- Айвар, военной луон сярысь малпанэд ку кылдӥз?
- Нырысь мон Суворовской училищее дышетскыны пырыны малпасько вал. Тямысэтӥ классэз йылпумъяса, Ишимбай городысь кадет корпусэ дышетскыны пыри. Отысен - военно-морской академиын дышетсконме азьланьтон сярысь малпанъёсы кылдӥзы. Атае но куке сыӵе малпанэн улэм, нош улонэз сое мукет ӧре кыскем, со машинаосты тупатъян ужъёсын выре. Малпасько, атаелэсь мылкыданъёссэ мон быдэстыны быгато.
- Дышетскыны пырон понна, кыӵе экзаменъёс пыр потоно луид?
- Котькытын сямен, ЕГЭ баллъёсты эскеризы. Физикая, математикая, ӟуч кылъя баллъёс вылӥын луыны кулэ вал. Собере 100 метре (ӝоглыкез возьматӥсь показатель) но 3 иськеме бызьылонъя (чиданлыкез возьматӥсь показатель) лыдпусъёсты эскеризы. Со сяна, ӝуткаськыса но вуын уяса нормативъёсты быдэстыны быгатоно на. Экзаменъёс сётъямлэсь одӥг ар азьвыл, медициная эскеронъёсты ортчыны кутсконо, малы ке шуоно военной луыны малпась егит адямилэн тазалыкез котыр ласянь юн луыны кулэ.
- Малпасько, академие пырон тыныд секытэн ӧз сётскы, дыр. Кадет луэмед юрттӥз, луоз? Академие котькуд мылкыд карись адями пырыны быгатоз-а?
- Академиын, экзаменъёссэ ӟеч ортчыса, вылӥ баллъёс люкам котькуд егит адями дышетскыны быгатоз. Нош ас сярысьтым ке верано, мыным кадет корпусын дышетскеме тужгес юрттӥз. Отын мон трос тодон–валан басьтӥ, юн кариськыны, зэмос солдат луыны, котькыӵе секытлыкъёсты вормыны дышетски. Азьланяз со ваньмыз мыным юрттоз. Выль эшъёсы пӧлын но тросэз военной училищеосты йылпумъяса вуэмын.
- Дышетсконэд капчиосыз пӧлысь ӧвӧл, быръем удысэд сярысь жаляно уд луы-а?
- Зэм, дышетскон капчи шуыны уг луы. Быръем сюресэ сярысь мон ноку ӧй жаля, жаляно но уг луы. Дышетскыны туж кельше, аслэсьтым быръёнме валаса лэсьтӥ. Дышетсконме мон лейтенант званиен йылпумъяло.
- Дышетскон сяна, тон нош маин тунсыкъяськиськод?
- «Экипаж» вокально-инструментальной ансамбле пыриськисько. Кадет корпусын дышетскыку, тросэз эшъёсы гитараен шудо вал, мон но крезьгур дуннеен эшъяськи, кырӟаны, гитараен шудыны дышетски. Кылбуръёс но гожъясько, крезьгуръёс но дырын-дырын пӧрмыло.
- Тодӥсько, кематэк отпускед йылпумъяськоз. Ку нош дор палъёсад бертыны быгатод?
- Инвожо толэзе милям экзаменъёс кутскозы, собере выль военной корабльын практика ортчомы. Санкт-Петербург – Португалия рейсэн вуэтӥ походэ потомы. Ваньмыз умой луиз ке, ог ӝыны арскын берто.
- Айвар, школаез йылпумъясьёслы тон ма сӥзьысалыд?
- Ваньзэ умойзэ, мар малпазы, одно ик лэсьтыны мед тыршозы. Пиос военной ӧръя дышетскыны пырыны малпало ке, быръёнзэс валаса мед лэсьтозы. Вунэтоно ӧвӧл одӥгез сярысь: малпанэд мед быдэсмоз шуыса, нырысь аслыд трос тыршоно.
- Бадӟым тау вераськемед понна. Азьланяз но вань чебер малпанъёсыд мед быдэсмозы.
- Тау асьтэлы.
Ирина САМИГУЛОВА.
Оставить сообщение: