Та ужрадэз Екатеринбурглэн администрациез но «Арт-Этюд» гимназилэн кивалтӥсьёсыз ортчытӥзы. Праздник пӧртэм калыкъёслэн культураоссылы сӥземын вал. Удмурт лулчеберетэз возьматон 7-тӥ «В» класслы шедем. Соин классэнызы кивалтӥсьсы Светлана Леонтьева милемлы юрттэт курыса вазиськиз. Ми та уж борды мылысь-кыдысь басьтӥськимы, гимназиысь дышетскисьёслы удмурт эктон дасяны юрттӥмы. Отчы «Азвесь гур» фольклор ансамбльысь егит кырӟась- эктӥсьёсмы но пыриськизы - адӟисьёслы удмурт кырӟан кузьмазы. Со сяна, ми «Удмурт корка» возьматонэ пыриськимы.
Шумпотыса вераммы потэ, 7-тӥ «В» класс вожвылъяськонын кыкетӥ интые потӥз. Та вормонын, пичи ке но, милям но юрттэтмы вань. «Азвесь гурлы» ужрадэ пыриськемез понна, диплом но синпель кузьым сётӥзы.
Берло дыре, шор ёзо школаосын, гимназиосын таӵе ужрадъёс ӵемысь ортчыло. «Эгес» огазеяськон но отчы котькудаз сямен пыриськылэ. Нош праздникъёс бере тросэз шуныт кылъёс верало, удмурт огазеяськонэн ӵош ужрадъёс ортчытыны мылкыд каремзэс верало.
Гимназиысь пиналъёсты удмурт эктонэнызы «Выжы кыл» фестивалямы ӧтимы. Со таиз арысь оштолэзе ортчоз.
Марина ЯГУТКИНА,
«Эгес» удмурт калык огазеяськонлэн тӧроез.
Оставить сообщение: