- Камсьӧрысь удмуртъёслэн осконзы сярысь материал люкан борды тӥ 2013-тӥ арын кутскиды. Соку республикаямы Тарту университетысь научной сотрудникен, этнологен Лийво Нигласэн вуылӥды. Тӥ пӧртэм гуртъёсысь вӧсьёсын тодматскыны вутскиды. Маин висъяське таиз экспедициды?
- Франциын наукалы юрттэт возьматӥсь учреждение вань. Со - «Университетский институт Франции». Институт арлы быдэ егитъёс но бадӟымъёс пӧлысь ёзчиос кутэ. Соос пӧлы шедён понна, исследовательской проект дасяно. Грант басьтӥд ке, солы вить ар ӵоже коньдон висъяське. Мыным со, кылсярысь, 15 сюрс евролы матэ сётӥськоз. Проектэз быдэстон понна, монэ ужъёсылэн кӧня ке люкетэзлэсь мозмытозы. Озьы мон вить ар ӵоже арняяз кык лекци гинэ лыдӟо на. Мукет дырме проект бордын ужанлы висъяло. Нош Франциысь университетский институтлы мон интые ужась кутыны коньдон висъяськоз. Озьыен, Башкортостанысь удмуртъёс доры ми Франциын грант басьтэм бере, «Современная религиозная практика закамских удмуртов» проектэз быдэстон вылысь вуимы. Нош азьвыл ми татын Эстониысь проектъя экспедициосын луимы. Со 2018-тӥ арозь азинтӥськоз на. Озьыен, ужму кык проектъёс бордын ӵошен мыноз.
- Проектты бордын ужаны тӥледлы кинъёс юрттозы?
- Грантэз ми кужмо международной командалы луыса басьтӥмы. Проектэз быдэстон бордын Франциысь, Эстониысь, Венгриысь но Россиысь тодосчиос тыршозы. Франциысь команда кык адямилэсь сылэ. Соос пӧлысь одӥгез – мон, кыкетӥез – Мари Казен. Мари Пермь шаерысь Киргаын ортчем Элен вӧсе вуылэмын. Эстон командаын антрополог, оскон бордын тыршись Лаур Валликиви. Со азьвыл татчы ветлэмын ни. Али но шумпотыса вуиз. Вань на венгер профессормы Золтан Надь. Со Печ университетын ужа. Проект бордын тыршо камсьӧр тодосчиос-этнографъёс Ранус Садиков но Татьяна Миннияхметова. Лингвистмы – Татышлы ёросысь Уразгильдыысь Анна Байдуллина. Со сяна, милемын ӵош ужало Удмурт Элькунысь фольклористъёс Николай Анисимов но Ирина Пчеловодова. Озьыен, ми пӧлын вань антропологъёс, этнографъёс, фольклористъёс, социолог, лингвист.
- Азьвыл тӥ трос ужады вӧсьёсты эскерон бордын. Выль проект экспедициосады кыӵе ке воштӥськонъёс пыртоз-а?
- Азьвыл ми вӧсьёсты гинэ уськытъямы. Туннэ нуналэ быдэсак дась киноос ӧвӧл на. Но Бальзюгаысь гурт вӧсь, Выль Татышлыысь тол вӧсь но мӧр вӧсь тупатыса быро ни. Сое ми пӧсьтолэзь кутсконын Ижевскысь этнографической музейын возьматыны малпаськом. Соку Россиысь антропологъёслэн но этнографъёслэн конгрессы ортчоз.
Табере ми вӧсьёсты сяна, мукет йылолъёсты но уськытъяломы. Та ласянь ӧжыт секытгес йӧтоз – материал туж трос. Но милемлы юрттоз удмурт режиссёр Денис Корнилов. Со кылем арын милемын Тартуын луиз. Денис - Татарстанысь Кукмор ёросысь удмурт. Соин солы видеоез тупатыны капчигес луоз. Солэн проектэ пыриськыны мылкыдыз вань.
- Проектлэн йылпумъянъёсыз сярысь мар верасалды?
- Малпанъёсмы туж трос. Кылсярысь, милям куриськон интыос сярысь сайт кылдытэммы потэ. Но сое быдэстон понна, трос малпаськоно луоз. Нош та выллем книга поттыны луымон, дыр. Туж умой луысал камсьӧр удмуртъёслэсь кырӟанъёссэс одӥг книгае пыртыса. Эстонъёс выллем антология но дасям потэ. Отчы пырысалзы аудио но видео материалъёс. Шумпотысалмы, йылол праздникъёсты возьматӥсь вуж туспуктэмъёсын сайт кылдытыны быгатысалмы ке. Туннэ соос семейной фотоальбомъёсын утисько. Но, жаляса верано, пересьёс быро, нош егитъёс туспуктэмъёсысь адямиосты уг тодо ни. Кылем арын Николай Анисимов «Светӥос дорын куноын» передачаын учкисьёслы туспуктэмъёссэс курыса вазиськиз.
Вить ар ӵоже 13 пӧртэм темаосъя эскеронъёс нуомы. Соос пӧлысь кыкез осконэн герӟаськемын. Али ми Быдӟымнал но мукет со выллем йылолъёсты эскерон бордын тыршомы. Со сяна, сопал дуннеен герӟаськем учыръёсын тунсыкъяськимы. Туж потэ на вал выль кенак лушкан йылолэз учкеммы, пелляськисьёсын пумиськеммы. Пелляськисьёсын герӟаськем книга но, оло, поттыны быгатысалмы. Верало на таӵе малпанэ сярысь но: туннэ камсьӧрысь пӧртэм гуртъёсысь удмуртъёслэн куриськонзылэн радлыкез, кылъёсыз ог-огзылэсь маин ке но висъясько. Соин азьланяз камсьӧр удмуртъёслэн куриськонъёссы сярысь бичет кылдытыны тыршоно. Со ваньмыз одӥг книгае пыртэмын мед луоз. Огъя вераса, котькуд темая нимысьтыз книга поттыны тыршомы. Соос одно ик ӟуч но англи кылъёсын луозы. Со сяна, луыны быгатозы на удмурт но француз кылъёсын.
- Азьланяз быдэстоно ужъёсты, малпанъёсты трос. Оскиськом, камсьӧр удмуртъёс тӥледлы со ласянь бадӟым юрттӥсьёс луозы.
Ольга НИГАМАТУЛЛИНА.
Оставить сообщение: