Та вакытэ солэн улонэз быдэсак дышетсконэн герӟаськемын луиз. Но 2008-тӥ арын нылмуртлэн сюресэз вайяськиз. Мариналы куинь вайвожъёс пӧлысь одӥгзэ быръёно луиз. Озьы М. Ишназарова вуонозэ Финляндиен герӟаны малпаз. Туннэ со семьяеныз Ювяскюля городын улэ.
Ювяскюля 1837-тӥ арысь 22-тӥ южтолэзе ӟуч императорлэн Николай I-лэн указэзъя кылдытэмын. Город чебер интые пуксемын – сое Пайянне но Кейтеле тыос котырто. Городын трос пичиесь тыос лыдъясько. Соин Ювяскюляез сюрс тыослэн шаеренызы лыдъяло. Со сяна, татын нюлэсъёс но ӧжыт ӧвӧл. Ювяскюляез дунне вылысь тужгес чылкыт городэн лыдъяло. Соин, вылды, арлы быдэ татчы пӧртэм интыосысь трос туристъёс кыстӥсько. Городэн тодматсконзэс соос Харью вырйылысен кутско, бӧрысь пыдын ветлон ульчаетӥ Семинааримянки ёросэ выжо. Отын вашкалаез но туалаез огинэ пӧлэстӥськемын. Чебер инкуазь но њеч мылкыдо калык ик, оло, Мариналэсь йырзэ берыктӥзы, мурт шаерысь ас дорзэ шедьтыны юрттӥзы. Чылкак татын ик гуртысь вуэм ныллэн аслаз быгатонлыкезлы осконэз вордскиз. Уго Финляндиын калыкез визьнодэзъя дунъяло. Соин Марина шӧдӥз: Финляндиын ваньзэ аслад кужмыныд лэсьтыны луэ.
Город быдӟалаезъя Финляндиын сизьыметӥ интыын луэ. Татын 128 сюрслэсь ятыр адями улэ. Озьыен, Ювяскюля – республикаысьтымы Нефтекамсклэсь ӧжытлы бадӟымгес город. Мариналэн верамезъя, татын улӥсьёс котькинэ бордазы кыскыны быгато. Соос вазиськисесь, кылзыны быгатӥсесь. Озьы ке но тодмотэм адямиосын чаляк матысь кусып тупатыны уг дӥсьто. «Городамы удмурт кылэн пумиськеме ӧвӧл, куддыр гинэ университетысь эшъёсыным вераськисько, - вера Марина. – Но Финляндиын удмуртъёс ӧжыт ӧвӧл». Марина вордскем шаерезлэсь палэнын улыса но анай кылзэ уг вунэты, анай-атаеныз, ӵыжы-выжыосыныз, эшъёсыныз со удмурт кылын вераське. Удмурт ныл Финляндиын тросэзлы выльысь дышетсконо луиз. Мариналэн со ласянь дышетӥсез луиз - улон.
Марина Ишназарова туннэ мурт шаерын ассэ дораз кадь кожа ни. Нош вордскем палъёсызлэсь мӧзмонзэ вормыны юртто семьяез, мусо нылыз но яратоно ужез. Калыкез соос асьсэлэн пиццериязы дасям ческыт сиёнъёсынызы кунояло.
Ольга БОРИСОВА.
Перепечатка материалов – с разрешения редакции. Мнения авторов и редакции могут не совпадать.
Все рекламируемые товары и услуги подлежат сертификации и лицензированию.За достоверность рекламы ответственность несёт рекламодатель.
E-mail: info@gazeta-oshmes.ru
Оставить сообщение: