icon_gotop
18+
autorisation
Войти | Регистрация
Время в Татышле
13:39
Вторник, 19 Октября
Рекламный баннер 990x90px top

«Милямъёс котьку азьпалан»

2013-10-17

Спортзалын физкультурая урок мынэ вал. Школаен кивалтӥсь Владислав Фёдорович Мухаметшин пи­налъёсын ӵош баскетболэн ӟырдыт шудэ. Учкисько шоразы но сьӧразы синъёсы ик уг вутско. Пиос, нылъёс, дышетӥсьсы но тупез оп! шуытозь корзина доры вутто. Спортзалын ӵаш потэ, пиналъёслэн бамъёссы гордэктэмын, быдэс омырын туп понна нюръяськон мылкыд шӧдске. Веськрес мугоро пиос син шоры соку ик йӧто. Пӧртэм ёросъёсы вуылыса, ӵемысь пӧртэм школаосы но пырано луиськомы. Сыӵе дыръя спортэн эшъяськись пиналъёсты мукетъ­ёсыз пӧлысь соку ик висъяны луэ. Соос вылтуссыя, ветлэмзыя, мугорзыя ик аспӧртэм адӟисько. Ма кызьы, пе, уз? Шуом, одӥгез пичиысен тамак кыскыса, ваньмон дырзэ компьютер сьӧрын шузимытозяз пукыса ортчытӥсь пияш. Мукетыз - спортзалын ёзвиоссэ кыдатӥсь, пӧртэм видъёсъя ӵошатсконъёсы вуылӥсь егит адями. Уз луы шат соослэн пӧртэмлыксы?

- Вормонъёсты сярысь трос пол кылӥськомы, газетамы но гожъяськомы. Пиналъёстылы спортэн эшъ­яськон мылкыд пыӵатон секреттэс уд вералэ-а? – вазиськисько мон Владислав Фёдоровичлы.

- Ортчем спартакиадаын пиналъ­ёсмы нырысетӥ, дышетӥсьёс кыкетӥ интыослы кузё луизы. Ар ӵоже пӧртэм видъёсъя ӵошатсконъёсы пыриськыны тыршиськомы. Школаямы спортэн эшъяськись пиналъёсмы трос. Дышетӥсьёс А. С. Зайдуллин, Л. Г. Валиева, А. В. Мухаметзянова, А. Р. Васильев, Л. М. Фёдорова но пиналъёслэсь бере уг кылё. Баскетболэн, волейболэн шудыса, куасэн бызьылыса, вуын уяса азьпалан луиськомы. Кылем арын ортчем тол сабантуйын дышетӥсьёсмылэн коллективзы ёросамы нырысетӥ интые потӥз. Вань вормонъёсмы сярысь физкультурая дышетӥсьмы тӥледлы пыр-почгес вераны быгатоз.

Александр Сергеевич ачиз но пальпотыса спортзалэ вуэ ни вылэм. Вераськонмес соин азьланьтӥмы.

- Владимир Фёдоровичен арняяз кык пол спортивной кружокъёс ортчытӥськомы. Пиналъёс кружокъёсы шумпотыса лыкто. Ӵошатсконъёсы мынон азьын тужгес но ӟырдыт дыръёс луо. Соку ини, урокъёс бере ик, пиналъёс спортзалэ дырто. Куать ар ӵоже полиатлонъя ёрос ӵошатсконъёсын нырысетӥ но кыкетӥ интыосын луиськомы. Капчи атлетикаын, военно-спортивной ӵошатсконъёсын котьку призо интыосы потӥськомы. Пиналъёслэн олимпиадаын но вормонъёссы люкаськемын ни. Туннэ нуналэ Виктория Хайретдинова, Раиль но Костя Шайдуллинъёс, Максим Галимзянов, Ильвина Шайдуллина, Кристина но Карина Байдуллинаос, Антон Касфатов, Илья Мухаметшин, Алина Сайфиева, Айгуль Ахматгараева кадь пиналъёсмы школаысь усто спортсменъёсын лыдъясько, – шуэ Александр Сергеевич.

Спортзалын нылпи куара чалмыса ик уг улы. Баскетболэн шудӥсь пиналъёсты, турник доры матэ кариськыса, кӧня ке пиос вошто.

- Ма меда возьматозы соос? – ки­оссэс еосын юн керттылыса турник борды думиськись пиос шоры паймыса учкисько. Илья Мухаметшин, Антон Касфатов, Максим Галимзянов турнике ӝутӥськыса огзы бӧрсьы огзы пӧртэм фигураос лэсьто. Капчи мугоръёссы омырын бергаку, сюлэм олокӧня пол шурдытске. Кыӵе гинэ фигураос уг пӧрмыто соос, нош спортзалэ люкаськем пиналъёс сак учко.

- Молодец! Айда мукетсэ! – эшъ­ёссылэсь мылкыдзэс бурдъяса кесясько соослы пиос.

Пиос турниклэсь мозмытскыса вӧзам лыктэм бере, мон тодӥ: соос воркаутеръёслэн упражнениосынызы тунсыкъясько.

- Street Workaut – со брус, швед борддоръёс но турникъёс вылын урамын ортчись тренировкаос. Воркау­теръёс юытэк, кыскытэк улонэн эшъясько, ас азязы пуктэм ужпумъёсты котьку быдэсто. Али трос пиналъёс Street Workaut-эн тунсыкъясько, – вераз мыным Антон Касфатов.

Шудек школаын дышетскись пиналъёс но дышетӥсьёс спортэн юн эшъяськыса улыны дышемын. Нош школаысь потыку, азям лыктӥсь шумприч пияш ушъяськыса вераз.

- Милямъёс котьку азьпалан!

Ирина САМИГУЛОВА.

Янаул ёрос. 

2307

Оставить сообщение:

НАШИ ПАРТНЕРЫ