Вож кыз котырын шулдыръяськон

Киргаысь ветеранъёслэн кенешенызы кивалтӥсь Р. С. Менладшина милемлы вераз:

- Ми котькуд ар, Выль арез пусйыса, культура юртэ люкаськиськомы. Таӵе шулдыръяськонъёс 2000-тӥ арысен радъясько. Ог-огенымы пумиськыса мылкыд ӝутске, удмурт кырӟанъёс лулпушез бурдъяло. Вож кыз котырын пумиськонмы котьку сюлмысь но тодэ кыльымон луэ.

Пенсиысь дышетӥсь А. Г. Армагинова вераськонмес азьланьтыса ватсаз на:

- Гуртмы милям бадӟым но туж шулдыр. Арлыдоос гурт улонэ котьку азинлыко пырисько. Кӧня ке аръёс ӵоже ини арлыдоослэн «Уӵы» фольклор коллективзы ужа. Туннэ но тани тросэз коллективе ветлӥсьёс татчы лыктэмын. Ческыт пӧрамъёсмес вайыса, ӵошен чай юиськомы, шулдыръяськиськомы. Огъя улыны капчи, огъёзо эшъёсмес адӟыса, сюлэмын шуныт луэ.

Пумиськон кема кыстӥськиз. Люкаськемъёс доры Тол бабаен Лымы ныл вуизы. Выль ар пияш но ужрадэ вуэмъёсты ӟечкыланы вуиз. Удмурт гуръёс удмурт эктонъёсын герӟаськыса, пӧртэм шудонъёсын огазе «пӧлэстӥськизы». Тол куазез, выль арез данъяса, арлыдоос кема эктӥзы-кырӟазы. Одӥгез гинэ соосты та нуналэ сюлмаськытӥз: гуртазы арганчизы, пе, ӧвӧл.

- Оло, палэнысь арганчиос гуртамы ужаны лыктыны мылкыд карозы? – веразы соос.

Ирина ХУЗИАХМЕТОВА.