26-тӥкуартолэзе шаерамы огъя кун экзаменъёс кутскозы. Солэсь радъяськемзэ Башкортостанын туэ сак эскерозы. Со борды республикалэн Президентэз Рустэм Хамитов но кутскоз. Уго кылем арын огъя кун экзаменъёслэн йылпумъянъёссы шумпотымон ӧй вал.
Башкортостан тужгес вылӥ балл люкам вить регионъёс пӧлы шедиз. Котькуд предметъя 80 но солэсь ятыр балл люкам пиналъёслэн лыдзы шӧдскымон йылӥз. Огъя кун экзаменъёс возьматӥзы: республикаысьтымы пиналъёс тужгес ӟеч тодо вылэм англи кылэз, химиез, географиез, информатикаез. Со сяна, республикамы интернетэ пуктэм контрольно-измерительной материалъёслэн лыдзыя но азьпалан луиз.
- Школаосын нылпиослы тодон-валан сётонлэн ӟечлыкез ӝутӥське, озьы ке но огъя кун экзаменъёсын басьтэм лыдпусъёс осконтэмесь. Нылпиослы балл люканы трос дыръя эскерисьёс но юртто. Соин асьмелы кылдэм системаез пытсан сярысь сюлмаськоно, - вераз Р. З. Хамитов.
Огъя кун экзаменъёс вакытэ коньдонэн герӟаськем аспӧртэм пирамида кылдэ. Соин президент анай-атайёс
лы но дышетӥсьёслы бадӟым куронэн вазиське. Дышетскисьёс асьсэлэн тодон-валанзылы мед оскозы, пичиысен пӧяськон борды медаз кыстӥське.
- Йыртэмасьёслы пумит туэ бадӟым ужъёс нуиськозы. Школалэн директорез, ёрос администрациен кивалтӥсь, министерствоын ужасьёс – огвыллем кыл кутытэмын луозы. Огъя кун экзаменъёс янгышъёстэк но йыружъёстэк мед ортчозы, - шуиз Рустэм Хамитов.
Огъя кун экзаменъёслэсь радъяськемзэс 1400 адями эскероз. Та лыдпус кылем арлэсь кык поллы тросгес. Со сяна, 26-тӥ куартолэзьысен 19-тӥ инвожоозь республикаын 118 экспертъёс ужалозы.
Туннэ шаерысьтымы 957 пиналъёс огъя кун экзаменъёс пыр потӥзы ни. Та лыдпус туэ ньыль поллы кулэсмемын. Азьвыл уго тросэз экзаменъёссэс вазьгес сётыны тыршизы. Тодӥзы: та вакытэ пиналъёслэсь тодон-валанзэс юн уг сынало, пӧяськыны но капчиен луэ. Нош туэ та ласянь югдур воштӥськиз. Табере котькуд пиналлы огвыллем курон пуктэмын. Башкортостанын 11 адями экзамен сётӥз, соос пӧлысь котькудӥз кияз аттестат кутӥз. Онлайн-эскерисьёсын одӥг янгыш но шараямын ӧвӧл.
«ЕГЭ-туризм» ласянь но туэ капчи уз йӧты. Улон интыоссэс воштэм пиналъёсты нимысьтыз эскерозы. Башкортостанын палэнысь вуэм нылпиослэн лыдзы туннэ 60 адямилы ӵоша. Со сяна, республикаысьтымы 80 пиналъёс улон ёросъёссэс но городъёссэс воштыны мылкыд каризы. Соос Абзелил, Баймак, Караидель, Хайбулла ёросъёсы интыяськизы. «Куиньлы дышетскись нылпи экзаменъёсын вить ке басьтӥз, - вераз Р. З. Хамитов, – соосты Президент но, Рособрнадзор но эскероз».
Дасяз
Ольга ГИЛЬМУРАНОВА.
Оставить сообщение: