icon_gotop
18+
autorisation
Войти | Регистрация
Время в Татышле
11:31
Sunday, 17 Октября
Рекламный баннер 990x90px top

Тэльын вордскиз, будӥз вож кыз…

2013-12-19

Пичи дыр – вунонтэм шудо вакыт, куке Выль ар­лэсь маке тунсыкозэ витись­код. Соин ик анай-атайёс пи­чильтыкъёссэс шумпоттыны дырто. Нырысь ик доре кыз пуктон сярысь малпаськыны кутско. Кызьы, пе, арлэсь валтӥсь праздниксэ кызтэк пумиталод? Уго лысо чебе­рай каньыл но кема улонлэн тодметэныз (символэныз) лыдъяське. Со сяна, кызлэн кыӵе ке но вылӥ кужымез вань кадь. Кезьыт тол куазе соин ӵош юртэ шуныт, югыт пыре.

Туннэ нуналэ кыз шедь­тонэз секыт ӧвӧл: котькуд вуз карон юртэ пыр – вож апайёс синъёсты гочатыса выллем сыло, пӧлазы «лу­лоосыз» но пумисько. Нош дунъёссы – куртчылӥсько. БР-ысь Нюлэс хозяйствоя министерствоын ивортэм­зыя, кызлэн оптовой дуныз 250 манетлы ӵоша, пужымлэн – 210 манетлы, ньылпулэн – 300 манетлы. Пусйыны кулэ, магазинъёсын та лыдпусъёс «тэтчыны» быгато на. Соин, вылды, тросэз, инкуазез утён сярысь малпаськытэк но, тӥр кутыса нюлэскы дырто. Кинлы ке но удалтэ, дыр. Но тросэз «Ёлочка» операция улсын нюлэскын калгисьёс­лы но шедё.

Арлы быдэ республи­каын, нюлэс узырлыкез быдтӥсьёсын сэрен, сюрсэн-сюрсэн лысо писпуос быро. Инкуазь понна со бадӟым ыштон. Со муген ик «Ёлочка» кылдытэмын. Та операция, Минлесхозлэн но МВД-лэн кичӧлтэмез улсын, 15 арлэсь ятыр ужа ни.

Нош мар-о вите тэльын кыз корасьёсты?

Штрафлэн быдӟалаез 3-3,5 сюрслы ӵоша. Кивалтӥсьёс понна со трослы вылӥын луэ: 20-30 сюрс манет. Нош юри­дической лицоос лысо писпу­эз корамзы понна 50-100 сюрс манетэнызы люкиськоно лу­озы. Со сяна, законэз тӥясьёс инкуазьлы лэсьтэм изъянзэс коньдонэн берыктозы на. Со­лэн быдӟалаез 5 сюрс манет­лэсь ятыр ке, писпу корасьлы пумит уголовной уж усьтэ­мын луоз. Лушкаськись тэле кыӵе ке ужан тӥрлыкен ке вуэм, эскерисьёс сое но тала­лозы. Озьыен, выль арез умой мылкыдын пумитан вылысь, кызэз вузкарон интыосысь басьтыса умойгес луоз.

Али дыре Башкортоста­нын кызъёсты дасян ужъёс азинско ни. Туэ республика­ын огъя 220 сюрслы матэ пи­спу дасяны чакламын. Туннэ нуналэ 5 сюрслы матэ кыз, 48 сюрс пужым но 14 сюрс ньылпу вузкарон юртъёсы вуттэмын ни. БР-ысь Нюлэс хозяйствоя министерство­ын верамзыя, Выль аре пи­спуосты нимысьтыз чаклам интыосысь корало. Со сяна, писпуосты празднике питом­никъёсын но будэто.

Тунсыко, асьме шаерын гинэ меда Выль ар азьын нюлэскын лушкаськисьёс йыло? Кыл кутытон сяна, соосын мукет нюръяськон амалъёс пумисько-а? Та юанъёслы валэктон утчаса, интернетэтӥ калги. Таӵе гожтэм син шоры йӧтӥз: «Рож­дество вуэмен, Чехиысь ню­лэсъёсы лушкаськисьёс вуо: калык нокыӵе кариськытэк кызъёсты, пужымъёсты ко­ран ужъёс борды басьтӥське. Кылем арын та муген 50 сюрслэсь ятыр лысо писпуос быдтэмын вал». Бӧрысь гож­тэмез лыдӟыса тодӥсько, вить ар ӵоже ини Чехиысь Выль Йичина ёросысь лес­никъёс, законэз тӥясьёсын нюръяськон вылысь, нюлэ­скысь писпуосты нимысьтыз суретъёсын, пе, пазяло. Кема дыр но уг ортчы, корка тыр нырез «вандӥсь» зын, пе, вӧлме.

Йичинысь лесникъёслэн малпам амалзы юнме луымтэ: лушкаськисьёс чиптэм-чап­тэм ышиллям. Оло, асьмелы но со выллем суретъёсын пайдаяськыны кутсконо?

Миляуша БУЛАТОВА.

2318

Оставить сообщение:

НАШИ ПАРТНЕРЫ