icon_gotop
18+
autorisation
Войти | Регистрация
Время в Татышле
15:38
Sunday, 17 Октября
Рекламный баннер 990x90px top

«Мушъёсты азьпалтыса ужано»

2017-08-10

Муш утён – со кужымез жалятэк ужамез кулэ карись удыс. «Трос чечы басьтон но табыш поттон понна, мушъёсты азьпалтыса, соослэсь ӝоггес ужано», - шуэ Татышлы ёросысь Улысь Балтач гуртысь муш утись Заниф Шарафутдинов. Та яратоно ужаз со пенсие потэм бераз йырыныз-пыдыныз чумем, шуыны луоз. Азьло Шарафутдиновъёс Пермь шаерысь Чусовой ёросын улӥллям, Заниф Фассахутдинович Никифоровской совхозын 18 ар зоотехникын ужам. Пермьысь сельхозинститутэз йылпумъям ӧнерчилэн котьку малпанэз вылэм – муш вордыны. 1993-тӥ арын Заниф агай семьяеныз вордӥськем палъёсаз улыны берытскем, юрт пуктэм. «Улысь Балтаче бертыку, куинь йыр мушмы вань вал ини. Со ужез азинтоно кариським. Али витьтон йырлы матэ муш утиськом. Та ужез яратон мыным Мухаметдин песятаелэсь выжем, лэся. Со кема аръёс ӵоже колхоз пасекаын ужам», - вера мушкась.

Ньыль ар талэсь азьвыл Заниф агайлэн но Людмила апайлэн Алексей пизы Утар-Елга гурт вӧзы арендае музъем басьтэм. Отчы Шарафутдиновъёс пасека кылдытӥзы. Нюлэс кушын мушъёслы улыны но, ужаны но каньылгес, лэся.

- Муш утён сярысь трос книгаос гожъямын. Интернетысь со сярысь троссэ тодыны луэ. Тӥ соосын пайдаяськиськоды-а? – юаськом Заниф агайлэсь.

- Котькуд мушкась ужан амалэз сярысь гожтыку, аслаз улон интыез сярысь гожтэ. Нош климат котькытын огвыллем ӧвӧл ук. Соин ик книгаосты но лыдӟоно, аслэсьтыд ужан амалъёстэ но вунэтоно ӧвӧл. Книгая гинэ ужад ке, чечытэк кылёд, - шуэ З. Шарафутдинов.

- Ужады шуг-секытъёс но пумисько, дыр.

- Кызьы, пе, сотэк. Кылсярысь, туэ куазь зоро луиз. Беризь сяськаез но зор ву гылтӥз. Вераны кулэ, пасекамы вӧзын арлыдо беризьёс ӧвӧл. Кызьы пусъё, сю аресъем беризь гинэ трос чечы сётэ. Со но вить арлы огпол гинэ. Озьы ик кипрей будослэсь мушъёс трос чечы басьто. Со но ми палан ӧжыт пумиське. Бусыосын химпрополка ортчытон вакытэ мушъёс трос быро. Уката ик тӧло дыръя ужазы ке. Азьло аръёсын ӵошатоно ке, туэ чечы ӧжыт.

- Нош тужгес трос чечы басьтэмды сярысь верано ке.

- Со вал куать ар талэсь азьло. Ньыльдон муш семьялэсь кык тонна чечы кыскытӥм.

Пасекаязы сяна, Шарафутдиновъёслэн доразы но мушъёссы вань. Соосты утялтон сярысь Людмила апай сюлмаське. Ваньмон дырзы луыку, муш утисьёслы Дима пизы, Ирина нылзы семьяеныз юрттӥське. Ӵошен быдэстэм ужлэн емышез но шумпотымон узыр луэ угось.

                                                                                                             Миляуша НИГАМАТУЛЛИНА.

Татышлы ёрос. 

2273

Оставить сообщение:

НАШИ ПАРТНЕРЫ