icon_gotop
18+
autorisation
Войти | Регистрация
Время в Татышле
05:48
Четверг, 5 Августа
Рекламный баннер 990x90px top

«Улонэн кулон куспын ветлӥм»

2017-07-20

Войнаын луэмез сярысь Пермь шаерысь Куеда ёросысь Удмурт Шагирт гуртысь Касим Садиахматов тазьы маде: «1942-тӥ ар, 10-тӥ май. Та нуналэз мон ноку уг вунэты – милемыз, Удмурт Шагиртысь пиосты, войнае басьтӥзы. Куинь кузя вал ми. Куедаысен эшъёсыным люкиськи, монэ Свердловске нуизы. Мон нимысьтыз связья батальонэ шеди. Одӥг толэзьскын милемыз нош поездэ пуктӥзы. Кытчы мынэмез ум тодӥське, уг верало. Товарной поездын выдыса изён инты но ӧвӧл. Озьы вуимы ми Горький городэ. Связья батальонэ шедем бере, милемыз одӥг интыысь мукет интые лэзьыло вал. Кӧня городъёс, кӧня станциос пыр ортчи меда? Котырак сьӧд ӵын, элеваторъёс ӝуало. Ми нюлэскын улӥськом. Йыр вылын самолётъёс лобало, адӟыны-тодманы уг луы, оло тушмонъёс, оло асьмелэнъёс. Пуштӥсь арбериос «кисьтӥсько» музъем вылэ. Кӧня эшъёсмес соку ыштӥм…

Выльысь поездэ пуксён дыр вуиз. Дзержинск городэ, пе, мынӥськом. Эшелонэз бомбить карыны кутскизы. Ми поездысь тэтчамы. Кык сю иськемез пыдын ортчим. Уйин гинэ сюресмес азьланьтӥськом, ватскыса. Вамыштыны кужым ӧвӧл ни. Кӧт тырымон сиён луысал ке, оло ӝоггес но мынысалэд. Ӝыны вандэт нянь но тари ӝук сёто. Катьтэм кылизы солдатъёс. Озьы ке но заданиез быдэстоно, кыӵе югдуре шедеммы сярысь командованилы ивортоно. Одӥг нуналэ мон линиын дежурить карисько вал. Взводлэн командирез Быков асьмелэн ик пуктэм минае шедиз. Ой, кышкыт суред.

Пӧртэм интыосы вуылӥм. Кӧня паськытэсь шуръёсты выжоно луим, кылсярысь, Днепр, Ока. Улонэн кулон куспын ветлӥм. Ачим но ранение басьтӥ, паллян пал мугорме яраос зӥбизы. Но госпитале ӧз кельтэ, биньылӥзы но берен эшъёсы доры лэзизы, шаерез тушмонлэсь утёно вал.

Малярияен висьыны уси. Санбатэ понӥзы. Кык нуналскын наступление кутскиз… Озьы мон аслам частелэсь кыли. Веськам бере железнодорожной часте шеди. Война аръёсы чугун сюрес вылын ортчизы, шуыны луоз. Кытчы гинэ ӧй вуылы. Румыниын, Бухарестын, но луи. Жугиськон – туж кышкыт маке. Малы ке шуоно солдатъёсты ваньмыныз обеспечить карыны кулэ. Асьмелэн техника начар вал. Пушкаосты валъёсын кыскаса нуллӥзы. Солдатъёслы туж но туж секыт йӧтӥз. Озьы ке но тушмонэз пазьгыны быгатӥм. Ож лудын адӟемез, нылпиосы, уйбыт-лумбыт мади ке но, вераса уг быдты. Одӥгзэ вераме потэ – ноку медаз лу война!»

Касим песятай вордӥськем палъёсаз вить ар ортчыса, 1947-тӥ арын 4-тӥ куартолэзе, берытскем. Гуртаз со гажамон адями луэм. Семья кылдытэм. Кема аръёс ӵоже лесникын тыршем, гурт удысын но ужам, трос муш вордэм. Туэ гудырикошкон толэзе Касим Садиахматовлы 94 арес тырмоз. Арлыдыз бадӟым луэмен, солэн пельёсыз туж ляб кыло. Со Бадӟым Гондырысь Роза нылыз дорын улэ. Нош котькуд тулыс, 9-тӥ куартолэзе, гуртаз, гумыр карем юртаз бертэ. Гужемзэ со отын ортчытэ. Сюлмыз вордӥськем палъёсаз куриське, пе.

Гажано ветеранлэн мӧля вылаз трос медальёсыз чиляло. Нош со понна тужгес дуноосыз – «За отвагу» но «За оборону Сталинграда» медальёс.

        Миляуша БУЛАТОВА.

Пермь шаерысь Куеда ёрос.

1355

Оставить сообщение:

НАШИ ПАРТНЕРЫ