Аслад лэсьтэм ужед котьмалэсь дуно

- Аслад киосыныд маке лэсьтон сярысь нырысьсэ ку малпаськид? Нырысетӥ лэсьтэм уждэ тодӥськод на-а? - юасько мон солэсь.

- Кибашлы адямиослэн ужъёссы котьку кельшо вал. Нырысь ӝажыос лэсьтӥ, бӧрысь сяськаослы подстав­каос, кухняын вандылӥськон пулъёс пӧрмытӥ. Собере борддоре ошон часъёсты че­беръяны кутски. Вылезлы дышетскон тунсыко потӥз, кельшыны кутскиз. Аслад лэсьтэм ужед шоры учкись­код но, сюлэм шумпотэ, йырын нош ик кыӵе ке выль малпан кылдэ. Озьы выль ужъёслы эскизъёс пӧрмо, кыӵе ке но схемаос, планъёс кылдо. То­карной станокме но ачим ик малпаса лэсьтӥ. Собере трак­тор, бакчаын пӧртэм ужъёсты быдэсъяны юрттӥсь арбериос кылдытӥ. Гуртын ук ваньмыз кулэ, - вера Вадим.

Вадим Выль Татышлы гур­тэ 1991-тӥ арын бертэ, ата­езлэн семьязэ вордӥськем палъёсаз ваемез потэм. Ка­захстан шаерысь Целиноград улосвылын вордӥськем но будэм пияшлы улон интызэ воштон секытэн сётӥськымтэ. Котькуд ар гужем Выль Татыш­лые шутэтскыны бертылӥсь пияшлы татын ваньмыз тод­мо но матысь вылэм. Та гур­тысь Расиля нимо нылашен соос семья кылдытӥллям, ӝоген бадӟым пизы Ильяс вордӥськем. Со дырысен 21 ар ӵоже кузпалъёс ог-огзэс валаса но тупаса уло. Та ды­розь Вадим пӧртэм интыосын тыршиз: нырысь «Дэмен» СПК-ын, нылпи садын, Свердловск улосвылын вахта амалэн ужаз. Сое котькытын уж борды сюл­мысь кутскыны быгатэмез, ужъёссэ пыр-поч лэсьтыны тыршемез висъяло.

Али дыре Вадимез ёросын но солэн палэназ тросэз тодо. Со юртъёслэсь пушсэ но пед­ланьзэ лэсьтэ. Вӧлдэтъёсты чеберъяса вагонкаен ту­патъя, пӧртэм чебересь ту­батъёс пӧрмытыны быгатэ.

- Туала адямиос юртсэс гинэ ӧвӧл, мунчооссэс но туж чебересь карыса лэсьтыны куро. Адямиослэсь куронзэс быдэстыны тыршисько. Кли­ентъёсы котьку тырмыт, уждэ ӟеч быдэстӥськод ке, со ся­рысь ог-огзылы верало, дэм­лало. Уг яратӥськы дыртыса ужаны, ужме котьку интыяз вуттыны тыршисько. Тырем коньдонзэс жаляно медаз луэ, уже мед кельшоз шуыса сюл­маськисько, – вера Вадим. Со кылъёсыз сьӧрын ушъяськем ӧвӧл, ас ужзэ дунъяны быга­тон мылкыдыз шӧдӥське.

Пиосмуртлэн трос на азь­ланяз быдэстоно ужъёсыз но выль малпанъёсыз. Ильяс, Динар пиосыз сярысь но атай­мурт малпа, аслэсьтыз то­дэмзэ, быгатонлыкъёссэ со­ослы но сётэ. Пиосыз атайзы бордын ужаны дышетско, трос дыръя армиысь бертэм Ильяс пиез нырысетӥ юрттӥсез луэ. Нош Динар укмысэтӥ классэз йылпумъяз, азьланяз дизай­нер луон сярысь малпаське ни. Пичиез Нияз тямыс толэзь гинэ ке но, атаезлэсь станок куаразэ кыдёкысен тодма, уг кышка. Ужан мастерскоез пала шумпотыса куриське. Озьыен, атаймуртлэн нош ик одӥг юрттӥсез будэ.

Вадимлэн бадӟым малпа­нэз вань: азьланяз шуныт ма­стерской лэсьтыны, толалтэ но, пе, кынмытэк ужаны мед луоз. Лэсьтӥськон ужъёсты арлэн вакытэз кезьыт шуыса дугдытыны уг луы.

- Писпу мерттӥ, пиосы вань, табере аслым выль юрт ӝутон сярысь но оло малпась­коно? – пальпотыса пыдлось малпанъёсыныз люкиськиз кибашлы адями.

Ирина САМИГУЛОВА.

Татышлы ёрос.