icon_gotop
18+
autorisation
Войти | Регистрация
Время в Татышле
11:59
Пятница, 29 Марта
Рекламный баннер 990x90px top

Уз кысэ укноосаз тылъёс

10:24 14.11.2013

Колледжлэн «будэм» сюресэз

Дышетон юртъёсын, ныл­пи садъёсын дышетӥсьёс, визьнодасьёс тырмыт лу­ымтэен, 1988-тӥ арын Не­фтекамскын педучилище усьтӥськиз. Отчы 150 студен­тъёс вамыштӥзы. Нырысетӥ вамышъёс капчиен ӧз ке но сётӥське, дышетон юрт арысь аре юнмаз, выль ӧръёс усьтӥз. 1989-тӥ арын училищее 180 пиналъёс дышетскыны вуи­зы. Кык арскын тодон-валан басьтон юртын нимысьтыз башкир группа усьтӥськиз. Та арын ик училище нылпи садын ужаны луонлык сётӥсь дипломъёсын 60 выпускникъ­ёссэ бадӟым улонэ келяз. 1993-тӥ арын бигеръёслы ни­мысьтыз ӧр усьтӥськиз.

1996-тӥ арын колледжын удмурт ӧр «вордӥськиз». Со арын республикаын научно-практической конференция радъяськиз. Отын нимысьтыз удмурт группаез усьтонлы презентация ортчытэмын вал. Удмурт кылъя, литературая урокъёсты Т. Р. Глимзянова­лы нуыны ӵектӥзы. Удмурт кылэз дышетонъя методика­ез но со азинлыко нуиз.

2001-тӥ арын, аттеста­ция ортчемез бере, училище колледж луиз. Со арын ик татын «История» выль ӧр усьтӥськиз, 2008-тӥ арын – «Иностранный язык» ӧр.

25 ар ӵоже дышетон юрт 3500-лэсь ятыр ӧнерчиосты дасяз, соос пӧлысь 411-ез дышетсконзэс горд дипломъ­ёсын йылпумъязы. Студен­тъёслы тырмыт, пӧртэм пумо тодон-валанъёс сётон ся­рысь 44 вылӥ тодон-валанэн дышетӥсьёс сюлмасько. Соос научно-исследовательской ужъёс бордын но тыршо. Ужъ­ёссэс Россиын, республикаын потӥсь газет-журналъёсысь шедьтыны луэ. Матысь дыре Дышетон удысысь отлични­клэсь Т. Р. Глимзяновалэсь «Лирикаын кулсуред кылды­тон амалъёс» ужзэ поттыны чакламын.

Студент аръёс – со ды­шетскон гинэ ӧвӧл. Кол­леджын студентъёс понна пӧртэм шутэтскон амалъёс но кылдытэмын. Дышетски­сьёс котькуд ужрадъёсы азинлыко пырисько, город, ёрос, республика конкурсъё­сын ӟеч быгатонлыкъёссэс возьмато, призо интыос уто.

Дышетон юртэн кылдэ­мез дырысен туннэ нуналозь педагогикая наукаосъя кан­дидат, РФ-ысь Дышетон уды­сысь отличник, БР-ысь сӥё-дано дышетӥсь Станислав Николаевич Плохов кивалтэ.

Ӟечкылан кылъёс

Колледжлэн юбиле­яз трос калык люкаськиз: дышетӥсьёс но студентъёс, ужысь ветеранъёс но азьвыл татын тодон-валан бась­тэмъёс. Ужрадэз Станислав Николаевич усьтӥз. Дуно куноослы со ӟечкылан кылъ­ёсын вазиськиз.

- 25 ар – ми понна со пичи лыдпус ӧвӧл. Аръёс ӵоже кол­леджамы трос воштӥськонъёс, выльдӥськонъёс, пӧртэм пумо эскеронъёс луизы. Трос то­дэмо, быгатӥсь, котьмалы усто но тыршись дышетӥсьёс луэмен, колледжмы азинлыко ужа. Тросэз сое тодон-ва­ланъя кебитэн нимало. Та веран юнме шорысь кылдым­тэ. Татысь зэмос дышетӥсьёс пото. Бӧрысь соос быръем удысазы ӟеч быгатонлыкъёс­сэс возьмато. Дышетэм ныл­пиосмылэн вормонъёссы – со милям но вормонмы, - данъ­яськыса вераз кивалтӥсь.

Празднике БР-ысь Дыше­тонъя министерстволэн науч­но-методической центреныз кивалтӥсьлэн воштӥсез М. Б. Юлмухаметов но пыриськиз. Со вакчияк тодон-валан сётон юртлэн кылдэм но ортчем сю­ресэз сярысь вераз, нырысетӥ вамыш лэсьтонэ бадӟым люкет пыртэмъёсты пусйиз.

БР-ысь удмуртъёслэн НКЦ-енызы кивалтӥсьлэн Янаул ёросъя воштӥсез Ю. С. Саитов удмуртъёслэсь ӟырдыт салам вуттӥз. Кол­леджысь удмурт группаын дышетскем, туннэ нуналэ ӟеч тодон-валанъёссэс возьматӥсьёс сярысь со трос шуныт кылъёс вераз.

Озьы ик ужрадын азьвыл татын тодон-валан бась­тэмъёслы но кыл сётӥськиз. Соослэн веранъёссы тодэ ваёнъёсын, дышетӥсьёслы пумтэм тау карон кылъёсын тырмемын вал.

Шуныт тодэ ваёнъёс

Колледжлэн юбилеезлы сӥзем ужрад монэ студент аръёсам вуттӥз. Со дырысен дас арлэсь ятыр вакыт орт­чемын ке но, ваньмыз толон гинэ вал кадь. Тодмо синъёс, тодмо нимъёс…

Дышетӥсьёслэн сётэм тодон-валанзы, соослэн визь-кенешъёссы но сюлэм шунытсы ноку уз вунэ. Соос дышетӥзы адямиен огкыл шедьтыны, секытлыкъёсты пыр потыны, вормонъёслы шумпотыны.

Улмо уг сяськая ачиз понна,

Шуръёс уг юо асьсэлэсь вузэс.

Тыро шепъёс но ми понна будо,

Юртъёс но милемлы шуныт возё.

Дышетӥсьёс! Тӥ сётӥды визьнод.

Соин йыгмыт ми мынӥськом азьлань.

Тӥ сётӥды ваньзэ, мае быгатӥды,

Соин ик тӥ шудо луиды.

Миляуша

НИГАМАТУЛЛИНА.

Нефтекамск город.

7284

Оставить сообщение: