icon_gotop
18+
autorisation
Войти | Регистрация
Время в Татышле
00:32
Суббота, 24 Июля
Рекламный баннер 990x90px top

Арганчи шулдыр гурзэ кисьтэ

2017-07-13

Эдуард ассэ Бадӟым Гондырын дораз выллем шӧдэ ни. Татын со ноку арганэныз уг люкиськы. Ужез культура юртэн, отысь ансамблен гинэ герӟаськемын ӧвӧл угось. Ӵукна, кылсярысь, Эдуард Зарифьяновичез нылпи садэ ветлӥсьёс шумпотыса витё. Нош берло со школае кожылэ. Арганчи отын пиналъёсты кырӟаны, крезьгурлы дышетэ.

- Мон киям арган кутӥ нырысетӥ классын дышетскыкум. Асме ачим дышетӥ соин шудыны, - серекъяса вера Эдуард. – Со дырысен улонэ крезьгурен но удмурт культураен герӟаськемын.

Укмысэтӥ классэ йылпумъямез бере, Эдуард Уфаысь искусствоосъя училищеын кужымзэ эскерыны малпам. Экзаменын со кырӟаны но, арганэн шудыны но быгатэмзэ возьматэм. Соку дышетӥсьёс паймонэ усиллям: егит пилэн быгатонлыкез вань, нош нотаосты валаны сое нокин дышетымтэ. Эдуардлы крезьгуръя школаын тодон-валанзэ будэтыны ӵектӥллям. Но гуртысь пияш чылкак пумит луэм. Кызьы, пе, пичиосын одӥг парта сьӧрын пукод? Соку дышетӥсьёс солэсь буйгатскисьтэм мылкыдзэ шӧдӥллям но училищее кутыны малпаллям. Быгатӥз ке - дышетскоз, пе, ӧз ке – кошкоз. Эдуард нотаосты ӝог дышем. Соин дышетсконэз но берло капчиен сётӥськем. Зэм, училище пыр потэмез бере, егит ӧнерчилы уж пумысен кӧня ке сюлмаськоно луэм. Республикаямы арганчиос ӧжыт ӧвӧл угось. Соку со чик ӧз малпаськы, вылды, улонэз бускель шаерысь удмуртъёслэн культураенызы герӟаськоз шуыса.

Бадӟым Гондырысь «Тюрагай» ансамблен ӵош со шаермылэн пӧртэм сэрегъёсаз вуылӥз ни. Кылем арын, кылсярысь, соос Москваын ортчем «Гербер» шулдыръяськонэ пыриськизы. Соку Эдуардлы Владимир Жириновскийен пумиськылыны кылдӥз. Нош сӥзьыл со Анастасия но Захар Заволокинъёсын тодматскиз. Соос Осаын «Играй, гармонь!» телепередачаез дасязы. Бадӟым Гондырысь «Тюрагай» ансамблез но отчы вазизы.

- Быръем удысэ мыным туж кельше. Ужен но удалтӥз, - малпанъёсыныз люкиське егит арганчи. - Туэ Пермьысь культурая институтэ дышетскыны пырыны малпасько.

Эдуард Бадӟым Гондырын аслыз юрттӥсьёс, кивоштӥсьёс дасян сярысь но сюлмаське ни. Кыкетӥ классэз йылпумъям Эмиль Зарипзянов, кылсярысь, выль арганчизылэн шудэмезлы синмаськыса, та крезьгуро инструмент борды кыстӥськыны кутскем.  Туннэ соос крезьгуро дуннее нырысетӥ вамышсэс лэсьто. Эдуард Зарифьянович ӟеч тодэ: быгатонлык Инмарен сётэмын ке но, сое пичиысен волятыны, будэтыны тыршоно.  Со понна вӧзад юрттӥсед, дышетӥсед мед луоз. Нош Эдуард Ахметзяновез арган «бирдыосын» шудыны крезьгуро дуннеез гажамез дышетӥз. 

   Ольга ГИЛЬМУРАНОВА.

1354

Оставить сообщение:

НАШИ ПАРТНЕРЫ