icon_gotop
18+
autorisation
Войти | Регистрация
Время в Татышле
03:52
Пятница, 29 Марта
Рекламный баннер 990x90px top

Пинал сюлэм шунытэз мед шӧдоз

14:47 28.11.2013

- Россия Федерациысь 83 субъектъёсын эскеронъёс ортчизы. Соос пӧлы Башкор­тостан Республика но шедиз, - вераз Павел Астахов. – Эскеронъёс куинь арлэсь трос кыстӥськизы. Вераны кулэ, нылпиослэсь эрикрадзэс утён ласянь ужъёс котькытын огвыллемгес азинтӥсько. Та удысын одӥгез пумысен тужгес сюлмаськоно: нылпи юртъёсын будӥсь пиналъёс пӧлын йыртэмасьёслэн лыдзы мед кулэсмоз.

Башкортостан Республи­каын, омбудсменлэн верамезъя, нылпи юртъёсысь пи­налъёслэн лыдзы кулэсме.

- Ар кутсконын регионын интернатъёсы трос нылпиос интыямын вал. Соослэн лыдзы 1,5 сюрсозь вуиз. Нош туннэ со 869-лы ӵоша. Тӥ понна та шумпотымон лыдпус, - малпа Нылпиослэн эрикрадзыя уполномоченной.

Павел Астахов пумиськонын РФ-лэн Президентэзлэн анай-атайтэк кылем нылпиослы юрттэт возьматон сярысь указэзлэн быдэстӥськем пумысен но кылпум ӝутӥз. Уго собере Башкортостанын но пӧртэм законъёс, указъёс кужмазы пыризы. Озьы республикаын анай-атайёсты нылпи басьтыны дасян бордын ужась 28 центръёс кылдытэмын. Соослэн ужзы шӧдскымон. Нылпи омбудсмен анай-атайтэк кылем нылпиосты улон юртъёсын тырмытон пумысен но ӟеч ужъёсты пусйиз.

- Вить ар талэсь азьвыл 5, 10, 20 квартира ке сётъямы, туэ нылпи юртъёсын будӥсь пиналъёслы 700 улон юрт висъямын, - лыдпусъёсын тодматӥз Павел Астахов.

Нылпи омбудсменэз пиналъёс пӧлы суицидлэн вӧлмемез но сюлмаськытэ.

- Кылем арын республикаын Клинической психотерапевтической центр кылдытэмын вал. Отын трос нылпиослы психологической юрттэт возьматӥськиз. Озьы ке но азьланяз солэсь ужзэ пась­кытатыны тыршоно, - вераз Павел Астаховлы республикамылэн Президентэз.

Рустэм Хамитовлэн малпамезъя, суицидлы пумит бадӟым ужъёс нуоно гурт ин­тыосын. Уго 28 кышкыт учыр пӧлысь 21-ез отын луэмын.

Павел Астахов, республи­каысьтымы ужъёссэ йыл­пумъяса, Правительствоын кенешон ортчытӥз. Нылпи омбудсменлэн верамезъя, эскеронъёс приютъёсын но со выллем юртъёсын ужасьёсты янгышъёссы понна кыл кутытон вылысь уг радъясько. Соос кивалтӥсьёслы юрттэт возьматыны кулэ. Кылсярысь, нылпи омбудсмен «Маячный» нылпи юртысь бадӟым янгышъёс пумысен вераз. Татын 15 арес пилэсь кык висъетэн квартиразэ толэзяз 300 манетэн арендае сётӥллям. Нош коньдон пилэн счётаз быдэсак вуымтэ.

- Инспекция милемлы тужгес секыт ужпумъёсты шӧдыны юрттӥз, - вераз ре­спубликалэн премьер-министрезлэн воштӥсез Лилия Гумерова. – Соин куинь толэзь бере прокуратураен, МВД-ен валче та выллем эскеронъёс выльысь ортчытомы.

Дасямын «Башинформысь» материалъёсъя.

6857

Оставить сообщение: