icon_gotop
18+
autorisation
Войти | Регистрация
Время в Татышле
19:45
Вторник, 3 Августа
Рекламный баннер 990x90px top

Мон – удмурт. Удмурт кылэн данъяськисько

2014-02-20

Пӧртэм выжыосысь потэмын

Башкортостанын улӥсьёс славян, тюрк но финн-угор выжыосысь потэмын. Калыкез лыдъян-чотанын 1432906 адями вордскем кылзэ ӟучен пусйиз. Нош башкиръёслэн лыдзы 1172287-лы ӵошаз. Финн-угор калыкъёс пӧлын азьпала потӥзы поръёс. Республикая­мы соослэн лыдзы 103688-лы вуэ. Уд­муртъёс шӧдскымон ӧжытгес – 21477. Соос пӧлын анай кылынызы вераськы­ны-гожъяськыны быгатӥсьтэмъёсыз но вань. Та ласянь туннэ асьмеды гинэ тышкаськоно ӧвӧл, луоз, уго берло аръёсы котькуд калык таӵе воштӥськонъёсты шӧдэ. Но озьы ке но пӧлазы шедё на ӟучъёс, бигеръёс пӧлын ужаса яке улыса, анай кылзэс утисьёс, со понна «висисьёс».

Шумпотоно яке куректоно?

Ермекей ёросын, Кушнаренко ёро­сын сямен ик, одӥг гинэ удмурт гурт лыдъяське. Озьы ке но Купченеевоысь пиналъёс удмурт сямен чебер но во­льыт верасько. Нылпи садэ ветлӥсь пичыльтыкъёс но та ласянь ушъяськы­ны быгато. Анай кылзэс волятонын со­ослы БР-ысь удмуртъёслэн НКЦ-енызы кузьмам книгаос но бадӟым юрттэт возьматозы. Школаын дышетскисьёс но, оло, отысь трос пайдаёзэ шедьтозы. Уго татысь дышетскон юрт, школалэн директорезлэн Г. Д. Никитинлэн вера­мезъя, удмурт кылъя но литературая узыр библиотекаеныз уг висъяськы. Нош школаын дышетскись 43 пиналлэн котькудӥз анай кыл предметъя уд­муртэз быръе. Соос дышетӥсьсэс Г. А. Антоноваез пӧртэм вормонъёсынызы шумпотто. Куке но укмысэтӥ классэз йылпумъясьёс удмурт кылъя диктант но гожъяллям. Туэ но ГИА сётыны мылкыд карисьёс вань. Таяз дышет­скон арын со вӧзы мукетыз шумпотон но ватсаськиз: Ксения Константинова та предметъя нырысьсэ республика олимпиадае пыриськиз. Вормисьёс пӧлы ӧз ке но шедьы, анай кылыныз данъяськон мылкыдзэ возьматыны быгатӥз. Нош ӟуч кылъя ёрос олим­пиадаын Ксения вормись луиз. Та предметъя 4-тӥ классын дышетскись Юлия Пургина но ёросазы котькин­лэсь мур тодон-валанзэ возьматӥз. Озьыен, татын ӟучсэ но гажало, уд­муртсэ но дышето.

Туннэ республикаысь дышетскон юртъёсын тодон-валан куать кылъ­ёсын сёто: башкир, бигер, ӟуч, пор, удмурт но чуваш. Башкортостанысь Дышетонъя министерстволэн лыд­пусъёсызъя, республикаын 7 шко­лаосын но 12 филиалъёсын удмурт кылын дышетско. Зэм, со ӵемысь покчи классъёсын гинэ кутӥське. Озьы ке но троссэ предметъёсты ӟуч кылын сёто. Ёросъёсысь дышетонъя ёзэтъёсын сое книгаос луымтэен герӟало. Татыш­лы ёросын, кылсярысь, таӵе дышетскон юртъёс пӧлы одӥг шор ёзо школаез, ку­инь филиалъёсты пырто. Отын быдэсак удмурт нылпиос тодон-валан басьто.

