Берытско Нефтекамскысь педколледжын дышетскем аръёсам. Мон отчы укмыс классэз йылпумъяса вуи. Дышетскыны пырыкум, удмурт ӧрез бырйи. Группаын тросэз удмуртъёс вал.
Удмурт кылъя но литературая урокъёсты, удмурт кылъя методикаез Татьяна Рафхатовна Глимзянова нуиз. Нырысь тодмотэм, «гудыри» куараё дышетӥсьлэн урокъёсаз пырыны кышкытгес вал: одно ик юанъёсыныз визез сыналоз, ӧд ке вера, «быжозэ» но лякоз. Студентъёслы ӟеч тодон-валан сётон сярысь малпаськись дышетӥсьлэн куронъёсыз золэсь ке но вал, солэн учкемез пыр сюлэм шунытсэ, дышетскисьёс сярысь сюлмаськемзэ валаны шуг ӧй вал.
Колледжез йылпумъям дырысен дас арлэсь ятыр вакыт ортчиз ни. Но отын басьтэм тодон-валанэ али ке но улонам инъет выллем луэ. Гожъяськонын-а, веросэз сэрттон-пертчонын-а шугъяськонъёс кылдо ке, нырысь ик Татьяна Рафхатовналэн валэктон амалъёсыз тодам лыкто. Али ке но солэн сётэм тодон-валанъёсыз вылэ пыкъяськисько. Кылсярысь, предложениослы разбор лэсьтон, яке предложениосты висъян. Макем валамон, пыр-поч валэктӥз сое Татьяна Рафхатовна.
Удмурт литературая урокъёссэ со нестандартной амалъёсын радъя вал. Ӵемысь урок-диспут ортчытъяз. Лыдӟем произведениосты, кылбуръёсты эскерон соку тужгес но яркыт, тодэ кыльымон луылӥз. Сыӵе урокъёсын котькуд студентлэн аслаз «геройез» кылдылӥз, нимысьтыз малпанэз шараяськылӥз. Тунсыко ортчо вал урокъёс. Вераны кулэ, Татьяна Рафхатовналэн лекциосыз мыным бӧрысь УдГУ-ын журналистикая факультетын дышетскыкум но трос юрттӥзы.
Т. Глимзянова педколледжын 1997-тӥарысен ужа. Туннэ нуналэ со учебно-производственной ужъёсъя кивалтӥсьлэн воштӥсез луэ. Педагогической практикаен кивалтӥсьлэн ужъёсызлы студентъёс но, дышетӥсьёс но вылӥдунъет сёто. Со урокъёссэ радъяны но, дышетскисьёс азе зол куронъёс пуктыны но быгатэ.
Татьяна Рафхатовна научной ужъёслы но дырзэ висъя. Туннэ нуналэ солэн даслэсь трос научной но методической статьяосыз печатласькемын ни. 2010-тӥарын солы «Лирикаын кылсуред кылдытон амалъёс» методикая разработка дасян понна БР-ысь Дышетонъя министерстволэн грифез сётэмын. Татьяна Рафхатовна «Формирование коммуникативной компетентности студентов на уроках удмуртского языка» методической ужпумез сэрттон-пертчон бордын но тырше. Со сяна, калыккуспо, республика науно-практической конференциосы но форумъёсы вуылэ. Кылъёс сярысь законлэсь быдэстӥськемзэ эскеронын БР-ысь Правительство бордысь комиссиын ужасьёс пӧлы но со олокӧня пол пыриськиз ни. Удмурт кылъя но литературая республика олимпиадаос радъямез понна, Т. Глимзянова БР-ысь Дышетонъя министерстволэн тау карон гожтэтъёсыныз пусъемын.
Педколледжын ужатозяз, удмурт кылэз, калык культураез, сям-йылолъёсты дышетон но азинтон сярысь сюлмаськись дышетӥсь удмурт кылъя висъетэз дидактикая но методикая материалъёсын узырмытӥз.
Йӧскалык культураез азинтонын егитъёслы чаклам проектъёсты улонэ пыӵатон ужъёсы, БР-ысь удмуртъёслэн НКЦ-зылэн ӧраз азинлыко пыриськемез понна, Татьяна Рафхатовна Удмурт Элькунысь Егитъёсын ужанъя министерстволэн тау карон гожтэтэныз данъямын. Быръем ужзэ гажась, сюлмысь тыршись, зэмос дышетӥсьёсты дасясь дышетӥсьлэн ужез РФ-ысь Дышетонъя но наукая министерстволэн Данъян грамотаеныз пусъемын, солы «Отличник образования РБ», «Почётный работник СПО» нимъёс сётэмын.
Адями уженыз дано луэ, шуо. Озьы ик вань. Татьяна Рафхатовналэн вормонъёсыз солэсь тыршись, бадӟым букваен дышетӥсь луэмзэ возьмато.
…Дышетӥсь. Макем бадӟым кыл. Улонын котькыӵе воштӥськонъёс луизы ке но, нимыд тынад котьку улоз. Аръёс, дауръёс ӵоже сое дышетэм пиналъёсыд утёзы.
Миляуша
НИГАМАТУЛЛИНА.
Нефтекамск город.
Оставить сообщение: