Школаямы нянез данъямы

Шуркынмон толэзьлэн пумаз гурт хозяйствоын ужа­сьёсты ӟечкылало, ар ӵоже быдэстэм ужъёссылы йыл­пумъян лэсьто. Шаертодонъя «Малютки» огазеяськонэн ортчытэм ужрад гуртысьтымы З. М. Рияновалы висъяськон пус сётонэн тупаз. Школа­ысьтымы егит шаерчиослэн «Слава сельскому труду» проектсылы презентация возьматон Зоя Минкаиров­наез ӟечкыласа кутскиз. Пи­налъёс проектэз дасян бор­дын туж кема ужазы, соин ик презентациын кутӥськем туспуктэмъёслы, суредъёслы, видеосюжетъёслы нимаса возьматон лэсьтэмын вал. Пи­налъёс крестьян калыклэсь бусыын тыршыса ужамзэ, ин­марлы тау карыса вазиськем­зэ, бусы ужъёсты йылпумъяса сӥзьыл шулдыръяськонъёсты ортчытэмзэ ӟеч возьматыны быгатӥзы. Удмуртъёслэсь вашкала дырысен кутӥськись сям-йылолъёссэс пыр-поч эскеризы. Ужрадэ пырись­кем куноос, пиналъёслэн анай-атайёссы бусы ужъёслэн йылпумъяськонзылы сӥзем «Виль» праздник сярысь но тодазы вайизы.

- Али дыре та выллем йылолъёс каллен вуныса ке но мыно, удмурт калык туала нуналын но бусылы, инмарлы тау карыса вазиськыны тырше на, – шуиз ужрадэ ӧтем дано куномы, гуртомы А. Г. Зиды­мышев. Азьвыл Алексей Гай­нанович «Дэмен» колхозын агроном луыса ужам.

Быдэс ужрад нянез, гурт хозяйствоын ужасьёслэсь секыт но адӟем карымон уж­зэс данъян мылкыдын тыр­мемын вал. Ужрадын шко­лаысь опытной участокын ӟеч тыршем пиналъёсты но пусйимы. Соос пӧлын Карина Зайнокова но Лиана Садиева луизы. Ужрадэз пичи шаер­чиос азьланьтӥзы. Нылпи­ос анай-атайёсынызы ӵошен мадиськонъёсты тодылӥзы, шаертодонъя пӧртэм быга­тонлыкъёссэс возьматӥзы. Кырӟанъёс, мадиськонъёс, визькылъёс но пӧртэм шу­донъёс пыр ужрадэ люкась­кемъёс ю тысен кутскыса ӝӧк вылэ вуэм нянь колды­лэсь сюрессэ возьматӥзы. Ужрадлы йылпумъян луиз Андрей Гильмаевлэн кылъ­ёсызъя но Виталий Самигу­ловлэн крезьгурезъя «Нянь» кырӟан. Ужрадлэн нырысетӥ люкетэз «Хлеб всему голова» видеоклипез возьматонэн йылпумъяськиз. Нош кыкетӥ люкетэз школаысь столо­войын «Удмуртские блюда из нового урожая» ужрадэн азьланьтӥськиз. Ужрадэ кы­дёкысь Венгриысь вуэм куно, Печ университетысь аспирант но этнограф Богларка Мачаи пыриськиз. Со пиналъёсмылэн ужзылы вылӥ дунъет сётӥз.

Анита ЗИДЫМЫШЕВА.

Татышлы ёросысь Ураз­гильды гурт.