Шунды нылпиосты люказ «Рыжий ЭтноФест»

Куамынэтӥ шуркынмон толэзе Татышлы ёросысь Выль Татышлы культура юртэ ёросысь трос калык люкаськиз. Культура юрт котырысь, фойеысь но залысь горд йырсиен нылъёсты но пиосты, апайёсты но агайёсты, песянай-песятайёсты трос пумитаны луиз. Малы ке шуоно татын «Рыжий ЭтноФест» ортчиз. Удмурт шаерын, пе, «Рыжий фестиваль» 2004-тӥ арысен ортчытӥське ни. Нош 2010-тӥ арын со «Семь чудес света финно-угорского мира» куара сётонын (голосованиын) «Праздники» номинациын вормись луэм. Нош Скандинавиысь одӥгаз шаерын улӥсь горд йырсиё адямиос асьсэлэсь нуналзэс но, пе, пусъё. Озьыен, ваньмыз сярысь радызъя.

«КЛУБ’ok» XXI века

Республикаысь гуртъёсысь культура юртъёс пӧлын шуркынмон толэзьлэн кутсконаз «КЛУБ’ok» XXI  века республика конкурслэн кыкетӥ этапез йылпумъяськиз. Нырысетӥ этапаз 55 ёросъёсысь заявкаос сётэмын вал. Соос пӧлысь 23-ез гинэ кыкетӥ этапе пыриськыны луонлык басьтӥзы. Кыкетӥ этапе ортчыса, асьсэлэсь ужзэс возьматыны вуылӥз Выль Татышлы культура юртэн кивалтӥсь З. И. Фархутдинова но. Отын 20 слайдлэсь сылӥсь презентация возьма­тыны, 6 минут но 40 секунд дыр куспын культура юртлэн уженыз тодматыны кулэ вал. Презентация «Печа-куча» конкурс амалэн ортчиз. Дунъясьёс конкурсэ пыриськем 23 культура юртъёс пӧлысь 6-сэ гинэ куинетӥ туре бырйизы. Соос пӧлы Выль Татышлы гуртысь культура юрт но шедиз. Нош табере вылӥдунъясьёсты культура юртазы ӧтьыса, кыӵе ке но аспӧртэм ужрад, пе, ортчытоно. Выль татышлыос «Рыжий ЭтноФест» ортчытыны малпазы.

«Рыжий ЭтноФест»

Фестивалез кутскыса учкисьёсты пумитаз выжыкылысь лыктэм Пеппи (Ильнара Гайнуллина). Со вань горд йырсиен адямиосты ӟечкыласа, сцена вылэ «Та­тышлинский вестник» редакционно-издательской комплекслэсь директорзэ Р. Г. Гараеваез ӧтиз. Фестивалез усьтыса, Резида Галимовна шуиз:

- Туннэ, та ужрадэ лыктыку, мон Выль Татышлы культура юртын ужасьёслэсь вылӥ профессионализмен ужаны быгатэмзэс тодыса, ӟеч вормонъёссылы бадӟым осконэн лыктӥ. Малпасько, «Рыжий ЭтноФест» пайдаё но тунсыко ортчоз. Фестивалез усьтэмен ялӥсько.

Тани сцена вылэ шунды нылпиос пото. Татышлы ёросысь 75 гуртъёс пӧлын «Рыжее село» номинациын вормисен ялэмын Улысь Балтач гурт. Шунды нылзы Валерия Гайниярова соослэсь вормонзэс шулдыр кырӟанэн данъяз. Нош Калмияр гуртысь Фаина но Олег Байрамшинъёслэн семьязы «Рыжая семья» но Милена нылзы «Златовласка» номинациосын пусъемын. Со сяна, Резида Гараева «Рыжий интеллектуал», Иван Котельников «Рыжий гармонист», Рената Шаймухаметова «Рыжий скульптор» номинациосын пусъемын луизы.

Фестивальлэн программаез пӧртэм ласянь тунсыко но учкымон пӧрмиз. Пеппи программаез нуон висказ шудон-эктонъёс ортчытъяса учкисьёслэсь мылкыдзэс бурдъяз. Нош ёросысь тодмо кизилиос Алёна Тимерханова, Алик Кайранов, Марина Низамова шулдыр кырӟанъёссэс кузьмазы. Пермь шаерын культурая ин­ститутын дышетскись Иван Котельников арганэн задор гуръёссэ шудыса но кырӟаса учкисьёсты лӧпкытӥз. Программаез горд йырсиё адямиос сярысь дасям видео материалъёсын но презентациосын узырмытӥз Рустам Гарифуллин. Сцена вылэ интыяськем Шунды-анай (режиссёр-постановщик Зифина Фархутдинова) фестивалез ас ӧртӥз визьмо но усто нуыны быгатӥз. Огъя вераса «Рыжий ЭтноФест» усто пӧрмиз, татын нокин ӧз жадьы, котькуд учкись ас понназ горд йырсиё адямиос сярысь маке но выльзэ, паймымонзэ тодӥз. Нош ма меда вералозы вылӥ дунъясьёс? Соос пӧлын луизы БР-ысь Культурая мини­стерствоысь валтӥсь ӧнерчи, иворъёсъя но аналитической ужъёсъя ёзэтысь эксперт Ирина Владимировна Синебухова, БР-ысь Калык творчествоя республика центрлэн кивалтӥсезлэн воштӥсез Нафиса Булатовна Тулыбаева, татысь ик учебно-методической ужъёсъя ёзэтысь валтӥсь методист Гульнара Гиниятовна Усманова.

Фестивальлы йылпумъян лэсьтыса Ирина Владимировна шуиз:

- Куинетӥ этап - тужгес секыт этап. Малы ке шуоно отын кужмоос пӧлысь куж­моосыз культура юртъёс асьсэлэсь ужзэс возьматозы. Татышлы ёросын культура удыс кужмо азинске, татын трос учкымон коллективъёс, данъяськымон ужасьёс. Выль Татышлые лыктыку, мон Стерлитамакысь культурая училищеез горд дипло­мен йылпумъям дышетскисе Зифина Ильдусовна одно ик маин ке но паймытоз, учкымон ужрад дасяны быгатоз шуыса оски. Малпанэ быдэсмиз: «Рыжий ЭтноФест» усто пӧрмиз, студент луэм дырысеныз 8 ар ке но ортчемын ини, ужзылы мон «5+» пуктӥсько. Экзаменэз тӥ усто ортчиды!

Фестиваль йылпумъяськиз, азьпалан конкурслы быдэсак йылпумъян кыӵе меда луоз?

- Ӟеч иворъёсты оскыса возьмаськомы, - шуиз Татышлы ёросысь культура ёзэтэн кивалтӥсь Салим Гарифуллович Гарифуллин.

- Вормисьёс пӧлын милямъёс одно луозы, - ватсаз на ёрос Кенешлэн секретарез Радик Галимзянович Рахимов.

Ирина САМИГУЛОВА.