Башкортостанысь школаосын огъя 11 пӧртэм анай кылъёсъя дышетон радъямын. Куд-огаз дышетскон юр­тъёсын огӵош кык яке солэсь тросгес анай кылъёсъя урокъёс ортчо. Куд­дыр со оптимизацилэн пытьыосыныз герӟаськемын. Удмурт кылэз предмет интыын дышетон 2011-2012-тӥ дышет­скон аръёсы 28 школаосын но 19 фили­алъёсын радъямын вал. Кушнаренко ёросысь Ахметово гуртын удмурт кылэз Канлыысь 13 пиналъёс дышето. Гуртысьтызы школазэс йылпумъямзы бере, отчы 19 нылпиос вамыштӥзы. Уд­мурт кылэз Т. Г. Сайфутдинова дышетэ. Бускель гуртысьтызы школаысь куинь дышетӥсьёс уж шедьтӥзы. Нош Канлые дышетскон юрт интые медпункт но библиотека усьтӥзы. Со понна но ка­лык туж шумпотэ, юртэз быдэсак, пе, ӧз пытсалэ.

Татышлы ёросысь Арибаш школа­ын но пӧртэм анай кылъёсты дышето. Удмурт пиналъёслы но та ласяньпаськыт луонлыкъёс кылдытэмын. Но ӟучомыны кутскем пиналъёслы удмурт кылъя но литературая урокъёс секытэн сётӥсько. Соос пӧлысь куд-огезлэн, оло, сое дышетыны мылкыдыз ик ӧвӧл. Та­тын уго ӟуч кыл паськытгес вӧлмемын. Тросэз нылпиос эшъёсынызы но, анай-атаенызы но ӟуч сямен верасько. Нош Свердловск улосвылысь удмуртъёс, кылсярысь, берло аръёсы анай кылзы­лэсь данзэ ӝутыны тыршо. Вордскем палъёслэсь кыдёкын улыса, солэсь кулэлыксэ юнгес шӧдӥське, лэся. Озьы вить ар талэсь азьвыл Вылысь Пышмаын удмурт кылэз дышетонъя «Ваёбыж» класс усьтӥськиз. Туннэ отын 10 ныл­пиос тодон-валан басьто. Соос пӧлысь ньылезлэн выжыосыз Удмурт Эльку­нысь потэмын, мукетъёсызлэн – асьме палъёсысь. «Городын ке но уло, удмурт кылзэс вунэтыны уг тыршо», - шуэ со пу­мысен «Эгес» огазеяськонэн кивалтӥсь Марина Ягуткина. Со сяна, Марина Шарифьяновна ватса на: «Школаосын тодмо адямиосын, соослэн быдэстэм ужъёсынызы тодматскон сэрегъёс но усьтыны луысал, со нылпиосмылэсь анай кылзэс дышетыны мылкыдзэс бурдъясал».

Австриын но, пе, удмуртэз дышетӥсьёс трос. Нош Парижын кы­лем арын удмурт кылын конференция ортчем. Отчы трос калык люкась­кем удмуртъёсты адӟыны но соосты кылзыны. Тодосчилэн Татьяна Мин­нияхметовалэн верамезъя, кунгож сьӧрын калык шоры таӵе синмын учкон вӧлмемын: аслэсьтыд анай кылдэ ке ӧд тоды, мукетсэ но тодыны-дышыны уд быгаты, ӟеч ужась но уд луы…

Татьяна Гильнияхметовна Бурай ёросысь Байшады гуртын будӥз. Пи­чиысен удмурт кылын вераськиз. Нош улон сюрес тодосчиез Австрие вуттӥз. Туннэ со 16 пӧртэм кылъёсты тодэ. ӟуч, удмурт, бигер, башкир, венгер, фин, чуваш, англи, француз, немец, турок, пор... Нош гожъямъёсты 25 кылысь берыктӥз ни. Аслэсьтыз кылзэ тодыса будэм мурт, тодосчилэн верамезъя, мукет кылъёсты но трослы капчиен­гес дышыны быгатэ.

Ольга НИГАМАТУЛЛИНА.

3206

Оставить сообщение:

НАШИ ПАРТНЕРЫ