Усьты аслэсьтыд шаердэ

Инзер шур. Сое кылдыто кык пичиесь шуръёс: Бадӟым Инзер но Пичи Инзер. Соос кутско Инзер гурт выжыысен. Шурлэн кузьдалаез – 307 иськем. Шурысь вулэн чылкытлыкез, котырысьтыз инкуазьлэн чеберлыкез трос шутэтскисьёсты бордазы кыско. Ӝужытэсь гурезьёс, отысь виясь чылкыт ошмесъёс… Ӵыдонтэм шулдыр интыос!

Та шурлэн вань на нимысьтыз аспӧртэмлыкез - Льӧль гурезь. Озьы ик сое Кызыл-Таш, Шура-Таш нимало на. Гурезьлэн тусыз льӧльпыръем. Солэсь ик кылдэмын солэн нимыз. Изъёс бордысь изомем вуын будӥсь турынъёслэсь отпечатокъёссэс но адӟыны луэ. Льӧль гурезь инкуазьлэн памятникеныз лыдъяське.

Айской фонтан. Артезианской вулэсь фонтан Ай шур дурын кылдэмын. Солэн ӝуждалаез 5 метрозь вуэ. Толалтэ но со быдэсак уг кынмы.

Атыш – Башкортостанысь одӥгез тужгес чеберез водопад. Со «ыбылӥсь» шуыса берыктӥське. Учконо ке, ву зэмзэ ик гурезь пушкысь ыбиськыса потэ. Со 570 миллион ар азьвыл кылдэмын.

Арской из – Белорецк ёросысь гурезь, инкуазьлэн историко-геологической памятникез. Солэн ӝуждалаез 30 метр. Отысь шаерамы шер пумиськись будосъёсты но шедьтыны луэ. Гурезьлэн нимыз солы матын луись гуртлэсь кылдэмын. Арский из сярысь трос легендаос вань. Соос пӧлысь одӥгез вера, та гурезьысь пещерае Емельян Пугачёв лушкам ваньбурзэ, пе, ватэм. 1930-тӥ аръёсы зарни утчасьёс пещерае пырон интыез пуштытӥллям. Ма муген? Тодмо ӧвӧл. Та дыре адямиослы отчы пырыны луонлыкъёс ӧвӧл ни.

Ишимбай ёросэ шутэтскыны мыныны малпасьёс Кук-Караук водопадэз бырйыны быгато. Каскадо амалэн бызись вулэн ӝуждалаез 12 метрлы ӵоша. Пуж-пуж бызись вулэсь куаразэ олокытысен кылыны луэ. Солэсь кыдёкын ик ӧвӧл интыяськемын мукетыз исторической памятник – излэсь лэсьтэм выж. Шаерчиослэн малпамзыя, со Екатерина II кивалтон вакытэ ӝутэмын.

Та ёросын ик Тугар-Салган ты вань. Со Торатау шиханлэн пыдазяз интыяськемын. Тылэн пасьталаез 260 метр, кузьдалаез 395 метр, мурдалаез интыен-интыен 27 метрлы вуэ. Солэн вань шормуӵез. Азьло со полуостров вылэм, отын эндемичной будосъёс но пумиськылӥллям. Но 90-тӥ аръёсы, антропогенной факторъёс улсын, соос быдэсак ышемын. Тыысь чорыгъёс но со дыре быриллям вылэм. Али Тугар-Салган тазатэмын ни, отчы чорыгъёсты но лэзизы. Со вӧзын шутэтскон инты но кылдытэмын.

Зилим шур - паймымон чебересь гурезьёсын котыртэм инты. Вуэз чылкытлыкеныз висъяське. Калыкез бордаз кыско водопадъёс но пещераос. Шур дурысь пӧртэм будосъёсты адӟыны луэ.

Мукетыз шулдыр инты – Гафури ёросысь Мамбет гурезь. СоЗилим шурлэсь 15 иськемлы палэнынгес.

                  Дасяз Миляуша

                          БУЛАТОВА.