Нылпи синъёс, шудо аръёс

- Ралина Михайлов­на, тодон-валан дуннеен герӟаськем ужан аръёсты кызьы кутскизы?

- Егит дырылэн тодэ кы­льымон нуналъёсыз Удмурт университетлэн филоло­гияя факультетаз дышет­скон аръёсын герӟаськемын. Шудо егит дыр, ӵош дышет­скем эшъёсы аръёс ортчыса но уг вуно. Гужем экспеди­циосын пӧртэм ёросъёсы вуылӥмы. Тодам на Кизнер ёросысь Вуж Мултан гуртэ (али Короленко нимаське) ветлэммы. Со дыръёс ся­рысь кӧня чебер тодэ ваёнъ­ёс кылемын. Экспедициосын ветлыку узыр материал лю­каськомы вал, концертъёс но пуктылӥмы, бӧрысь ужам ваньмыз туж кулэ луиз. Уни­верситетэз йылпумъяса, Шу­декысь школаын ӟуч кылъя но литературая дышетӥсь луыса ужаны кутски.

- Дышетӥсьлэн ужез, тодӥсько, секыт луэ. Уд жаляське-а улондэс та уды­сэн герӟады шуыса?

- Ма, кызьы, пе, жалялод? Ужме сюлэмыя бырйи, ужан сюресме кутскыкум но, бер­ло ужан аръёсам но пиналъёс доры шумпотыса мынӥ. Ужано ужед нырысь ик аслыд шум­потон вайыны кулэ, сотэк уж дуре вамыштыны секыт. Нырысетӥ нуналъёсам ик монэ туж умой коллектив пумитаз. Ужан сюресэз кут­скыку, егит адями вӧзын валась, юрттӥсь, визь-кенеш сётыны быгатӥсь адямиос ке луо, капчи луэ. Мынам сыӵе адямиосы вань вал. Бадӟым опыто дышетӥсьёсын артэ луыса, соослэсь адӟем кары­са ужаны тырши.

- Котькуд дышетӥсьлэн узырлыкез - дышетэм пи­налъёсыз. Тӥмар верасалды пиналъёсты сярысь?

- Пиналъёсме тодам ваисько, тросэныз шуныт кусыпъёсмы кылизы. Али соос шаермылэн пӧртэм сэрегъёсаз уло но ужало. Дышетэм нылпиосы пӧлын дышетӥсьлэсь ужзэ быръ­емъёс но трос, 16-ез УдГУ-ысь Удмурт филологияя факультетэз йылпумъязы. Одӥгаз аре 1-5-тӥ курсозь 7 пиналъёсы вылӥ тодон-ва­лан юртын дышетскизы. Ёрос, республика олимпиадаосы вуылыса ӵемысь призо ин­тыосын, вылӥ дунъет бась­тыса бертылӥмы. Ижевскын ортчылӥсь олимпиадаын уд­мурт кылъя но литературая предметъёсъя Ксения Га­рипова кыкетӥ интылы кузё луиз. Кылъя но литературая дышетӥсь луыны тужгес секыт, малы ке шуоно трос конкурсъёсы пыриськоно луэ. Сочинениос, исследо­вательской ужъёс лэсьтоно, гожъяськонын пиналъёслэсь киоссэс волятоно.

- Ралина Михайловна, конкурсъёс, олимпиадаос, урокъёс сяна, дышетӥсьлы нылпилэсь пуш дуннезэ но валаны быгатыны кулэ.

- Мон кема аръёс ӵоже директорлэн воспитатель­ной ужъёсъя воштӥсез вал. Аслам ужам пӧртэм семьяо­сысь пиналъёсын пумисько­но луи. Секыт семьяысь пи­налъёс но луизы, али «группа риска» шуэм валатон вань. Дышетӥсьлы нылпиез ва­ланы тыршоно, тужгес но со улонэн вӧсь каремын ке. Пиналъёсты уродэзлы но умоезлы люконо ӧвӧл. Коть­куд пинал бордысь маке но умойзэ шедьтыны тыршоно. Адями ноку но быдэсак урод луыны уг быгаты, коть­кинлэн урод палыз но, умой палыз но луэ. Юрттэт кулэ луись пиналъёслы быгатэ­мея котьку юрттыны тырши. Али ке но пиналъёсы тау кылъёссэс верало. Нылпи дышетӥсьлэсь оскемзэ шӧдэ ке, со ӟечгес но, визьмогес но, умойгес но луыны тырше. Нылпиослы улонын шонер сюрес вылтӥ мыныны юрттон – со дышетӥсьлэн одӥгез валтӥсь ужпумез луэ.

- Шутэтскыны потыса, яратоно уждылэсь палэнэ луыны секыт ӧвӧл-а? Ярато­но школады, нылпиосты, ӵем тодады лыкто, дыр?

- Уд ке ужаськы ни, шонер, котьмалы пуш тыре. Ужан аръёс, пиналъёс, ӵошен ужам эшъёсы, котьку малпанъё­сам, тодам улозы. Вераме потэ, котьмалэн но аслаз ды­рыз луэ: ужлэн но, шутэтскон дырлэн но. Али аслам ярато­но пиналъёсы, внукъёсы ся­рысь сюлмаськонэн улӥсько. Лариса нылы но Александр пие, Юрий Фатихович кузпа­лы, эмеспие, кенэ - ваньзы мыным туж дуно адямиос. Ужаку семьялы туж ик трос дыры ӧй вал, нош табере ма­тысьёсылы дырме висъяны тыршисько. Дышетэм пиналъ­ёсы котьку сюлэмам уло, мон котькудӥныз данъяськыса вераны быгатӥсько: Шудек школаысь пиналъёсы шуыса. Кема ӧвӧл тодмо удмурт нылкышно кылбурчилэн Люд­мила Кутяновалэн тодэ ваён ӝытаз ӧтьыса жингыртӥзы вал. Ми Людаен ӵошен одӥг группаын дышетскимы. Азь­ланяз Удмурт шаере но вуыло шуыса малпасько. Мылкыды али ке но сцена вылэ но ку­риське, шуо ук, мылкыд ноку но уг пересьмы.

- Бадӟым тау вераськем­дылы.

- Асьтэлы тау, дорам ву­ылэмдылы.

Ирина САМИГУЛОВА.

Янаул ёрос.