icon_gotop
18+
autorisation
Войти | Регистрация
Время в Татышле
18:34
Пятница, 29 Марта
Рекламный баннер 990x90px top

Удмуртъёсты огазеяз «Элен»

08:31 03.07.2014

Куриськон кылъёс ко­тыре вӧлмизы

Куриськон, вашкала дыры­сен радъямын, тупатъямын ке но, вӧсе пырон вакытэ сюл­маськонъёс кужмояло: кызьы меда ортчоз, кыӵе куазь луоз, калык люкаськоз-а? Сыӵе мылкыд куриськисьёслэн но, вань юрттӥсь-пӧрасьёслэн сюлмазы биниське. Та ужрад­лы нимаз коньдон уг висъясь­кы, калыклэсь люкам коньдо­нэн ортчытӥське. Собере ини, ортчем бераз, ужмы њеч пӧрмиз шуыса, сюлмамы аспӧртэм шумпотон каръяське.

Танып шурлэн лымшор пала учкись яр бамаз, сю ареслэсь бадӟым кызьпуос но тыпыос пӧлы Быдӟым вӧсь ин­тыяськемын. Та инты вашкала дырысен Инмарлы оскись трос калыкъёсты люка. Элен вӧсе, алтауос сяна, Башкортоста­нысь Бурайысь, Касиярово­ысь, Мамыдыысь, Бикзянысь (Бурай ёрос), Вуж Варяшысь (Янаул ёрос), Бадӟым Кача­кысь, Качкин Турайысь (Кал­тасы ёрос), Выль Татышлыысь (Татышлы ёрос), Киргаысь, Вылысь Гондырысь, Бадӟым Гондырысь (Пермь шаерысь Куеда ёрос), Удмуртиысь, Свердловск но Киров улосъ­ёсысь, Марий Элысь но мукет интыосысь удмуртъёс вуизы. Тани туэ но удмурт дӥнез утись трос адямиос вуизы. Шумпотыса вераны луэ, Элен вӧсьлэн данэз будэмен, арысь аре отчы тросгес калык лык­тэ, пӧлазы пиналъёс но ӧжыт ӧвӧл. Озьыен, вашкала удмурт дӥнез кутӥсьёслэн лыдзы йылэ.

Быдӟым вӧсе 12 ыж вӧсязы. Ньыль куаос пудозэс асьсэ нимынызы сётӥзы. Дас кык пурты сӥлен, пӧртэм кеньы­рен ӝук дасямын вал. Вӧсез радъяны, сӥль-ӝук пӧзьтыны гурт калыкмы пӧртэм ла­сянь трос юрттэт возьматӥз. Вӧсе Алтауысь куриськись Валерий Габидуллин сяна, Бадӟым Качакысь курись­кись Михаил Камалетдинов, Киргаысь Фарит Садиев, Выль Татышлыысь Салим Ша­киров юрттӥськисьёсынызы вуизы. Соос гуртсы пон­на вӧсяськыны пудоос но вуттӥзы. Та нуналэ ӟугесь октонэз Александр Занул­линлы но Зинатулла Зиалт­диновлы оскизы.

…Тани вӧсе лыктэмъёс пӧлысь пичиез но, бадӟымез но пыдесъяськизы. Курись­кисьёс, ӝук кутыса, интыо­сазы султӥзы. «Осто, Инма­ре-Кылчинэ…» - люкаськем калыклэсь мылкыдзэ бугыр­тыса, возь тыр кылӥськиз соослэн куаразы. «Осто», - шыпыртӥз люкаськем калык.

Вӧсь кылъёс йылпумъ­яськем бере, ваньзы пыд вылазы султӥзы но шунды бергамъя интыязы куинь пол котырскизы. Собере ваньзы вӧсям ӝукез, ня­нез, сӥлез веръязы. Берло, вӧсяськемъёс кабыл мед луозы шуыса, нош ик курись­кизы.

