icon_gotop
18+
autorisation
Войти | Регистрация
Время в Татышле
06:54
Четверг, 5 Августа
Рекламный баннер 990x90px top

Киссаос но вӧсяськизы

2017-07-06

Но киссаослэн но шудзы вань вылэм на: кылем арын гурт дорозь асфальт сюрес кыскизы. Толалтэ лымыен шобырскем, тулыс но сӥзьыл дэриен пачылмем сюресъёсты коласа дышем муртъёс али но пумозяз уг оско, дыр, соослэн но пичи гинэ гуртазы цивилизация вуиз шуыса. Гуртын улӥсьёс оско на, кематэк урамъёсазы кӧльы кисьтозы но улон юртъёсазы эстӥськон газ пыртозы шуыса.Таӵе шумпоттӥсь ужъёслы луыса, киссаос нош ик одӥг бадӟым ыштонзэс шӧдытэк кылизы кадь: туэ 31-тӥ куартолэзе гуртысь начальной школаез но ворсазы. Озьыен, Киссалась калыкез дышетон но югдытон юрт пыраклы пытсаськиз.

Бирск уездысь Кисияр гуртын министерской инородческой училище усьтэмын вылэм 1898 арын 11-тӥ куарусёнэ. 119 ар ӵоже школа пыр туж трос калык дышетскыса потӥз, куд-огез соос пӧлысь тодмо адямиос луизы. Кылсярысь, пусъеме потэ Гаршин Борис Осиповичез (гурт калык сое Гарейшин Казинур нимын тодэ). 1919-1920-тӥ аръёсы со Уфа губерниысь удмуртъёслэн азьветлӥсьсы вылэм: Губисполкомлэн калыкъёсын ужанъя отделэзлэн вотской (удмурт) подотделэзлэн секретарез но бӧрысь заведущиез луэм.

Котыр удмурт гуртъёслэн улос-вылоссы шоры учкыса, киссаос но бере кыльыны уг тыршо.Татын улӥсьёс но, беромыса ке но, асьсэ восьёссэс выльдоно кариськизы. 2014-тӥ арын инвожо толэзе куазь туж пӧсь но кӧс кыллемен, вуэ куяськыса Инмарлы зор курыса вазиськизы. Арня ортчыса бадӟым вӧсьсэс но выльдыса ортчытӥзы. Арлы быдэ радъяськись ужрадэ гуртоос шумпотыса люкасько. Вӧсь нергеосты улӟытонын бадӟым люкетэз гуртысь гажано адямилэн Рамай Сабирович Нигаматшинлэн – солэн тыршеменыз гурт калык нош ик огинэ люкаськыса куриськыны кутскиз. Жаляса верано, али со асьме пӧламы ӧвӧл ни, но мытэм ужез – улэп. Туэ но киссаос дэмен Инмарлы вазиськизы: 26-тӥ инвожое Керемет возьын вить ыжпи вӧсязы. Соосты вӧсь понна дунтэк сётӥзы Расима но Евгений Нигаматъяновъёс, Меннера Садикова, Дина Саяпова, Альмир Шамиданов, Назия но Финат Шартдиновъёс. Дунне вылын татулык, удмурт калыклы азинлык, гуртоослы тазалык но шудбур курыса вӧсяськиз Риваль Фархутдинов. Солы юрттӥськизы Тимерхан Раянов но Маулетзян Тазетдинов. Озьыен, оскон кылдэ, азьпалан киссаос но удмуртлыклэн урдэсланяз уз кыле ни, азьветлӥсьёс радын луозы.

Ранус Садиков.  

1181

Оставить сообщение:

НАШИ ПАРТНЕРЫ