icon_gotop
18+
autorisation
Войти | Регистрация
Время в Татышле
05:17
Понедельник, 26 Июля
Рекламный баннер 990x90px top

Кырӟаса но вераса, мылкыдъёсмес бурдъяса

2014-04-24

Мон малпасько, озьы но тазьы но луыны быгатоз. Нош одӥгез гинэ валамон: адямиослы ны­рысь ог-огенызы пумиськыны кулэ. Тужгес но творческой мылкыдо ке тон, чидалод шат быгатэмдэ ватыса, лул­пушкад «ӵыпыса» возьыны? Коллективъёсын верась­кыку, ӵемысь кылыны луэ: ог-огеныд пумиськыса-кене­шыса, ог-огдэ адӟыса, улыны но шулдыръяськыны капчи луэ. Соин но, дыр, сцена вы­лын ӵошен шулдыръяськись, калыклы эктон-кырӟанъёссэс кузьманы быгатӥсь адямиос мукетъёслэсь пӧртэмгес луо. Сыӵе адямиослэн синъёссы шуд сётӥсь луо, бордазы ва­лантэм кужымзылэн ӟеч воз­иськемез шӧдӥське, сюлэмзы но котьку пинал луэ. Мон юнме пинал сюлэм сярысь кылпум уг поттӥськы, веран­ме азьланьто Куеда ёросысь Гожан гуртысь «Пинал сюлэм» фольклор ансамбль сярысь. Та нуналъёсы ансамбль кыл­дэмез дырысен 15 ар тырмон­зэ пусйиз. Ансамбле туннэ нуналэ 11 адями ветлэ, соос пӧлысь тужгес егитэзлы - 57 арес, тужгес мӧйыезлы 80 арес луэ. Кивалтӥсьсы Гали­на Степановна Широбокова. Кема ӧвӧл «Пинал сюлэм» ан­самбль «Антология народов Пермского края» презентацие пыриськиз. Ансамбль ёрос, регион, регионъёс куспын ортчылӥсь пӧртэм ужрадъ­ёсы вуылэ. Ужзы Тау карон гожтэтъёсын, грамотаосын но дипломъёсын пусъемын луэ.

Юбилейзэс ортчытон дыр­зы Быдӟымналэз пумитан вакытэн тупаз. Гожан гурт­лэн культура юртаз быдэсак удмурт шӧм пыӵамын вал. Удмурт дӥськутэн дӥсяськем «пинал сюлэмъёс» вуэм ку­ноосты ӝутскем мылкыдын пумитало, удмурт калыклэн сиён-юонъёсыныз тырем ӝӧк котыре ӧтьыса куноя­ло. Котыре шулдыр удмурт гуръёс, сюлмысь верась­конъёс вӧлмизы. Нош вуись Быдӟымналэз данъяса кадь сцена вылын бадӟым концерт радъяськиз. 15 ар. Трос-а со? Тужгес но фольклор коллек­тив понна? Зэм, кинлы ке та аръёс сокем трос но уз потэ. Нош «Пинал сюлэмъёс» понна со трос, малы ке шуо­но ӟучомем удмурт гуртын та выллем удмурт ансамбль чылкыт ошмес ву выллем луэ.

- Асьме удмурт кылмы, ась­мелэн калык кырӟанъёсмы, сям-йылолъёсмы медаз быре, медаз вунэ. Возьыт ук со, ку удмурт луэм анай-атайлэн пиналъёсыз вордскем кыл­зэс уг тодо, пал кыл но асьсэ кылынызы вераны уг быгато. Кужмо луись калыклэн, ноку озьы уг луы. Асьме удмурт калыкмылэн но озьы луыны кулэ ӧвӧл, – сюлмысь верало «Пинал сюлэмысь» песянайёс.

Тани кутске концерт, сце­на вылэ ансамблез ӟечкыланы вуэм куноос тубо. Соос пӧлын Пермь шаерысь удмурт ога­зеяськонлэн кивалтӥсез С. И. Гадиятов, Шагирт гурт поселениен кивалтӥсь В. Ф. Муллаяров, «Мичурин нимо СП» ООО-лэн кивалтӥсез Е. Г. Марданов, Шагиртысь культурая но шутэтсконъя центрлэн кивалтӥсез З. Р. Дроздова. Куноослэсь шу­ныт ӟечкыланъёсын верам кылъёссэс шулдыр концерт азьланьтӥз. «Пинал сю­лэмъёсты» ӟечкыласа ваем кырӟанъёсынызы но эктонъ­ёсынызы Екатеринбург горо­дысь «Азвесь гур», Чайков­скийысь «Зарни сӥзьыл», Ша­гиртысь «Инвожо», Киргаысь «Уӵы», Гожанысь пиналъёслэн «Девчата» ансамбльёссы шумпоттӥзы. Екатеринбур­гысь но Чайковскийысь эшъ­ёссы кыдёкысь сюресэз ма­тын карыса вуиллям, малы ке шуоно та коллективъёс кема­ласен эшъясько ни. Кусыпъёс­сы регионъёс куспын ортчись ужрадъёсын пумиськылыса юнмазы, со сяна, «Пинал сю­лэмъёс» Екатеринбурге но Чайковскийе но вуылӥзы.

Котькуд коллектив ансамблез юбилееныз ӟечкыласа кузьымъёсын вуэм. Свердловск улосвы­лысь «Эгес» огазеяськонлэн кивалтӥсез Марина Ягуткина «Пинал сюлэм» ансамблез ӟечкыласа, национально-культурной огазеяськонлэн но «Уралысь Эшъяськон юрт­лэн» нимыныз ог-огенызы кусып воземзы понна Тау ка­рон гожтэтэн пусйиз. «Пинал сюлэмъёс» но пунэме ӧз кыле, кунооссэс Тау карон гожтэтъ­ёсын но синпель кузьымъёсын пусйизы, доразы вуэмзы понна шуныт кылъёссэс веразы.

Ирина САМИГУЛОВА.

Пермь шаерысь Куеда ёрос.

1388

Оставить сообщение:

НАШИ ПАРТНЕРЫ