«Элен» фестиваль

Элен вӧсь йылпумъясь­кем бере, калык паськыт возь вылэ дыртӥз. Пӧсь чаен, ческыт пыжиськемъёсын пумитазы татын куноосты. Та нуналэ соос шаермылэн пӧртэм сэрегъёсысьтыз ву­иллям. Та нуналэ вордскем гуртаз, кылсярысь, шумпо­тыса бертэм Свердловск улосвылысь «Эгес» огазе­яськонэн кивалтӥсь Мари­на Ягуткина. Вӧсь кылъёс, удмурт калык кырӟан-эктон гуръёс трос калыкез борда­зы кыскизы.

Кезьыт тӧл но, зор шапык но ӧз вормы соослэсь ӝутскем мылкыдзэс чигыны. Соин, вылды, фестивалез усьтыса Бурай ёрос администрациен кивалтӥсьлэн воштӥсез Р. З. Шафи­ков но мылкыдзэ ватыны ӧз вормы. «Шумпотӥсько тӥ понна, данъяськись­ко тӥледын», - шуиз со люкаськем ка­лыклы вазиськыса. Собере ӟечкылан кылъёсын вераськизы БР-ысь удмур­тъёслэн национально-культурной центрзылэн кенешезлэн ёзчиез Т. Н. Шайбакова, Ижевскысь камсьӧр удмур­тъёслэн огазеяськонэнызы кивалтӥсь Ф. А. Чибышева, Пермь шаерысь уд­мурт огазеяськонлэн кивалтӥсез С. И. Гадиятов но мукетъёс. Фестивале вуэм калыклы соос шулдыр мылкыд сӥзизы. Со сяна, Т. Н. Шайбакова ужра­дэз ортчытыны юрттэмзы понна ёрос администрациен кивалтӥсьлы Б. Ш. Нурисламовлы, солэн воштӥсезлы Р. З. Шафиковлы, Кузбай гурт поселениен кивалтӥсьлы В. Ш. Гарифуллиналы Тау карон гожтэтъёс сётӥз.

«Элен» фестивалез усьтӥзы ку­зёос. Алтауысь «Инвожо» калык ан­самбль «Выль корка пырон» йылолэз возьматӥз. Соосты учкыса, арлыдоос шумпотӥзы, вылды, выжыосмылэн сям-йылолъёссы уг вуно. Соосты егитъёс азинто. Нош бӧрысь сцена вылын «Сюан» гуръёссэс кисьтӥзы кыдёкысь куноос – Киров улосысь вуэм «Чипчирган» ансамбль. Шумпо­тыса вуииллям соос республикаысь­тымы удмурт калыкен тодматскыны, вӧсь ӝук веръяны. Та нуналэ Не­фтекамскысь «Выжы кум» ансамбль, Кушнаренко ёросысь Канлы гуртысь «Италмас», Татышлы ёросысь «Уӵы ныл», Пермь шаерысь Кирга гуртысь «Уӵы», Свердловск улосысь «Азвесь гур» ансамбльёс кырњанъёсын, эк­тонъёсын тодматӥзы. Отын калыклэн сям-йылолъёсыныз, анай кылыныз данъяськонэз шӧдӥськиз. Учкисьёс шумпотыса пумитазы Удмурт Эльку­нысь «Пурга мылкыд» ансамблез. Ша­ерамы соос, кожалод, быдэс концертэн вуиллям. Кема ӵоже апайёс сюлме пыӵамон, мылкыдэз бугыртымон гуръ­ёссэс кисьтӥзы. Фестивалез Бурай ёросысь Касиярово гуртысь нылъёс­лэн «Вуюись» ансамбльзы йылпумъяз. Фестивале пыриськем котькудзэ ан­самблез БР-ысь удмуртъёслэн НКЦ-зы синпель кузьымъёсын но Тау карон гожтэтъёсын пусйиз.

Праздник ӝытозь кыстӥськиз. Ка­лык ӧз дырты возь вылысь бертыны. Соос котькудзы мылысь-кыдысь шу­тэтскизы но вӧсез, фестивалез радъя­сьёслы сюлмысь тау карон кылъёссэс веразы.

Анатолий ГАЛИХАНОВ,

валтӥсь куриськись.

Ольга НИГАМАТУЛЛИНА.

Бурай ёрос.

8159

Оставить сообщение: