Дышетӥсьёслэн нуналазы – аспӧртэм кузьым

Дышетӥсьёслэн ужзы секыт но дано, соослэн ужан нуналъёссы шумпотонэн но пӧртэм сюлэмшугъ­яськонъёсын тырмемын. Туала улонын дунлыкъёс воштӥськемын, дышетӥсьёслэсь секыт ужзэс но азь­выл дыръёсы сямен дунъясьёс ӧжыт кылемын. Озьы ке но вань на улон шоры аспӧртэм учкисьёс. Асавка гур­тын дышетӥсьёслы радъяськем уж­радэз ортчытонлы кичӧлтӥсь луиз но коньдонэн юрттӥз Пермь шаерысь Чернушка городын улӥсь Лариса Фёдоровна Воротынцева (Туктагу­лова). Лариса Фёдоровна верамъя, та выллем ужрадэз ортчытон сярысь малпанэз солэн кемаласен кылдэм.

- Анае но атае Асавка гуртын вордӥськемын но будэмын, ужан сюрессэс та школаын ик кутскил­лям. Аслам пичи но егит дыръёсы ӵужанаен ӵужатае дорын ортчизы. Соин гуртлы, татысь калыклы но гажано дышетӥсьёслы маке ӟечсэ лэсьтэме потӥз. Малпам ужрадлэн ӟеч ортчемезлы туж шумпотӥсько. Гурт калыклы, дышетӥсьёслэн кол­лективзылы, школаен кивалтӥсьлы Дамир Гайнельянович Рахимовлы, малпанме улонэ пыӵатыны юрттэмзы понна, тау кылъёсме верасько. Туннэ праздникез мон Асавка гуртын улӥсь калыкез шуныт тодэ вайыса, гажано дышетӥсьёсты сюлмысь ӟечкыласа ортчытӥсько. Нокыӵе коньдонэн но мертаны уз луы дышетӥсьлэсь ужзэ, нылпиослы сётэм сюлэм шунытсэ. Мон малпасько, дышетӥсьлэн ужез туж дано но синмаськымон луыны кулэ. Дышетӥсь тодон-валан сётэ, пиналъёслы улонэ вамыш лэсьты­ны юрттэ. Сюлмысь ӟечкыласько тӥледыз праздникеныды, – шуиз со.

Лариса Фёдоровнаен ӵош уж­радлэн кыкетӥез спонсорез луиз Ирина Гайфуловна Хабибрахманова. Ачиз Янаул ёросысь Урал гуртын ке но улэ, Ирина Гайфуловна но вордӥськем Асавка гуртсэ уг вунэты.

- Асавка гуртэ туж мусо но дуно, шумпотӥсько гуртамы нылпи сад но школа вань шуыса. Культура юрт но калыкез люка, озьы бере, гуртлэн вуоноез вань. Азьланяз но гуртмы шулдыр но кужмо мед луоз, пась­кытэсь урамъёсыз жингрес нылпи куараосын мед тырмозы. Гажано дышетӥсьёсмылы шудбур, тазалык но ужазы азинсконъёс сӥземе потэ, - шуиз Ирина Гайфуловна.

Ужрадэз азьланьтыса, спонсоръ­ёс пенсиысь дышетӥсьёсты но али дыре пиналъёслы визьнод сётӥсь дышетӥсьёсты пусйыса, синпель кузьымъёс кузьмазы. Со сяна, Ра­химовъёслэн но Туктакиевъёслэн семьяоссы «Дышетӥсьёслэн дина­стизы» номинациын пусъемын луизы. Люкаськем калыклы задор мылкыд но жингрес гуръёссэс кузьмазы Татышлы ёросысь Выль Татышлы гуртысь культура юртысь артистъёс Александр Галиев но Зифина Фар­хутдинова. Дышетӥсьёслы шуныт мылкыданъёс вераса Рима но Фёдор Туктагуловъёс, Шарна, Светлана но Фарит Зиянгировъёс, Муллаян Хузиахметов вазиськизы. Ужрад йылпумъяськиз, нош мон культура юртысь калык полтӥ вамыштыса потӥсь пенсиысь дышетӥсь Фатима Тимирзяновна Туктакиева доры матэктӥ.

- Фатима Тимирзяновна, празд­никен тӥледыз, ортчем ужрад кельшиз-а?

Гуртысь гажано дышетӥсь пуми­там пальпотыса, сюлмысь вераз:

- Дышетӥсьёслэсь нуналзэс коть­ку шумпотыса пумитаськом, школае куное ӧтьыло. Нош таӵеез ужрад гуртамы нырысьсэ ортчиз. Сое радъ­ямзы понна туж бадӟым тау спон­соръёслы, школаысь дышетӥсьёслэн коллективзылы. Лариса Фёдо­ровна, Ирина Гайфуловна выллем ужбергатӥсьёслы азинскон, тазалык сӥземе потэ. Дышетӥсь, школаын нылпиослы визьнод сётыкуз, пиналъ­ёсты ӟеч сямо, ӟечлык лэсьтыны быгатӥсь сямъёс пыӵатон сярысь сюлмаське. Азьланяз но трос мед луозы ас шаерзы, гуртсы, вордӥськем палъёссы сярысь сюлмаськыса улыны дышем адямиос. Школаез, дышетӥсьёсты гажан мылкыд но ка­лык пӧлын арысь аре медаз кулэсмы, мед юнмалоз гинэ. Угось дышетӥсь космонавтлы но эмъясьлы, машина руль сьӧрын пукисьлы, котькуд адя­милы визьнод сётэ.

Фатима Тимирзяновнаен ве­раськем бере, удмурт кылбурчилэн Даниил Яшинлэн кылъёсыз тодам лыктӥзы: «Вамыштоно ке, мед кылёз пытьы, вазиськоно ке, мед кылёз куара».

Ирина ХУЗИАХМЕТОВА.

Балтач ёрос.