icon_gotop
18+
autorisation
Войти | Регистрация
Время в Татышле
16:29
Четверг, 28 Октября
Рекламный баннер 990x90px top

Ӟеч ужа - умой шутэтскы

2014-01-30

Вязовкаысь ужбергатӥсь

Татышлы ёросысь Вязовка гуртын улӥсь Динар Миннигалиевич Биктимиров сярысь газетмылэн бамъёсаз одӥг пол гинэ ӧм гожъялэ ни. Таиз тодматонмы «Косая степь» выль ужезлы сӥземын луоз. Пӧртэм ужъёсты бергатыны быгатӥсь ужбергатӥсьлэн йыраз котьку трос малпанъёс «пӧзё». Шутэтскон база усьтон сярысь малпанэн со вить арлы матэ «висем». Ваньмыз, пе, Вязовка гуртсылы ма­тысь ӵыпетэз аслыз басьтэм дырысен кутскиз. ӵыпетэ чорыгъёсты лэзьыса, кузё кариськыса ужаны кутскемез бере, сюлэмаз шугъяськон каръяськылэм: уз шеде меда татысь чебер интыослы синмаськисьёс? Шутэтскыны, вуын пыласькыны, чорыганы вуисьёс котьку трос. Нош чебер интые шутэтскон база ке усьтӥзы? Динар Миннигалиевич трос пол вуоно базаезлэсь туссэ син азяз пуктылэм. Со вакытэ валам: котырысь чебер интыосыз мукетъёслы сётоно ӧвӧл, уж борды но ӝегатскытэк кутсконо. Ортчем арлэн инвожо толэзяз ужбергатӥсь ӝутӥськон ужъёссэ кутске. ӝыны ар но уг ортчы, азьвыл бусы луэм буш интые чебер шутэтскон сэрег кылдэ. Нимыз ласянь ке, та кырез вашкала дырысен ни «Косая степь» шуо вылэм.

- Шутэтскон сэреглы но таӵе ним тупалоз, - малпаз ужбергатӥсь. Кылем арысь толсур толэзьлэн берпуметӥ нуналъёсаз, Выль арез пумитан азьын, «Косая степь» нырысетӥ шутэтскисьёссэ пумитаз.

«Косая степь»

Ӝужытэсь пужымъёс пӧлтӥ бызись сюрес кузя тӥ шутэтскон сэреге вуоды. Комаров нимо нылпи лагерьлэсь ортчыса гурезь выллане вуиды ке, нёжало интые пуксем «Косая степь» база соку ик син шорады усьтӥськоз. Радэн сылӥсь пулэсь ӝутэм юртъёс но котыраз интыяськем мунчоос шоры учкыса, мылкыд ӝутске. Выль коттеджъёс ческыт пу зынэн тырмемын, базалэн котыраз инкуазьлэн йырез поромытӥсь кужымез шӧдӥське. Гурезь уллань нискыланы тюбингъёс дасямын, нош ыркыт тӧлэз шӧдыса ворттылыны яратӥсьёс понна - снегоходъёс. Нискыла, кӧня нискыламед потэ, ворттылы, кӧня мылкыдыд куре. Куасэн ветлыны мылкыдыд ке вань, куасъёс ӵектозы. Нош ворттылыса жадем мугордэ шутэтскыны ӧтьыса, мунчоысь потӥсь ӵын зын писпуос вылтӥкотыре лӧсъяське. Асьсэды ческыт сиёнэн шумпоттыны яратӥсьёс шашлык пӧраны малпазы ке, котькуд юрт вӧзы мангалъёсын но гуръёсын беседкаос пуктэмын. Пӧраськыны мылкыдзы луымтэос но сютэм уз кошке: татысь пӧзьтӥськисьёс пӧртэм сиёнъёсын кунояны котьку дась. Шутэтскыны вуылэм сяна, мылкыд карисьёс базаын пӧртэм ужрадъёссэс, юбилейёссэс, сюанзэс ортчытыны быгатозы.Татын 150 адямилы чаклам залэн пайдаяськыны луонлык вань. Малпасько, мон тӥледлы котькӧня мед мадё, гожтэмелы, оло, уд но оске. Юнме верамтэ ук калык: сю пол кылытозь, одӥг пол ас синмыныд адӟоно.

Малпанъёс

Котькуд выль уж, нырысетӥ вамыш синэз гочатэ, пӧртэм вераськонъёс, пӧртэм малпанъёс кылдытэ. Ӟечез бордысь уродзэ утчасьёс но тырмыт. Нош «Косая степьлэн» кузёез оске: выль ужез ас ӧраз пырыса, умой азинскыны быгатоз. Городъёсысь вуэм калык сяна, гуртын улӥсьёс но инкуазьлэн одӥгаз шулдыр сэрегаз шутэтскыны вуылозы. Базалэсь ужзэ паськытатон, калыклы пуштросо но каньыл шутэтскыны луонлыкъёс кылдытон понна азьланяз трос ужано луоз на. Шуом, тюбинген нискыласьёс подъёмникъёсын тубалозы. Нош мылкыд карисьёслы азьланяз массаж лэсьтон сярысь но малпаськозы. Огъя вераса, азьлане учкыны дышем ужбергатӥсь йыраз пӧртэм малпанъёссэ бергатэ. Вакчи дыр куспын ӝутӥськон ужъёсты лэсьтэм, малпанъёссэ улонэ пыӵатыны юрттэм котькуд ужасезлы со пумтэм тау карон кылъёссэ вера. Туннэ нуналэ базаысь ужасьёсыз Вилияна но Герман Биктимировъёс, Олеся Габдулхакова, Алита Гили­мьянова, Владимир Туктамышев нырысетӥ вамышъёссэ лэсьтыны, база котырысь ужъёссэ нуыны юртто.

Арлэн котькуд вакытаз шутэтскон сэрег уз чалмылы, малы ке шуоно гужем ӵыпетын чорыганы, вуын пыласькыны луоз, мылкыд карисьёс катамаранэн, лод­каосын уяны быгатозы.Туала рынокын агротуризм, социальной туризм кадь выль валатонъёс улонэ паськыт вӧлмо бере, Татышлы палъёс но табере та валатонъёслэсь огпала уз кыле.

- Сюлмысь ужаны быгатӥсь калыклэн ӟеч шутэтскон интыосыз но ваньмон дырыз одно луыны кулэ, дунне вылын уго котькудмы одӥг пол гинэ улӥськомы, - лыдъя Динар Миннигалиевич. Ас азяз пуктэм ужпумъёссэ со дӥсьтыса но сэзь кутске, йылаз-пумаз вуттон сярысь сюлмаське. Солэн малпамезъя, шампанскоез дӥсьтӥсьёс гинэ юо.

Ирина

САМИГУЛОВА.

Татышлы ёрос.

2430

Оставить сообщение:

НАШИ ПАРТНЕРЫ