icon_gotop
18+
autorisation
Войти | Регистрация
Время в Татышле
20:48
Четверг, 28 Марта
Рекламный баннер 990x90px top

Ӝуко мильым сектаса, удмурт кырӟанэн утялтӥзы

14:44 28.11.2013

Удмурт кылъя урок

Ёросысь удмурт кылъя дышетӥсьёсын ӵошен ми куатетӥ классын ортчоно удмурт кылъя уроке пыримы. Удмурт дэремен, пужыё чильпам айшетэн дӥсяськем дышетӥсь З. С. Ибраева, пиналъёсты но дышетӥсьёсты куное ӧтьыса, пальпотыса пумитаз. Урок «Удмурт лексикаын ӝуко мильым» темалы сӥземын вал. Интегри­рованной урок мынэмъя, пиналъёс лексикаез эскеризы, литературной но диалектной кылъёсын тодматскизы. Асьсэ гуртазы кутӥськись диалектной кылъёсты вераны но ӧз вунэтэ. Кылъёслы антонимъёс, синонимъёс, омонимъёс шедьтылыса ужазы, визькылъёслэсь пуштроссэс сэрттӥзы-пертчизы. Азьвыл уроказ Земфира Садретди­новна пиналъёслы тунсыко доре уж сётэм, уроказ кеньыр вайыса лыктыны курем.

- Малы меда уроказы ке­ньыр кулэ луоз? – паймыса малпаськисько ас поннам. Тани пиналъёс кеньыръёссэс поттылӥзы, котькуд кеньырлэсь нимзэ ӟуч но удмурт кылъёсын веразы. Озьы соос ӵошен ӝук «пӧсьтӥзы», пӧртэм кеньыръёсынпӧсьтоно ӝуксылэсь адямилэн тазалыкезлы пайдаё луэмзэ пусйыны но ӧз вунэтэ. Земфира Садретдиновна сям- йылолъёсын но осконэн герӟаськем ӝук пӧсьтонэз но пыр-поч валэктӥз. Нош уроклы йылпумъян туж тунсыко пӧрмиз: пиналъёс дышетӥсенызы гожтэм кылбурез учкизы, пуштроссэ эскеризы. Кылбурлэн пуштросаз пӧртэм диалектной кылъёс ватӥськиллям вылэм. Лексикалы сӥзем урок, вӧйын, пӧртэм кеньыръёсын пӧсьтэм ӝук кадь, «ческыт» пӧрмиз.

«Жингырты, удмурт кырӟан»

Гырлы куара жингыртэм бере, школаысь фойеын удмурт кырӟанъёсты быдэстӥсь пиналъёс люкаськизы. Ёросысь удмурт школаосысь вуэм нылъёс но пиос нырысь одӥген кырӟазы, бӧрысь дуэтъёсын быгатэмзэс возьматӥзы. Зэм, конкурс мыныку, ваньмыз ик вольыт ӧз мыны, аппаратураен, крезь­гурен герӟаськем могӟетъёс трос пумиськизы. Озьы ке но конкурс выль усто нимъёсты шараяны юрттӥз. Асьсэ ко­жазы кырӟаса грамотаослы кузё луизы Алёна Садыкова (Шудек школа, нырысетӥ инты), Милена Зайнуллина (Вуж Варяш школа, кыкетӥ инты), Лилияна Богданова (Каймашабаш школа, куинетӥ инты). Дуэтын кырӟаса устоесь луизы Милена Зайнуллина но Мальвина Надыршина (Вуж Варяш школа, нырысетӥ инты), Тимур Азизов но Валентина Пороваева (Каймашабаш школа, кыкетӥ инты), Алиса Мухаматнурова но Роксана Магданова (Максим школа, куинетӥ инты). Со сяна, Кирилл Кунакбаев но Вадим Идиятуллин (Сандугач школа) «Учкисьёслы кельшем дуэт», нош Олесья Галиева (Истяк школа) «Сям-йылолъёсты утьыны быгатӥсь» номинациосын пусъемын луизы. Конкурсэ пыриськем куд-ог пиналъёс сцена вылэ нырысетӥ вамышъёссэс лэсьтыса азьланяз, оло, «кизилиос» но луозы. Оскем потэ: таӵе ужрад школаосын азьланяз но ортчытӥськоз, пиналъёслы сцена вылын пӧртэм ласянь учкымон, таланто будыны юрттоз.

Ирина САМИГУЛОВА.

Янаул ёрос.

8063

Оставить сообщение: