icon_gotop
18+
autorisation
Войти | Регистрация
Время в Татышле
05:45
Понедельник, 26 Июля
Рекламный баннер 990x90px top

Укноосын яркыт тылъёс мед пиштозы

2014-06-05

- Виктор Шакирович, куль­тура удысын ужан понна, мон малпасько, трос кужым но быгатэм но кулэ. Нош тӥвань ужан сюрестэс та удысэн герӟады. Ужан аръёстэс мал­пакуды, ма тужгес тодады лыктэ?

- Ужаку пӧртэм дыръёс луизы. Зэм, культура удысын ужанэз ваньмыз уз ворме. Нош мон та удысэ лыктӥ но, кошкеме ӧз луы ни. Одӥг ар ужаме бере ик культура юр­тэн кивалтӥсе юнматӥзы, туннэ нуналозь но ас ужам «пӧзисько». Азьвыл ужаны капчигес вал, адямилэн улон шоры учконэз мукетгес луиз. Патриотизм, энтузиазм кадь валатонъёс вылэ пыкиськыса улӥсь калыкен ужаны но, шу­тэтскыны но капчи вал. Кон­цертъёсы, пӧртэм конкурсъё­сы но смотръёсы пыриськыса дано вормонъёс басьтылӥмы. Гуртъёсы концертъёсын по­таськомы вал. Сюрес вылын машинамы кыриськон дыръёс но луизы, бускель ёросысь одӥгаз гуртысь кык нунал бертыны быгатытэк улӥмы. Нош туала улонын дунлыкъёс воштӥськемын, али котьмае коньдонэн, ваньбур утчанэн герӟало.

- Культура удысын ужамед бере, калыкез шулдыртыны, калык шутэтскыку но ужаны быгатоно. Культура юрта­ды пӧртэм ужрадъёс трос ортчытӥськоды, дыр?

- Бен, праздник нуналъё­сы котьку ӟырдыт луэ. Соку сценарий дасяно, калыкез люкано, клубе лыктэм гур­тоосмылы шуныт мылкыд кельтыны быгатоно. Гуртысь культура юрт пӧртэм арлыдо калыкез огазе люкась инты луэ. Гуртамы туж мыло-кы­до, ужаны, кырӟаны-эктыны яратӥсь калык улэ. Пӧртэм быгатонлыкъёссы луэм гур­тоосмы но трос. Кемалась ини арлыдоосын огазеяськон кылдытон сярысь малпасько. Кӧня ке пол пӧртэм ужрадъёс ортчытӥмы, арлыдоос шумпо­тыса лыкто таӵе ӧтчамъёсы. Кышномуртъёс сяна, пиосмур­тъёс но тросгес мед луысалзы шуыса малпасько. Арлыдо адямиослы пумиськонъёс кулэ, пенсие потыса адямилы яратоно ужезтэк секыт луэ. Азьланяз таӵе огазеяськонмы луоз шуыса осконэ вань.

- Нош кызьы кутске тӥляд ужан нуналды?

- Ужан нуналэ трос дыръя огсямен кутскылӥз: вазь ӵукна лыктыса кенераськоно луисько вал. Егит адями­лэн, ма ватонэз, кужым но дарт бадӟым луэ. Ӝытъёсы культура юртэ лыктэм егит пиос кусыпсэс пӧртэм сямен возьмато, ортчыт лӧптэм егит мылкыд кенерез тӥянэ но вуттэ.

- Нош егитъёсын огкыл шедьтыны секыт ӧвӧл-а?

- Егитъёс пӧлын котькыӵеез вань. Озьы ке но мон соосты уродэзлы но умоезлы уг люкиськы. Нырысь «уробоязы» пуксьыны тыр­шисько, бӧрысь каллен гинэ биньгозыез киям кутӥсько. Егитъёсын ог-огмес валась­комы, тросэз палэнэ кошкыса но уг вунэто. Соос вазисько, ӟеч кылзэс верало.

- Культура юртты, учкисько, туж бадӟым, сое утён, возён понна пӧртэм ужъ­ёсты быдэсъяно луэ, дыр?

- Та юртэз 1984-тӥ арын ӝутӥзы. Со дырысен липетъёс­сэ но вошъямы, котькуд ар ту­патъян ужъёс лэсьтӥськомы. Кенеръёсмы табере кортлэсь, трос писпуос мерттэмын, гу­жем сяськаос кизиськомы. Трос аръёс ӵоже татысь кош­кытэк ужам бере, культура юртмы борды лулыным-сюл­мыным бурми ини.

- Школаын дышетскись пиналъёс но дорады ӵем ву­ыло, дыр?

- Дышетскисьёс вуыло, кызьы, пе, культура юртын пиналъёстэк ужалод? Соос лыкто ке, татын жингыр вазе. Пиналъёсыз шыпыт луыны ноку уг косӥськы, культура юрт жингырась луыны кулэ. Чалмыт луись культура юртэ пырем потоз шат?

- Тодӥсько, тӥляд ан­самбльды но вань. Вералэ вал со сярысь.

- Ансамбльмы нырысь «Гуждор» нимаськиз. Нош бӧрысь со «Инвожо» луиз. Али - «Зангари». Зэм, калык ним басьтыны ӧм быгатэ, со сярысь жаляса верась­ко. Нош пӧртэм аръёсы ёрос, республика, регионъёс ку­спын ортчылӥсь ужрадъёсын басьтэм вормонъёсмы трос люкаськемын.

- Лулчеберетлэн араз кыӵе мылкыданъёсты вань?

- Клубын ке но ужасько, ушъяськыны, трос вераськыны уг быгатӥськы. Кема ӧвӧл юби­лейме ортчытӥ, ёросысьтымы ӵош ужам эшъёсы ӟечкыланы лыктӥзы. Котькинлы но умой­зэ сӥземе потэ, ужъя эшъёсы­лы капчилык, таиз ар ваньзэ умойзэ мед ваёз. Калыкмылэн мылкыдыз медаз сӥя, сюлэм­зы котьку кырӟаны но экты­ны мед куриськоз. Культура юртъёслэн укнооссы котьку яркыт тылъёсын мед пиштозы.

Ирина САМИГУЛОВА.

Калтасы ёрос.

1634

Оставить сообщение:

НАШИ ПАРТНЕРЫ