Рустэм Хамитовлэн малпамезъя, чылкак соос калыклэсь шутэтсконзэ радъян, пӧртэм коллективъёслы, кибашлыослы, усточи пиналъёслы юрттэт возьматон бордын тыршо.
– Асьмелэн ужпуммы – лулчеберетмес ӝутон, солы яркыт тус пыртон. Та ласянь быдэстэм ужмес лулчеберет удысын тыршисьёс сяна, республикаысьтымы калык но мед шӧдоз. Лулчеберетлэн арез котькуд юртэ бадӟым концертэн, спектаклен, чылкытэсь ульчаосын мед пыроз. Чылкытлык но уго лулчеберетлэн люкетэныз лыдъяське, - вераз Р. З. Хамитов.
Рустэм Хамитов та удысысь ужпумъёс пумысен но вераськон ӝутӥз. Соос пӧлысь тужгес лэчытэз – культура юртъёслы коньдонэн юрттэт возьматон.
- Лулчеберетэз азинтонлы 2018-тӥ арозь 17,5 миллиард манет коньдон висъяны чакламын, - вераз Рустэм Закиевич. – Город но ёрос администрациос республикаысь Культурая министерствоен ӵош ӟеч ужазы. Россиысь Культурая министерствоен ялэм куать конкурсъёсы 400 заявка сётэмын вал. Со пӧлысь 135-езлы дурбасьтӥзы но 50 миллион манетлы матэ коньдон висъязы. Со «Сокровища музеев», «Электронный читальный зал» проектъёсты быдэстонлы, модельной библиотекаос кылдытонлы, гурт интыосысь клубъёсты но искусствоосъя школаосты юнматонлы кутэмын луоз. Рустэм Хамитовлэн верамезъя, гурт клубъёсты тупатон бордын туннэ котькуд ёросын ужъёс нуисько.Соосты быдэстыны огъя 106 миллион манет тыр утэм республика грантъёс но юртто.
Рустэм Хамитов тужгес бадӟым саклык висъяз культура юртъёсты ужасьёсын тырмытонлы.
- Тросаз пичи городъёсын но гуртъёсын лулчеберет калык пӧлын кырӟаны-эктыны яратӥсьёслэн кужмынызы возиське. Нош азьланяз та удысэ зэмос ӧнерчиосыз дасян сярысь сюлмаськоно. Асьмелэн дышетон юртъёсмы арлы быдэ 800 егит ӧнерчиосты потто. Но берло соос мукет удысъёсы выжо, - вераз Рустэм Хамитов. – Жаляса верано, берло аръёсы та удысын тыршисьёслэн уждунзы туж ӧжыт возиське. Кылем арын со 11,7 сюрс манетлы ӵошаз. Табере та лыдпусэз 16,7 сюрс манетлы вуттоно. Со республикаысь уждунлэн шор быдӟалаезлэн 65 процентэзлы ӵошалоз.
Семинар-совещанилэн пленарной заседаниез Салават Юлаевлэн вордскемез дырысен 260 ар тырмонлы сӥзем «Салауат йыйыны» фольклор праздникен тупаз. Та нуналэ кивалтӥсьёс отын сюлмысь шулдыръяськизы, историмылэсь лулчеберетмылэсь кужымзэ шӧдӥзы.
Дасяз Ольга
НИГАМАТУЛЛИНА.
Перепечатка материалов – с разрешения редакции. Мнения авторов и редакции могут не совпадать.
Все рекламируемые товары и услуги подлежат сертификации и лицензированию.За достоверность рекламы ответственность несёт рекламодатель.
E-mail: info@gazeta-oshmes.ru
Оставить сообщение: