟизы. Тӥни ук Арлянлэн пичиесь пушъетъё­сыз! Родион, Настя но Сабина шумпотыса ульчаязы шудо, велосипедэн ворттыло. Нош берло соос ӟечыранэ пукси­зы Нылпиос гуртазы пырисез нуналлы быдэ озьы пумита­ло, вылды. Соослэн жингрес серекъям куаразы кыдёке кылӥське. Нош палэнынгес ульчалэн кыкнапалаз ик буш коркаос огназы сыло. Укно синъёссы али ке но кузёоссэс витё.

Ольга НИГАМАТУЛЛИНА.

Янаул ёрос.

7096

Оставить сообщение: