Ортчем сюресэз сярысь жаляно ӧз луы

Краснокамск педучили­щеез йылпумъяса, ужан аръ­ёссэ школаен, пиналъёсын со герӟаз. Марткия апайлэн атаез колхозэн кивалтӥз, агаез но выныз вылӥтодон-валан басьтон сярысь сюл­маськиллям. Зэм, со аръёсы нылпиослы шудо будыны ӧз кылды, фронтэ кошкем атай­зы бырыны шедиз. Нош вить пиналъёсын огназ кылем анайзы, нылпиоссэ ужаны дышетыса, калыклы ярамон карыса будэтӥз. Марткия Шакирзяновнаен верась­кыса, ачид но со ортчем аръёсы шедиськод, кожа­лод. Пӧртэм дыръёсы улэм, троссэ ас вылаз «веръям» кышномурт ортчем улон сюресэз сярысь капчи, но­мырлы ӝожтӥськытэк вера. Кык дауръёслэн ӧразы улэм кышномуртлэн лулчеберлы­кез вераськонмес пуштросо но кемалы тодэ кыльымон кариз.

- Ужан аръёсы школаен, пиналъёсын герӟаськем бере, али ке но сюлэмы школае кыске на. Азьвыл дышетӥсь тужгес гажамон адями вал. Классъёс бадӟымесь луизы, одӥг классын ньыльдонлэсь трос пиналъёс дышетскизы. Соос аслам нылпиосы кадь пото вал. Аресэ вань бере ини, тросэз дышетэм пиналъ­ёсы асьсэос песянай-песятай луылӥзы ни. Соослэсь улэм­зэс эскерыса улӥсько, шумпо­тонзылы шумпотӥсько, маке уродэз кылӥське ке, сюлэм вӧсь луэ.

Марткия Шакирзяновна­лэн дышетэм пиналъёсыз лыдъяса быдтонтэм. Улон сюрессэ тунсыко но пайдаё карыны тыршись дышетӥсь, пиналъёссэ школаын визь­нодам сяна, гуртэзлэн, ёрос­сылэн общественной улоназ но азинлыко пыриськиз. Кема аръёс ӵоже со «Етӥн» ансам­бле ветлӥз, концертъёсын пӧртэм ужрадъёсы вуылӥз. Кышномуртлэн вераськоназ гурт калыксэ гажан мыл­ мыл­кыдыз бадӟым инты басьтэ. Ӝыны даурзэ Вылысь Бара­бановка гуртын улэм адями татысь котькуд интыез ӟеч тодэ, гурт калыкез сярысь трос тунсыкозэ вераны бы­гатэ. Кузпалыныз Марткия Шакирзяновна ньыль пи­оссэ будэтэм. Али дыре со пичи пиезлэн, Станислав­лэн семьяеныз улэ. Станис­лав Гадиуллович Максим гуртысь школаен кивалтэ. Дышетӥсьлэсь ужзэ быръем пиеныз анаймурт туж данъ­яське. Песяйзэс вить внукъ­ёсыз шумпотто. Со ужтэк пукыны дышемын ӧвӧл, ялан нылпиосызлы юрттӥськыны тырше. Москваын улӥсь Аль­берт пиез доры но со ӵем вуылэ. Ас дораз но нылпи­оссэ, внукъёссэ шумпотыса пумита.

- Улонмы шулдыр, ож­маськон гинэ медаз поты, калык луэмзэ утьыса, вуоно­ез сярысь сюлмаськыса, ӟеч ужаса улыны мед быгатоз, – вераськонмес йылпумъяса шуиз Марткия Шакирзяновна.

Ирина САМИГУЛОВА.

Янаул ёрос.