Соос пӧлын пӧртэм интыосын дышетскисьёс но ужасьёс луизы. Анита Вальякка, кылсярысь, эмчи, реабилитационной центрын ужа. Со ӟуч кылэз ас мылкыд каремезъя дышетэ но Россиын улӥсь ӟуч калыклэн культураеныз но историеныз тунсыкъяське. Нош Ольга Пуссинен писатель, тодосчи но лингвист. Азьвыл со Мордовиын улэм, нош али Финляндие быземын, отын улэ но ужа. Томи Койвунен, Мерви де Хеер, Яакко Хелке Хельсинкиысь университетын дышетско но ужало. Нош Симо Кантеле Хельсинки университетысь магистрант луэ. Куноосмы республикамылэн, отын улӥсь калыклэн улонэныз, сям-йылолъёсынызы, культураеныз тунсыкъяськизы. Газетмы пумысен но соослэн пӧртэм юанъёссы кылдӥзы. Та нуналэ соос пӧлысь тросэз республикаысьтымы удмурт газетэз нырысьсэ киязы кутӥзы.
Куноос Башкортостанэ кемалы вуэмын ӧвӧл, соин, вылды, котькуд пумиськонысь трос выльзэ но тунсыкозэ басьтыны тыршо. Нош малы но кыӵе муген вуэмын меда соос Россие, Башкортостанэ? Со пумысен Симо Кантелелы вазиськи.
- Симо, кыӵе муген Россие вуиды? Тӥтатын нырысьсэ яке азьвыл вуылэмды вань вал ни?
- Вить ар талэсь азьвыл мон Удмурт шаерлэн шор караз - Ижевскын – улӥ. УдГУ-ын ужаса финн-угор кылъёсъя тодон-валанме будэтӥ. Нош али мон сое Хельсинки университетын будэтӥсько, магистрант луисько.
Башкортостанэ бадӟым малпанъёсын вуимы. Ми социолингвистической экспедициен одӥг арнялы лыктэмын. Али ми Татышлы ёросысь Уразгильды гуртэ Анна Байдуллина доры интыяськимы. Толон Выль Татышлы гуртысь школаын вал, ӵуказе Вязовка гуртын ортчоно урамлэн праздниказ вуыны малпаськомы.
- Социолингвистической экспедиция ас азяз кыӵе ужпумъёс пуктэ?
- Социолингвистической экспедициын кылъёслэсь азинскемзэс, ог-огенызы кусып воземзэс, кылдэмзэс но быремзэс, кылъёслэсь туала улонын возиськемзэс эскеро. Ми но со бордын ужаськомы. Милям экспедицимылэн валтӥсь ужпумез: кылъёсты пӧртэм ласянь эскерон. Кыӵе интыосын кызьы верасько, пӧртэм кылъёс кызьы кутӥсько? Башкортостанын удмурт гуртъёсын анай кылзэс утё, соин верасько. Таӵе суредэз Удмурт Элькунын туж шер пумиталод. Оскиськом, экспедицимы милемлы азьланяз но трос выльзэ сётоз.
Ирина ХУЗИАХМЕТОВА.
Татышлы ёрос.
Оставить сообщение: