Гуртъёсын ӵош ышозы

Малы гуртъёс быро? Ку та процесс кутскемын? Луэ меда сое палэнтыны? Та юанъёс гуртысь котькуд адямиез сюлмаськыто, луоз. Дышетон, эмъюрттэт возьма­тон удысъёсын оптимизация кутскем бере, гуртъёсын пытсаськем коркаослэн лыд­зы трослы йылӥз. Быдтэмын школаос. Ӧнерчиос тырмыт луымтэен, ужамысь дугдэмын фельдшер пунктъёс. Аспӧртэм укрупнение, централизация шуон азинске: бадӟымгес гуртэ интыяськемын школа, эмъюрт, котыр гуртъёсысь адямиослы отчы ветлоно луэ.

Укрупнение, централиза­ция - туннэ яке толон кут­скем процесс ӧвӧл. Росси­ын со 30-тӥ аръёсысен ни азинске. 70-80-тӥ аръёсын гуртъёслэн быремзы исто­риямы тужгес бадӟым инты басьтэ. Со вакытэ ик тупа колхозъёслэн, совхозъёслэн кылдэмзы но.

Татарстанысь одӥгез журналист Эльдар Гизатул­лин бырись гуртъёс сярысь одӥгаз материалаз тазьы гожтэ: «…Берло 13 ар ӵоже Та­тарстанын гуртъёслэн лыдзы 89-лы кулэсмиз. Бадӟымесь гуртъёсын, кытын вакытаз шор ёзо школаосын одӥг клас­сын 25-30 пиналъёс дышет­скизы, туннэ нуналэ нырысетӥ классэ лыктӥсьёслэн лыдзы кыклы-куиньлы ӵоша. Респу­бликаын 90-лэсь трос мало­комплектной тодон-валан сётон юртъёс лыдъясько…»

Татышлы ёросысь Бигиней гурт. Вакытаз со дано шко­лаеныз ёросын гинэ ӧвӧл, бускель ёросъёсын но тодмо луиз. Татын Бальзюгаысь, Вязовкаысь, Утар-Елгаысь, Юг-Хуторысь (туннэ нуналэ быремын ни), Улысь Балта­чысь, Вылысь Балтачысь, Альгаысь, Дубовкаысь, Кы­зыл-Ярысь, Ивановкаысь, Выль Татышлыысь, Калми­ярысь, Кыткы-Елгаысь, Пе­тропавловкаысь, Майскысь, Савкиязысь, Балтач ёросысь Асавкаысь пиналъёс тодон-валан басьтӥзы. Кылсярысь, 1969-тӥ арын школаез 72 адями йылпумъям, 1970-80-тӥ аръёсы школаын 420-450 пиналъёс дышетскиллям. Кӧня дано адямиосты Би­гиней школа будэтэм! Кыл­сярысь, Россиысь сӥё-дано суредась, Удмуртиысь калык суредась Менсадык Гарипов, дано удмурт поэт, драматург, публицист Фёдор Пукроков. 2003-тӥ арын школалы М. Гариповлэн нимыз сётэмын. Туннэ нуналэ Бигиней школа Улысь Балтач школалэн фи­лиалэныз лыдъяське. Отын покчиос понна кык мало­комплектной классъёс ча­кламын.

…Лулпушез бугыртӥсь юг­дур. Школалэн ӧсъёсыз пыраклы пытсаськизы ке, гуртлэн вуоноез кыӵе луоз меда?

Вераны кулэ, гуртъёслэн быремзы сярысь сюлмаськи­сьёс трос. Кылсярысь, Челя­бинскысь этнограф но шаер­чи Владимир Теплов аслаз кылдытэм тунсыко проектэз бордын ужа. Та выллем проек­тъёс азьвыл шаерамы ноку ӧз пумиське на вал. Солэн ужез «Книга памяти российских деревень» нимаське. В. Тепло­влэн ужмугез – Россиысь вань ышем гуртъёсты шедьтыса, книга бамъёсын «улӟытон». Этнографлэн кылъёсызъя, Челябинск, Свердловск, Кур­ган, Тюмень улосвылъёсын, Пермь шаерын солэн ужез йылпумъяськемын ни. Али со Башкортостанысь, Сибирь регионысь бырем гуртъёсты эскерон-утчан бордын тырше. Ужаз солы бадӟым юрттэт возьмато 1937-тӥ арысен пӧртэм газет бамъёсын пе­чатласькем быръён округъ­ёслэн но участокъёслэн спи­сокъёссы. Озьы ик этнограф картаосын но пайдаяське. Огъя Россиез эскероно ке, тужгес трос гуртъёс Киров ёросын быремын: дас сӥзьым сюрслэн вить сюрсэз гинэ кылемын.

Гуртын улӥсьёс вылын воз­исько калык сям-йылолъёс, культура, анай кыл. Гуртъёс быризы ке,соосын ӵош ик ышо­зы калык дунлыкъёсмы но.

Миляуша БУЛАТОВА