Туэ «Усточикар» дас витетӥ ползэ ӧсъёссэ усьтӥз. БР-ысь удмуртъёслэн НКЦ-енызы кивалтӥсьлэн Салимьян Гарифуллинлэн верамезъя, удмурт пиналъёс понна профильной лагерь усьтон сярысь малпанэз кылдэм Ренат Галямшинлэн, нош проект дасян сярысь сюлмаськиллям Марс Самигулов но Аркадий Миниахметов. Нырысетӥ сменаен кивалтӥсе Людвиг Зидымаковез бырйиллям.
Дас вить ар. Ӧжыт-а со, трос-а? Та юанлы «Усточикарен» кивалтӥсь, историяя но культурая центрысь валтӥсь ӧнерчи Ирина Самигулова тазьы вера: «Огласянь учконо ке, 15 ар трос ӧвӧл. Нош лагерь понна – пичи лыдпус ӧвӧл. Со дыр ӵоже кӧня творческой пиналъёс лагерь пыр потэмын ни! Нош кӧня ӧнерчиос но вожатойёс татын ужаса нылпиослы визьнод сётӥзы. Мынам но улонэ та лагерен юн герӟаськемын. Туж шуныт малпанъёсын сюлэмам возисько котькуд аре татын ужасьёслэсь командазэс. Лагерь мед улоз шуыса тыршись, юрттэт возьматӥсь котькуд адямилы бадӟым тау кылъёсме верасько. Али «Усточикарлэн» егит дырыз, шуыны луоз. Со сю, кык сю аресозь но улоз».
Туэ «Усточикарын» Башкортостанысь но Удмурт Республикаысь 86 усточи удмурт пиналъёс шутэтскизы. Соос «Алангасаръёс», «Батыръёс», «Кылдысин», «Дырберган», «Вожоос» отрядъёс кылдытӥзы. Вожатойёслэн - Марина Сергеева (валтӥсь вожатой), Эдуард Шайдуллин, Надежда Антонова, Светлана Галиахметова, Ильнар Латипов, Оксана Крылова – отрядзы «Палэсмуртъёс» нимаськиз. Нылпиос понна «Дӥськут дизайн», «Кызьпу туй», «Театр», «Эстрада», «Фольклор» но «Журналистика» матерскойёс ужазы. Нокинлэн мӧзмыны дырыз ӧй вал. Котькуд ӝыт нылпиос пӧртэм-пӧртэм ужрадъёсы пыриськылӥзы. Вязовкаын но Выль Татышлыын усточикаръёс шулдыр концерт возьматӥзы.
Миляуша БУЛАТОВА.
Оставить сообщение: