Уж шоры кузё синмын учконо

Вылысь Татышлыын пре­зидент нырысь «МегаБит» ООО-е вуылӥз. Берло аръёсы татын полистиролбетонной блокъёс, кортлэсь пӧртэм ар­бериос дасян бордын бадӟым ужъёс нуисько. Со сяна, соос туннэ вить улон юртъёс, вуз карон центр ӝуто. Пӧртэм проектъёсты быдэстонлы предприятие ар кутсконысен 17 миллион манет коньдонзэ висъяз. «МегаБит» ООО-ын, кивалтӥсезлэн Камиль Иба­туллинлэн верамезъя, 115 адями тырше. Ужасьёс толэ­зяз шор лыдын 19 сюрс манет уждун басьто, нош сварщикъ­ёс – 23 сюрс манет.

Ужбергатӥсьлэн Равис Дельмухаметовлэн но ужъё­сыз ӟеч азинско. Со 70 адями­ез ужен тырмытэм. Соослэн уждунзылэн шор быдӟалаез 24 сюрслы ӵоша. Ужбергатӥсь ӝутӥськон арбериос, кылся­рысь, пеноблокъёс, профна­стил лэсьтон бордын тырше.

Рустэм Закиевич та ну­налэ «Радуга» нылпи садэ, пӧртэм вуз карон юртъёсы кожылӥз. Кылсярысь, сиён-юонэн вуз карись одӥгаз супермаркетын со республи­каын поттэм минерал вуосын, сыръёсын но колбасаосын тунсыкъяськиз. Нош супер­маркет та ласянь узырлы­кеныз ӧз шумпотты – тросэз вузъёс палэнысь вуттэмын.

Детско-юношеской спор­тивной школаын но Прези­дентэз шумпотымон югдур ӧз витьы. 1957-тӥ арын пулэсь ӝутэм юрт туала улонлэн  куронъёсызлы уг тупа ни. Озьы ке но татын спортлэн 11 видъёсыз паськыт вӧлмемын. Соин президент ёрос адми­нистрациез ДЮСШ-лы выль юрт ӝутыны проект дасяны куриз. Нош спортъя комите­тэн кивалтӥсен вераськонын азьланяз капчи атлетика­ез азинтон сярысь кылпум ӝутӥз:

- Капчи атлетикае трос­гес адямиосты кысконо. Хок­кейын экипировка туж дуно сылэ, нош капчи атлетика ваньмызлы вормымон.

Татышлы ёросысь улӥсьёсты тазалыко улонэн эшъяськыны «Планета спорт» физкультурно-оздоровитель­ной комплекс но юрттоз. Отын тренажерной залэз, йӧ площадкаез, теннисной кор­тэз, бассейнэз вань. Туннэ республикаысь котькудӥз сямен ёрос центр та выллем бассейнэн данъяськыны бы­гатэ. Соослы арлы быдэ 300 миллион манет тыр коньдон висъяське. Соин БР-лэн Пре­зидентэз та лыдпусэз кулэстон  сярысь сюлмаськыны куриз.

Балтач ёросысь Вуж Бал­тачын Президент Р. З. Хами­тов «Южный» микрорайонэ вуылӥз. Со «Развитие сель­ского хозяйства и регулиро­вания рынков сельскохозяй­ственной продукции, сырья и продольствия на 2008-2012 годы» кун программаез бы­дэстон улсын ӝутӥськиз. Татын 70 интылы нылпи сад, 90 интылы покчиёзо школа, фельдшерско-акушерской пункт, инженерной система­осъя комплекс пуктэмын.

Президент школаысь спортивной залэн, компью­терной, лингафонной клас­съёсын, кабинетъёсын тод­матскиз. Дышетӥсьёслэн верамзыя, соос нылпиосты бордазы кыско. Соин пиналъ­ёс котькуд уроке шумпотыса ветло. Озьы ке но президент интернетлэсь ӝоглыксэ бу­дэтыны кулэлыкез пусйиз.

Рустэм Хамитов нылпи садэ но вуылӥз. Нош ужзэ со физкультурно-оздоровитель­ной комплекс ӝутон инты­ын йылпумъяз. Та проектэз быдэстыны 96 млн манет коньдон кулэ луоз. ФОК-лэн быдӟалаез 4,5 сюрс квадрат метрлы ӵошалоз.

Ольга НИГАМАТУЛЛИНА.