icon_gotop
18+
autorisation
Войти | Регистрация
Время в Татышле
17:24
Четверг, 28 Октября
Рекламный баннер 990x90px top

«Выжы кыл» пӧртэм калыкъёсты люказ

2014-04-17

Кӧня изьымтэ уйёсты, сюлэмшугъяськонъёсты вае бадӟым люкаськон. Соосты радъянын котьку валче уж юрттэ. Милемлы со ласянь удалтӥз: ужрадъёсты ортчы­тонэ «Эгес» огазеяськонлэн ёзчиосыз, «Азвесь гур» ан­самбльысь кырӟась-эктӥсьёс пырисько. Фестивале калыкез люканы но ӝӧк вылэ пыжись­кемъёс пуктыны бадӟым юрт­тэт лэсьтӥзы ансамбльысь шаплы кышноосмы но ворго­ронъёсмы. Пиналъёсмы но уж­тэк ӧз пуке, гажано куноосмес пумитазы но интыязы.

Фестивальмы «Ваё­быж» удмурт классысь ныл­пиосмылэсь киужъёссэс адӟытонысен кутскиз. Таяз адӟытонамы чильпам но керт­тэм киужъёсыныз Дегтяр­скысь удмурт кышномурт Анжела Долгих пыриськиз на. Со пичи дырысеныз ик семья­еныз ӵош Башкортостанысь Татышлы ёросысь вуэм.

Концертамы пыриськи­сьёс Свердловск улосвылысь куать интыосысь вуэмын вал: Екатеринбургысь, Ре­жысь, Первоуральскысь, Но­воуральскысь, Сысертьысь но Дегтярскысь. Нокыӵе пумиськонъёсмы Дегтяр­скысь «Италмас» фольклор ансамбльтэк уг ортчо. Ка­лыкъёсмы чидатэк возьмало ни Серафима Передериналэсь кырӟанъёссэ. Паймымон куж­мо но чылкыт куараез, куддыр каньыл, визыласа паськыт шур сямен вӧлске, куддыр аз­весь ошмес выллем жильыртэ.

Удмурт Элькунысь Алнаш палась Ольга Данилова ка­лыклы удмурт кырӟанъёсты кузьмаз. Арганэн усто шу­дэменыз но кырӟаменыз со калыкез интыысьтыз ик вырӟытӥз. Фестивале со се­мьяеныз лыктэм. Пичи пиез, удмурт школаямы но вуылӥз, кӧня ке удмурт кылъёссэ но потта. Нош Вика но Ника кык­то нылъёсыз удмурт сямен туж усто верасько. Шӧдӥське, песянайзы удмуртлыкез со­ослы рос-прос пыӵатыны тыр­шем.

Таиз фестивальмы висъ­яськиз поръёс, чувашъёс но коми-зыръянъёс пыриське­мен. Удмурт кырӟанъёс но эк­тонъёс мукет калыкъёслы но туж кельшо. Адӟисьёс пӧлын удмуртъёс сяна, ӟучъёс но, бигеръёс но луизы. Ми шумпотӥськом, эшъёсмылэн лыдзы будэ, бускельёсынымы кусыпъёсмы юнмало.

Фестивалямы нырысьсэ пӧртэм городъёсысь удмур­тъёс вуизы: Николай Мали­новский выжыеныз Удмурти­ысь луэ но семьяеныз кема­лась ини Режын улэ. Со чебер но жингрес куараеныз учки­сьёслы удмурт кырӟан кузь­маз. Новоуральске Татышлы палась вуэм Галина Дениева пумиськонмес камсьӧр уд­муртъёслэн кырӟанэнызы шулдыртӥз. Первоуральскысь Рифат Марданов фестива­льын нылпиосты фокусъёсын паймытӥз.

Учкисьёс «Чингыли», «Веснушки», «Арт-Этюд» ныл­пи коллективъёсты но шуныт пумитазы. Пиналъёсмы ке бордамы карисько, анай кыл­зэс ке кулэ каро, со - анай-атай понна бадӟым шуд! Соос угось милям кивоштӥсьёсмы. Адӟисьёсмы юн чабыса тау каро, нош пиналъёсмылэн мылкыдъёссы нош ик бур­дъясько кадь.

Фестивале пыриськемъё­сты дипломъёсын но пичиесь кузьымъёсын шумпоттӥмы, пӧсь чаен сектамы. Вуоно арын, малпасько, выль кырӟанъёс нош ик чузъяськозы, выль пумиськонъёс кылдозы.

Марина ЯГУТКИНА,

Свердловск улосвылысь «Эгес» огазеяськонлэн тӧроез. 

2783

Оставить сообщение:

НАШИ ПАРТНЕРЫ