Чебересь эктонъёссы - аспӧртэм костюмъёссы

Матысьгес тодматскон понна, мон ансамбле ветлӥсь пиналъёс доры вамыштӥсько. Котькуд эктонэз дасян понна нырысь ик крезьгурзэ, эк­тонлэсь пуштроссэ малпано. Шуом, эктон, крезьгур дась, нош сое учкисьёс доры вут­тон вылысь артистъёслэн костюмъёссы сярысь но сюл­маськоно.

Со пумысен директор­лэн внеклассной ужъёсъя воштӥсеныз Л. Х. Магда­новаен но ансамбльлэн кивалтӥсеныз Ильсияр Идри­совнаен кенешиськомы.

- Костюмъёсты асьме кужымен ик дасяськомы. Ны­рысь асьмеос эскизъёс мал­паськомы, вурыны кулэ луись материал бырйиськомы, ась­меос ик вуриськомы. Котьку но эктонэз дасяны кутскем­лэсь азьвыл малпаськись­комы: кыӵе костюм дасяны луоно та эктонэз быдэстон        понна? Со ласянь милемлы трудъя дышетӥсь А. Р. Ахмат­галиева трос юрттэ. Палэнэ уг кылё ансамбле ветлӥсь пиналъёсмылэн анай - атай­ёссы но. Костюмъёс вурыны коньдонзэс котьку висъяло, вань чебер малпанъёсмес сцена вылэ вуттыны юртто. Пиналъёсмылэн анай-атай­ёссылы но Людмила Шарипо­валы бадӟым тау кылъёсме вераме потэ, - вера Ленария Хабибзяновна.

Ансамбле ветлӥсь пи­налъёс сярысь верано ке, Н. Меншатова, А. Ахматгалиева, Г. Мугалимова, Л. Кашапова, И. Гарипова, Р. Магданова, А. Мухаматнурова кадь эктыны яратӥсь нылъёслэсь нимъ­ёссэс пусйытэк уг луы. Нош пиос пӧлын Л. Мухаматнуров, И. Даутов, Р. Фархутдинов, И. Кашапов, И. Хайретдинов че­бер эктэменызы висъясько. Ансамбльлэн вормонъёсыз но трос ини, соос пӧртэм ёрос, республика конкурсъёсы пы­риськыса, дипломъёсын но грамотаосын берытско. Нош «Северное сияние» ёрос кон­курсэ пыриськыса, пиналъёс Гран-Прилы кузё луизы но коньдон премиен пусъемын луизы. Соос коньдонзэс уд­мурт эктонлы выль костюмъ­ёс вурыны кутозы. Озьыен, азьланяз но «Зарни толэзь» яркыт пиштоз, сцена вылын выль эктонъёсын шумпоттоз.

Ирина САМИГУЛОВА.

Янаул ёрос.