Бызьыло, шудо, пӧртэм ужъёсын выро

Янаул ёросысь Вуж Ва­ряшын, кылсярысь, нуназе шутэтскон лагере 1-6-тӥ клас­съёсысь 40 пиналъёс ветло. Татын соослэсь шутэтсконзэс радъян сярысь сюлмасько воспитательёс С. Г. Ахметга­раева, С. М. Нурокова, Э. Г. Ис­ламова, Т. М. Тимирбулатова. Нош нылпиослэсь тазалык­сэс юнматон бордын тырше школаысьтызы физкультурая дышетӥсьсы Л. С. Багаутдинов.

Пиналъёслэн котькуд нуналзы шулдыр но пайдаё ортче. Лагерен кивалтӥсьлэн Вероника Мензаировна Гал­лямшиналэн верамезъя, нылпиос татын пӧртэм уж­радъёсы пыриськыло. Одӥгаз нуналэ «Мода-2014» конкурс радъяськиз. Отчы пӧртэм классъёсысь 23 нылъёс пы­риськизы. Сьӧразы соос че­беръяськон котыръёссэс, чебересь дӥськутъёссэс кутӥзы. Конкурсын нылъ­ёс стилистъёслы, визажи­стъёслы, парикмахеръёслы пӧрмизы. Озьы соос ог-огзэс подиуме потыны дасязы. Нош отын вормисе потӥз эшъясь­кон. Со сяна, нылпиослэн кемалы тодазы кылёзы на «Весёлые старты», «12 запи­сок», «Найди вожатого», «Ры­царский турнир» конкурсъёс. Лагерь пумысен чебересь малпанъёссы вуоно арын но соосты татчы кыскозы.

Калтасы ёросысь Бадӟым Качак школаын но та нуналъ­ёсы улонзы «пӧзе». Уго 23-тӥ инвожоозь татын профильной, трудовой но спортивной лаге­рьёс ужалозы. Отын огъя 100 пиналъёс шутэтско, ужало, тазалыксэс юнмато.

«Италмас» профильной лагерьын Е. У. Насипуллина кивалтэм улсын покчи клас­съёсты дышетӥсьёс Р. П. Ми­ниева, Л. С. Морозова, М. Т. Ах­мадыршина, А. М. Минликаева ужало. Нош вожатойёслэсь ужзэс бадӟым классъёсын дышетскисьёс быдэсъяло. Ӵошен соос пӧртэм шудонъёс-конкурсъёс ортчытъяло, ин­куазез эскеро. Нош трудовой лагере ветлӥсьёс бакчаысь ужъёсты быдэсъяло но мукет чыры-пыры ужъёсты лэсь­то. Та ласянь пиналъёслы дышетӥсьёссы А. С. Тимир­зянова, Э. Ш. Атнабаева, М. Ю. Тимирбаев, Е. А. Суфияров, В. Н. Галимзянов юртто.

Бадӟым Качакысь дышет­скисьёс котьку спортэн юн эшъяськеменызы висъясько. Соин, вылды, соос спортивной лагере но шумпотыса ветло. Уго нылпиослы татын таза­лыксэс юнматыны, быгатон­лыкъёссэс волятыны паськыт луонлыкъёс кылдытэмын. Соос нунал ӵоже бызьылы­ны-тэтчаны но, волейболэн-футболэн шудыны но вутско. Таяз лагерьын нылпиосын Ю. С. Зайнакаева, Ф. М. Вагапов, Г. Ю. Тимирбаев ужало.

Шутэтсконэн, тазалыксэс юнматонэн валче татысь нылпиос экскурсиосы потаса, инкуазь чеберлыкен но тод­матскыны дыр шедьто.

Ольга НИГАМАТУЛЛИНА