Асавка. Пичи гурт. Сое уд шедьты картаысь. Но татын тупаса улӥсь удмуртъёс но бигеръёс понна со - тужгес дуно но дано инты. Аръёс, дауръёс ӵоже калык выль ужъёсыныз, бадӟым вормонъёсыныз уте-вордэ вордскем шаерзэ. Гуртлэн узырлыкез но шулдырлыкез тыршись, ужась адямиос бордын возиське. Асавка музъемын ик будэмын шаермы понна сюлмынызы ӝуась адямиос но: Совето Союзысь Герой нимлы кузё луэм Ульмас Шакиров, Чечен ожын бырыны шедем Герой Эдуард Минниахметов, Туринын ортчем Паралимпи шудонъёсын кык пол чемпион луэм Рустам Гарифуллин. Соослэн нимъёссы вордскем гуртазы гинэ ӧвӧл, шаере, калык пӧлы паськыт вӧлмемын.
Гуртлы сӥзем ужрадэз усьтӥз Тошкур гурт поселенилэн администрациеныз кивалтӥсь Зайнап Валинурова.
- Асавка гуртын кема аръёс ӵоже тупаса, огкылысь луыса уло удмуртъёс но бигеръёс. Гурт калыклэсь ӟеч ужъёссэ лыдъяса уд быдты. Ӟеч ужъёс быдэстыны котьку дась луэм калык улэмен но, Асавка улэ но сяськая. Оскисько, азьпалан но та гурт азинскоз, - шуиз Зайнап
Школа коллективлы, «Кизили» фольклор ансамбльлы (кивалтӥсез Л. Г. Пукрокова), У. Шакировлэсь нимзэ нуллӥсь гуртысь библиотека-музейен кивалтӥсьлы Г. Р. Садриевалы со пумтэм тау карон кылъёссэ вераз, Данъян грамотаосын но синпель кузьымъёсын пусйиз. Гуртооссэ бадӟым праздникен ӟечкыланы вуиз Балтач ёрос администрациен кивалтӥсьлэн социальной ужпумъёсъя воштӥсез, БР-ысь сӥё-дано дышетӥсь, РФ-ысь дышетон удысысь дано ужась Фирдавис Рахимов. Гуртысь тужгес арлыдо песянаез, 93 арессэ пусъем Фарига Туктамышеваез но нырысетӥ дышетӥсьсэ Фатима Тимерзяноваез со кузьымъёсын дунъяз. БР-ысь удмуртъёслэн ИКЦ-зылэн методистэз Лира Рахимьянова но асавкаослы ӟечкылан кылъёсын вазиськиз. Ф. Г. Рахимовлы, З. А. Валинуровалы, Л. Г. Пукроковалы но со Тау карон гожтэтъёс сётӥз.
Шулдыр крезьгур, кырӟан-эктон та нуналэ ӧз ик чалмытске. Сцена вылын огез бӧрсьы мукетыз ӟечкыланъёс чузъяськизы. Владислав Шакиров но Заниф Закиров Асавкаын вордскем но военной ӧрез быръемъёслы материал дасяллям. Та нуналэ соос ужзэс калыклы возьматӥзы.
Праздникын выль семья кылдытэм Зиятовъёсты но Туктакиевъёсты, инвожо толэзе бадӟым юбилейзэс пусъем Сагира Фахриеваез (75 арес) но Фазиля Туктакиеваез (80 арес), алигес нуныоссы вордскем Самиевъёсты, Арманшинъёсты, гуртысь егит эмчиез Эмма Рахимоваез но ӟечкылазы, синпель кузьымъёсын пусйизы.
Ужрад концерт номеръёсын тырмемын вал. Асавкаосты ӟечкыланы вуылӥзы Татышлы ёросысь Выль Татышлы культура юртын ужасьёс Марина Низамова но Александр Галиев. Гуртоос пӧлын но кырӟан-эктонъёссэс возьматыны мылкыд карисьёс трос луизы.
Ужрад спорт шудонъёсын йылпумъяськиз. Шуныт пумиськон кемалы тодэ кыльымон луиз. Праздникез радъяны коньдон юрттэт возьматӥзы Р. Закирьянов, И. Шакиров, Ф. Рахимов, Р. Нуртдинова, И. Ахмадуллина, Л. Воротынцева, Ф. Шайсламов, Р. Хазиева, В. Шакиров, И. Хаматов но Тошкур гурт поселение.
Миляуша БУЛАТОВА.
Балтач ёрос.
Оставить сообщение: