icon_gotop
18+
autorisation
Войти | Регистрация
Время в Татышле
06:58
Пятница, 29 Марта
Рекламный баннер 990x90px top

Улон шулдыр нылпиосын

14:06 15.05.2014

Янаул ёросысь Шудек гуртысь Гасифа но Павел Шакировъёс кема ӧвӧл 60 арес тырмон юбилейёссэс пусйизы.

Гасифа Ислыбаевна Буй шур дуре интыяськем Вот. Ошья гуртын вордӥськем. Семьязы бадӟым вылэм, соос куать нылпи будӥллям.

- Песяй, песятай но ми­лемын ик улӥзы. Семьяямы вакытаз дас адями лыдъясь­киз. Пичи дыры туж шулдыр ортчиз, - вера Гасифа Ислы­баевна.

Гуртазы покчи классъёс понна гинэ школа луэмен, Гасифа апай бускель гуртэ ветлыса дышетскем, бӧрысь - Янаулысь шор ёзо школаын. Биология, история, геогра­фия урокъёсты со шумпоты­са вите вылэм. Соин, лэся, 1972-тӥ арын школаез йыл­пумъяса, со Варяшбаш гур­тысь школаын яратоно пред­метъёсызъя нылпиослы то­дон-валан сётыны кутскем. Уж сюрессэ нылпи дуннеен герӟаны малпась кышномурт, ужзэ куспетӥ карытэк 1973-1978-тӥ аръёсы, Бирскысь пединститутын, биологияя но химияя факультетын вылӥ тодон-валан басьтэм. Варяш­баш школаын дышетӥсь дас кык ар ӵоже ужам. Со ужъя эшъёсыныз но, нылпиосын но капчиен огкыл шедьтыны быгатэм. 1984-тӥ арын егит дышетӥсь Шудекысь гурта­зы куное вуэм Павел нимо пияшен тодматскем. Соос куспын яратон пуромем. Со арын ик яратӥсь сюлэмъёс кузпалъяськиллям. Озьы Гасифа Ислыбаевна Шудек гуртэ вуэм. Табере солэн уж сюресэз Шудек школаын азьланьтӥськем: нырысь ныл­пиослы продлёнкаос радъям, бӧрысь покчи классъёсты дышетэм. Берло ини со гео­графиен урокъёсты нуэм.

Павел Тимофеевич улонзэ гурт хозяйствоен герӟам. Гур­тын вордскыса будэм пияш, быдэ вуыса но вордскем ша­ераз ик улыны мылкыд карем. Механизатор луыса тыршем. Вакытаз со азьветлӥсь ужа­сьёс пӧлын лыдъяськем. Ял­тае, Ессентукие шутэтскыны вуылыны путёвкаос солы юнме шорысь сётъяллямтэ, вылды. Данъян грамотаосыз, дипломъёсыз но Павел агай­лэсь тыршись, ужез гажась луэмзэ возьмато.

Шакировъёс – гуртын га­жано кузпалъёс. Соос кык нылпи будэтӥзы. Нылзы но, пизы но асьсэлы удыс бырйы­са, ӟеч тодон-валан басьтӥзы. Люба нылзы Чайковскийысь педколледжын дышетскиз, Янаулын нылпи садын ужа. Денис пизы уйпалан вахта амалэн тырше.

- Пимылэн семьяез вань ини. Ми ваньмы ӵошен улӥськом. Валентина кенмы гуртысь библиотекаын ужа. Куинь внукъёсмы милемыз шумпотто. Соос вӧзын нунал­лэсь, дырлэсь ортчемзэ но уд шӧдӥськы. Ӵошен улон – со шумпотон. Нош нылпиосын улон эшшо но тунсыкогес но шулдыргес луэ, – вера Г. Шакирова.

Шакировъёс асьсэ кио­сынызы ӝутэм бадӟым чебер юртын уло. Гасифа Ислыбаев­налэн кылъёсызъя, соослэн котьку тупаса улэмзы ог-огдэ гажан бордын, пе, возиське.

Миляуша БУЛАТОВА.

Янаул ёрос.

6675

Оставить сообщение: