Ми «Гербере» вуылӥмы

«Гербер» - удмурт калы­кез огазеясь бадӟым шул­дыръяськон. Кылем аре со лымшор палась Алнаш ёросын ке ортчиз, туэ - Удмурт ша­ерлэн уйпалаз интыяськем Яр ёросын. Яр ёрос тодмо удмурт кылбурчиосты Флор Васильевез но Михаил Фе­дотовез будэтӥз. Камсьӧрын улӥсь куд-ог удмуртъёслы Яр ёрос егит дырзэс но тодэ вайытэ, малы ке шуоно асьме палан татысь педагогикая училищеын дышетскемъёс ӧжыт ӧвӧл.

Яр ёросэ вазь ӵукна ик потӥмы. «Гербер» ортчоно площадка милемыз шулдыр кырӟанъёсын, пӧртэм чебе­ресь буёлъёсын тырмем возь вылын пумитаз. Делегаци­мес Яр ёрос больницаын но пенсионной фондын ужасьёс пумитаса сюлмысь куноязы. «Гербер» шулдыръяськонын егит семьяосты данъян мыл­кыд шӧдӥськиз, программаын сюанлы, егитъёслы сӥзем темаос валтӥсь луизы. Шул­дыр возь муш палэп кадь гурлаз, «Усточикар» деко­ративно-прикладной ужъёс­лы радъяськем адӟытонэн артэ «Вузкаронни» инты­яськемын. Татысь чебересь сувениръёс басьтыны, че­скыт пӧрамъёсты оскалтыны луэ. Жингрес куараос ко­тыре чузъясько, «Батыр-шоу» конкурсын егит пиос но воргоронъёс кужымзэс мертало. Вӧзысьтыз пло­щадкаын пӧртэм ёросъёсысь вуэм нылъёс но пиос «Быдэ вуон» ӵошатсконын кужымзэс эскеро. Программаез учкыса, ми Вязовка гуртысь Радис Гайниятов понна «висимы». Радис Воткинскын дышетске бере, ёроссы понна тыршиз. Нош ми со понна киосмес жалятэк чабимы. Удмурт коллективъёслы сӥзем «Мы­ло-кыдо» программа кутскем бере, шулдыр кырӟанэныз шумпоттӥз Татышлы ёро­сысь «Удмурт пиос» ансамбль (А. Галиев, Ф. Кабипянов, О. Марданов, Ф. Ахметшин, А. Кайранов). Тани кутскиз праздниклэн официальной люкетэз. Удмурт Элькунлэн тӧроезлэсь ужъёссэ быдэсъ­ясь Александр Соловьёв калыклы вазиськоназ шуиз:

- Яр музъем но удмурт ка­лык, Удмурт Республика ӟеч кунооссэ пумитаны котьку дась. Тулыс ужъёсты азинлы­ко йылпумъяса, ужась калык сюлмысь шулдыръяське, кы­дёкысь кунооссэ но пумита, кырӟа, эктэ, вера. Бадӟым тау Яр ёрослы, татын улӥсь, ужась калыклы, шуныт пуми­таны быгатэмзы понна. Респу­бликалэн агропромышленной комплексэз арысь аре мед кужмоялоз шуыса, вылӥ ки­валтэт вань кужымзэ сётыса ужалоз. Басьтэм вормонъёс­мы азьланяз но мукетъёслы учкымон мед луозы, бусыоса­мы ю мед удалтоз.

Куноосты но люкаськем калыкез «Мудор» сэрегын дасям ӝукен сектазы, ку­риськем ӝукез веръяса коть­кин ужез яратӥсь удмурт калыклэн ӟеч вуоноезлы оскиз, Инмарлы йыбыртты­са ӝукез веръяз. Та нуналэ улонысь вазь кошкем УР-ысь йӧскалык политикая минис­трлэсь Владимир Николаевич Завалинлэсь нимзэ но трос пол тодэ ваизы. Владимир Николаевичез но Яр ёрос будэтэм. Со туж тыршем «Гер­берез» Яр ёросын ортчытон понна. Вуоно арын «Герберез» Кез ёрос пумиталоз. Кылды­синлэн статуэткаез табере кезъёс киын.

Ирина САМИГУЛОВА.

Удмурт Элькун.