Ас азяз, дышетскисьёс азе но вылӥ куронъёс пуктэ

Нырысь Лира Радиковна покчи классъёсын ужаз, бӧрысь удмурт кылъя но литературая урокъёсты дышетыны кутскиз. Нош та дышет­скон арысен бадӟым опыто дышетӥсь Бурайысь куинетӥ номеро школаын директорлэн воштӥсезлэсь ужзэ но быдэсъялоз.

- Пиналъёсты яратытэк школае ужаны лыктонэз ик ӧвӧл. Школа – со сыӵе инты, кытын вань сюлэм шуныттэ нылпиослы сётыса ужано. Коньдон понна яке кытын ке но ужа­ны кулэ шуыса гинэ дышетон удысэ вуыны уг луы. Нылпиос ваньзэ туж ӟеч шӧдо, соосты уд пӧя, – шуэ Лира Радиковна.

Аръёс ӵоже классэн кивалтӥсьлэн, удмурт кылъя но литературая дышетӥсьлэн ужез пӧртэм данъян грамотаосын пусъе­мын луиз. Нош туэ солэсь дышетон удысын тыршемзэ «Почётный ра­ботник образования РФ» гадьпусэн пусйизы. Дышетоно пиналъёсыз сярысь ке верано, Лира Радиковна котькуд пинал сярысь кема вераны быгатэ. Одӥгез спортын ке кужмо, мукетыз сочинение гожтыса шум­поттэ. Нылпиосыз пӧлын удмурт кылэз но литератураез гажась пи­налъёсыз трос.

- Ми удмуртъёс шуыса ноку но возьдаськоно ӧм луэ, пиналъёсы­лы но вордскем кылзылы яратон мылкыд пыӵатыны тыршисько, – шуэ дышетӥсь.

Лира Радиковнаен вераськытозь классэ пиналъёс но вуизы. Соос дышетӥсьсэс котыртыса, пӧртэм ужпумъёссы пумысен вераськи­зы-кенешизы. Ужъя эшъёсыз но дышетӥсь сярысь шуныт кылъёсын гинэ вазисько.

- Котькуд ужез сюлмысь лэсьтэ, пӧртэм юанъёсъя вазиськыку Лира Радиковна юрттыны тырше. Урокъ­ёссэ дыртытэк, юнме пӧсекъятэк ортчытэ. Пиналъёс азе но ас азяз, котьку вылӥкуронъёс пуктыны быгатэ. Дышетӥсьмес пиналъёс но, анай- атайёс но туж гажало, – вера­зы соос.

Усто дышетӥсь ужаз гажамон луэм сяна, семьяяз но учкымон луэ. Кык нылъёсыз но одӥг пиез, яратоно кузпалыз понна, со - оскымон адями. Школае нуись сюрессэ Лира Ради­ковна номырин уг, пе, вошты. Нылпи­осын но школаен герӟаськем улонэз пайдаё но синмаськымон пӧрме. Озьы бере, ужаз, улоназ, азьланяз но трос выль вормонъёс луозы на.

Ирина ХУЗИАХМЕТОВА.

Бурай ёрос.