Шулдыръяськонлэн шорсюлмыз – бусы ужасьёсты данъян

Праздниклэн кутсконэз яркыт но вунонтэм пӧрмиз. Можгаос шулдыръяськонлэн инъетэзлы бурдо валъёс сярысь легендаез кутӥллям. Кузёос соосты вайёслэсь лэсьтыса сцена вӧзы интыяллям. Со сяна, палэнынгес улэп валъёсын ворттылӥсьёс но ӧжыт ӧй вал. Можга ёросын вал вордон удысэз азинтон понна бадӟым ужъёс, пе, нуисько. Татын тужгес данъясько вятской, кабардинской, орловской, ӟуч тяжеловозной выжыысь валъёсын. Соос гурт улонэз азинтонын бадӟым инты басьто.

- Гурт удысын басьтэм лыдпусъёсты учконо ке, туэ соос котькулэсь вылӥын. Асьмеос гыроно-кизёно бусыосмылэсь быдӟалазэс будэтӥм, пудоосмы тросгес луизы - со асьмелэсь тыршеммес возьматэ», - вераз люкаськем калыклы вазиськыса УР-ысь Правительствоен кивалтӥсьлэсь ужъёссэ быдэсъясь Виктор Савельев. Куноосты ӟечкыласа вераськизы на Кун Кенешен кивалтӥсь Владимир Соловьёв, йӧскалык политикая министрлэсь ужъёссэ быдэсъясь Лариса Буранова но мукетъёс. Та нуналэ пӧртэм улосвылъёсысь но Удмурт Элькунлэн ёросъёсысьтыз вуэм делегациос сярысь но ӧз вунэтэ. Сцена вылэ соосын кивалтӥсьёсты ӧтизы. Башкортостанысь, кылсярысь, отчы тубиз удмурт огазеяськонэн кивалтӥсьлэн воштӥсез Ю. С. Саитов. Нош Пермь шаерысь  - Куеда ёросысь Бадӟым Гондыр культура юртысь художественной руководитель Физа Гарифуллина.

«Герберын» пӧртэм азбаръёс, площадкаос ужазы. Паськыт возь выллэн одӥгаз сэрегаз кивалтӥсьёслэсь гырыны быгатэмзэс учкизы. Вераны кулэ, тазэ эскеронэз но соос усто ортчизы. Нош палэнынгес батыръёс нюръяськизы. Соос пӧлын луиз Бадӟым Гондыр гурт поселениысь культурно-спортивной центрен кивалтӥсь Алексей Аднашев. Пиослы нырысетӥ конкурсын валлы пӧрмоно луиз. Соос уробое «кыткиськыса», кӧня ке мешок тёс пызь (опилки) кыскизы. Алексей Юрьевич татын  зол кужымзэ возьматӥз. Нош собере пиослы пельпумъёсазы карнан ныпъяно луиз. Конкурсэз радъясьёс соослы ведраос интые пуклёос сётӥзы. Таиз ӵошатскон но батыръёслы вормонтэм ӧз луы. Азьланяз соосты кык пӧртэм конкурсъёс витизы на. Пиослы чорыгано но луиз.

Та нуналэ люкаськем калык шумпотыса учкиз «Усточикар», «Шудон азбар», «Кунокуа», «Андан валъёс» но мукет площадкаосты. «Герберын» кырӟась-эктӥсьёс понна кык сценаос дасямын вал. «Вить Сергейёслэн азбарзы» площадкаын жингрес гуръёссэс кисьтӥзы Янаул ёросысь «Чибориё» ансамбльысь нылъёс. Нош ӝытазе возь вылын егитъёслэн «Шундэктон» площадказы ужзэ мытӥз. Татын пеймыт усьытозь кырӟан гуръёс чузъяськизы.

Ольга НИГАМАТУЛЛИНА.