icon_gotop
18+
autorisation
Войти | Регистрация
Время в Татышле
14:41
Пятница, 29 Марта
Рекламный баннер 990x90px top

Нылпи дуннеез быръем эшъёс

08:38 17.07.2014

- Мыным нылпи садын кема ужаны ӧз кылды, дышетӥсьлэсь ужзэ ӵектӥзы: Варяшбаш школаын история урокъёсты нуи. 1995-тӥ ары­сен Вот. Ошья школаын покчи классъёсты дышетӥ. 2010-тӥ арын школа ворсаськемен сэ­рен, берен Варяшбаш школае ветлыса дышетӥ. Кык арскын таиз школа но ворсаськиз: дышетоно нылпиосме Выль Артаул школае выжтӥзы. Мон но соослэсь ӧй кыльы. Пиналъёсты 5-тӥ классэ келям бере, 2013-тӥ арын коньывуон толэзе уж ӧре нырысетӥ вамышъёсме лэсь­тэм интыям – «Василёке» - вуи. Мыным бадӟымъёслэсь группазэс ӵектӥзы, - уж сюре­сэныз тодматыса шуэ Алия Минкаировна.

Кема аръёс ӵоже школа­ын ужам дышетӥсьлы нылпи садысь пичильтыкъёсын ужан нырысь секыт ке но йӧтэм, кышномурт соосын огкыл шедьтыны быгатэм. Ӝуась нылпи синъёс бор­дысь шӧдыны луэ, макем соос кыкетӥ анайзы борды биниськемын. Лякыт сямо, пальпотӥсь ымныро кышно­муртлэсь верамзэ пиналъ­ёс сак кылзо, куронъёссэ ӝегатскытэк быдэсто. Дания Алексеевналэн вань уж сюресэз «Василёк» нылпи садэн герӟаськемын. Татын со 26 арлэсь ятыр тырше ни. Бадӟым опыто воспитатель покчи группаысь пиналъёсын ужа.

- Пичиос тросэз вераськыны уг йӧндыро. Но мон котькудзылэсь бӧтьыртэмзэс валасько. Пичиосын котькуд нунал тунсыко ортче. Ачим но соос вӧзын пичильтыклы пӧрмисько, - пальпотыса вера Дания Алексеевна.

Ужез Д. Хабибуллиналы туж кельше. Нылпиосын ортчытэм аръёсыныз солэн шунытэсь тодэ ваёнъёсыз герӟаськемын. Пиналъёс, нылыз кышномуртлы бадӟым куректонзэ но вормыны юрттӥллям. Кузпалыз улонысь вазен кошкемен, со трос шуг-секытъёс пыр потоно луэм.

- Нылпи садэ лыктыса, кайгу вунэ вал. Вакытаз пичиос мыным улыны выль кужым сётӥзы, - вера воспитатель.

Дания Алексеевна спортэн но тунсыкъяське. Толалтэ куасэн ӵошатсконъёсы пыриське, уянэн тунсыкъяське. Кырӟаны, эктыны яратӥсь кышномурт гуртысьтызы самодеятельной ансамбле но пыриське.

Улон. Пӧртэм сямен со азинске: пумиськытэ но, люкиськытэ но. Азьвыл котьку ӵош луэм матысь эшъёс Алия Минкаировна но Дания Алексеевна выльысь пумиськизы. Соосты нош ик ӵошен быръем яратоно ужзы герӟа.

Миляуша БУЛАТОВА.

Янаул ёрос.

6136

Оставить сообщение: