icon_gotop
18+
autorisation
Войти | Регистрация
Время в Татышле
10:45
Четверг, 29 Июля
Рекламный баннер 990x90px top

Нырысетӥ вамыш берпуметӥез медаз луы

2013-11-07

 Нырысетӥ пумиськон

Милям – «Ошмес» газетын ужасьёслэн – кемалась малпанмы вал: пинал гожъяськисьёсын пумиськон радъяны. Татышлы ёросысь Улысь Балтач школаын БР-ысь удмуртъёслэн НКЦ-енызы ӵошен удмурт кылъя дышетӥсьёслы но юнкоръёслы семинар ортчытӥмы. Ужрадэ Бурай, Татышлы но Янаул ёросъёсысь укмыс школаос пыриськизы. Жаляса верано, Балтач, Ермекей, Калтасы, Кушнаренко ёросъёсысь пиналъёс ужрадэ вуыны ӧз быгатэ.

Семинар гожъяськись пиналъёсты газет ужен тодматонлы, гожъяськон амалъёсты сэрттон-пертчонлы сӥземын вал. Туннэ нуналэ гожъяськон удысын пумиськись шуг-секытъёсты эскерон но палэнэ ӧз кыльы. Нырысь ик юнкоръёс азьын «Ошмес» газетлэн валтӥсь редакторез Альфид Зайноков вераськиз. Пиналъёслы со журналистика удыслэсь кулэлыксэ валэктӥз, адямиослэн улоназы газет-журналъёслэн   бадӟым люкет пыртэмзы сярысь но вераз. «Журналистъёс луэмен сэрен, асьмеос выль иворъёсты тодӥськомы. Гожъяськон, телевидение, радио удысын тыршисьёс ӧй луысалзы ке, кунгож сьӧрын, странамылэн пӧртэм сэрегъёсаз улӥсьёс сярысь, дунне вылын луэм учыръёс сярысь кылытэк, тодытэк, адӟытэк кыльысалмы. Журналистъёслэн ужзы секыт но тунсыко. Та удыс ноку уз вужмы, журналистъёс котьку кулэ луозы», - пусйиз Альфид Геннадьевич.

Валтӥсь редактор юнкоръёсты, школа парта сьӧрысен гожъяськыса, газет бамъёсын печатласькыса будэм, бӧрысь Удмурт кун университетысь журналистикая факультетын дышетскыса, туннэ нуналэ быръем удысазы азинлыко тыршись адямиосын но тодматӥз. Альфид Геннадьевич пиналъёсты редакцие ӵемгес гожъяны но суредъёссэс ысъяны куриз.

Выль тодон-валанъёс

Семинарлэн кыкетӥ люкетэз юнкоръёслэсь тодон-валанзэс узырмытонлы сӥземын вал. «Ошмеслэн» кылкутӥсь секретарез Ольга Нигаматуллина газетын кутӥськись жанръёсын тодматӥз. Со тужгес бадӟым саклык висъяз информационной жанръёслы. Уго соосты пиналъёс гожъяськоназы ӵемгес куто. Заметка, хроника, паськытатэм заметка, репортаж, интервью гожтон амалъёсын тодматскон пиналъёслы тунсыко потӥз, пайдаё но луиз.

Газетлэн корреспондентэз Ирина Самигулова пиналъёслы кылбур но верос сярысь трос выльзэ вераз. Со гожъяськись адями чебертэм яке кулэтэм маке бордысь но одно ик тунсыкозэ, аспӧртэмлыксэ шедьтыны быгатыны кулэ шуыса пусйиз.

Ужрад викторинаен йылпумъяськиз. Со юнкоръёслэсь семинарын сак луэмзэс, удмурт литературая тодон-валанзэс эскерон вылысь радъяськиз. Шудон «Ошмес» газетлэсь пуштроссэ ӟеч тодӥсьёсты шараяны но юрттӥз. Газетэн герӟаськем, солэн рубрикаосызлы сӥзем юанъёслы тросэз пиналъёс валэктон сётыны шугъяськизы. Юанъёслы ӝог но шонер валэктонъёс сётъяменыз викторинаын Улысь Балтачысь юнкормы Валерия Гайниярова висъяськиз.

Гожтэтъёс ӵемгес вуозы

Ужрадын эшъяськон мылкыд «каръяськиз». Гожъяськон «тылгизьызы» луэм пиналъёслэн семинарын ик выль малпанъёссы, кылбур чуръёссы кылдӥзы. Соос газетамы выль чуръёссэс, ужъёссэс ыстыны оскытӥзы. Уго газет лыдӟисьёс понна ке но лэсьтӥське, со калыктэк, гожъясьёстэк уг кылды.

Шуныт пумиськон йылпумъяськиз. Оскиськом, выль ужмылэн ӧрез арысь аре паськыталоз. Нырысетӥез вамыш берпуметӥез уз луы. Пиналъёс пӧлын но гожъяськисьёс тросгес луозы.

Семинарез ортчытыны юрттэт возьматэмзы понна Улысь Балтач школаен кивалтӥсьлы Л. Л. Зидымаковлы но школаысь дышетӥсьёслы пумтэм тау карон кылъёсмес вераськом.

Миляуша БУЛАТОВА.

Татышлы ёрос.

1449

Оставить сообщение:

НАШИ ПАРТНЕРЫ