- Милям цехмы 2009-тӥ арысен ужа, калыклы нуналаз 2-2,5 тонна йӧлэз вузаны дасяськом. Быдэс ар дугдылытэк ужаськом, арлэн котькыӵе вакытаз йӧлмес Нефтекамск, Янаул городъёсы келяськом. Сандугач, Барабановка гуртъёсын улӥсьёс но татчы ӵемысь вуыло. Гуртысьёс, йӧл сяна, вӧй, йӧлвыл, кузятэм но басьтыло. Дунъёс сярысь ке, ми дорын та нуналъёсы одӥг литр йӧл 27 манет сылэ, 250 г йӧлвыл - 50 манет, 1 кг вӧй - 200 манет, 250 г кузятэм - 25 манет, - вера цехен кивалтӥсь Нафиса Валинурова
Цехлэн висъетъёсаз лыктыса йӧллэн магазинэ вуытозь ортчоно сюресэныз тодматскисько. Йӧлэз фермаысь вайыса охладитель пыр цехе лэзё. Бӧрысь пастеризовать карыса, фасовкае вуэм йӧлэз нимаз пакетъёсы тыро но холодильникъёсы интыяло. Вазь ӵукна дась йӧлзэс вузаны нуо. Нош кинъёс меда со бордын тыршо? Та нуналъёсы цехын 10 ужасьёс лыдъясько. ӟеч вуз дасян но сое калыке вуттон сярысь сюлмасько валтӥсь технолог Рафида Шаемова, лаборант Дамира Кашапова, фасовщик Фрина Гараева, механикъёс Ильнар Рахимов, Ильгиз Мардамшин, охранникъёс Инзиль Иксанов но Ильхам Мухаметшин, экспедитор Рая Пайрамова но водитель Георгий Куснияров.
Ужасьёслэн верамзыя, дась йӧлзэс басьтӥсьёс котьку тырмыт. Табере гуртысьёс но тросэз пудо-живот утёнлэсь палэнско уга. Азьвыл гуртын улӥсьёс скал вордыны ӧз быгатэ ке, гуртоосынызы серекъямын луо вал. Нош табере, оло, сыӵеослы паймисез ик ӧвӧл ни. Улон воштӥське…
Хозяйствоосын кивалтӥсьёс понна но табере йӧлзэс вузаны быгатон бадӟым «искусство» луэ. Нош «АгроМ» ООО-ысь ужасьёс ас сяменызы секыт югдурысь потыны тыршо, хозяйствозылэсь йӧлзэ калыклы асьсэлэн цехазы дасяса вутто.
Ирина САМИГУЛОВА.
Янаул ёрос.
Оставить сообщение: