Вемеын трос ӟазег ишкизы

Бурдоосты вандон борды вазь ӵукна ик кутскизы. Нош соосты ишконэз вӧзысьтызы культура юртын радъязы. Рида апайлы та ласянь юрттӥськыны трос нылкышноос люкаськизы. Соин, вылды, ужзы бадӟым шулдыръяськонлы пӧрмиз. Культура юртын пӧртэм калык кырӟан гуръёс, серемес чуръёс чузъяськизы. Озьы ужзы но каньылгес радъ­яськиз кадь. «Вемее 20-лэсь трос адями вуэмын. Соос пӧлысь 18-эз ӟазег ишке. Татын котькинлы уж шеде», - маде Рида апай.

ӟазегъёсты ишкыса быдтэмзы бере, Рида апай ваньзэс доразы ӧтиз. ӵушкам бурдоосты Гарейка шур дуре миськыны васькемлэсь азьвыл пӧсь табанен чай, пе, юомы. Та вакытэ кузёос сярысь трос шуныт кылъёсын вазиськиз Ямады гурт поселенилэн администрациеныз кивалтӥсь Гузалия Талипова. «Хасфатуллинъёс ньылетӥ ползэ ни таӵе веме радъяло. Берпуметӥзэ 2006- тӥарын пумиськылӥмы вал. Соослэн бурдооссылэн лыдзы арысь аре йылэ, кожалод», - малпанъёссэ вера со. БР-ысь удмуртъёслэн национально-культурной центренызы кивалтӥсьлэн Янаул ёросъя воштӥсез Ю. С. Саитов но соосты бадӟым уженызы ӟечкыланы дыртӥз. «Ӟазегмы сиыны но, вузаны но тырмоз», - шумпотонэныз люкиськиз соку Рида апай.

Веме шур дурын йылпумъяськиз. Кема чузъяськизы на отын кырӟан куараос. Нылкышноос бигер, ӟуч, удмурт гуръёсты кисьтӥзы. Ужрад уго пӧртэм калыкъёсты огазеяз. Нош ӝытазе кузёос соосты ческыт ӝукен, ӟазег сӥлен куноязы.

Ольга НИГАМАТУЛЛИНА.