icon_gotop
18+
autorisation
Войти | Регистрация
Время в Татышле
14:13
Sunday, 17 Октября
Рекламный баннер 990x90px top

Совето Союзысь Геройлэн гуртаз улӥсько

2017-05-04

Башкортостанлэн одӥг сэрегаз мынам вордскем Асавка гуртэ интыяськемын. Татын ик вордӥськиз, улӥз но ужаз Совето Союзлэн Героез Ульмас Шакирович Шакиров. 1922-тӥ арысь 10-тӥ толсуре крестьян семьяын со укмысэтӥез нылпи луыса югыт дуннеез адӟиз. Пичи дыръязы нылпиоссы кулылэмысь, таизлы Ульмас ним понӥзы. Башкир кылысь со «ноку уз кулы» шуыса берыктӥське. Ульмас Шакирович Асавкаын будӥз, школаез йылпумъяз. Пичи дырысеныз ужез яратӥз, гурт калыксэ, ӵыжы-выжыоссэ гажаз. Соин ик, дыр, гуртысь пилэн вань улонэз колхозэн герӟаськемын. 

Ульмас Шакирович

Шакировлэн ож сюресэз

1941-тӥ арысь толсуре Ульмас Шакировичлы 18 арес тырмиз. Нош пӧсьтолэзе сое Родинамес утьыны Горд Армие баьтӥзы. Тушмонэн со нырысьсэ Москва дорын пумиське. Лек ожын сӧсырмыса, удмурт солдат ньыль толэзь ӵоже госпитальын йӧнатске. Бӧрысь Белый, Калинин, Великие Луки, Смоленск, Витебск городъёсты мозмытонын ожмаське. Витебск вӧзысь Шумилино станциез басьтыкузы, У. Шакиров взводлэсь бырем кивалтӥсьсэ воштэ, тушмонлэсь куинь атаказэ пазьге.

Одӥгаз ожын тушмонъёс асьме солдатъёс вылэ тямыс пол урдскылӥзы. У. Шакировлэн ротаез, тушмонлэсь обороназэ тӥяса, азьпала потӥз. Бусо ӵукна выль секытлыкъёс ваиз: рота интыяськем позициосын снарядъёс, огез бере огез минаос пуштылӥзы, вистэм-вожтэм пуляос шиетылӥзы. Тушмонъёс вань кужымзэс татчы понӥзы кадь: йырдэ ӝутыса утчаськон сярысь ик эн малпаськы. Бус пуксем бере боецъёслэн йыразы кышкыт малпан кылдӥз: «Котыртэмын». Взводлы выль позицие – ог куинь сю метр азьпала, куакъёс пӧлы - выжыны приказ сётэмын вал. Та сюресэз ортчон понна, солдатъёслы вань кужымзэс огазеяно луиз. Таӵе дыръёсы минутъёс гинэ ӧвӧл, секундъёс но адямилэсь улонзэ утё. Вуизы куакъёс доры. Соос сьӧры ватскыса, асьсэлы ватскон инты гудыны кутскизы. Гу гудытозь, куакъёс интые кӧня ке чигылӥськем бадь вайёс гинэ кылизы на – ӵапак отчы снаряд усиз. Одӥгез эшсы быриз, витез секыт сӧсырмиз. Ульмаслы но осколок йӧтӥз. Кыкез секыт сӧсырмемъёс кематэк кулӥзы. Старшой сержант Ульмас Шакиров бырем но сӧсырмем эшъёссэ чаклаз, кылем боеприпасъёссэ огинэ люказ. Тани тушмон танкъёс адскизы. Ульмас огезлэн матэктӥсь «тигрлэн» бензин баказ мертаськиз. Кӧня ке пол ыбем бераз, тушмон танк кенжиз. Кыкетӥзэ но озьы ик быдтӥз. Куинетӥез танк траншеялэсь кӧня ке метр палэнын вал. Ульмас ӝогак пыӵал-тӥрлыкъёссэ котыраз октӥз но окопе выдӥз. «Тигр» со вылтӥ гуретыса потӥз. Улосчимы тазэ но танкез гомӟытӥз. Нош тушмон таин гинэ ӧз буйга, соос бур палтӥ лыктыны ӧдъязы. Ульмас нош ик гранатазэ зӥртӥз. Туж кужмо пуштӥз. Одӥгаз кияз - автоматсэ, мукетаз берпуметӥ гранатазэ кутыса, старшой сержант тушмонъёс пумитэ султӥз.

- Кидэс вылэ ӝутэ! Ваньдэс сётскыны курисько! – кеськиз Ульмас.

Чиед но ӝужыт мугоро фашист киоссэ ӝутӥз.

- Гитлер сдаваться каре… Эн ыбе… - чиед мугоро фашист куаляса вазиз.

Тушмонъёс огез бӧрсьы огзы пыӵалъёссэс сэрпаллязы. Сӧсырмем старшой сержант 14 солдатэз но кык офицерез батальонэ мырдэм вуттӥз.

1944-тӥ арысь 23-тӥ инвожое Сиротинск палан старшой сержантлэн подвигез сярысь радио пыр ивортӥзы: «Шакиров Ульмас Шакирович одӥгаз ожын куинь танкез, кык самоходной орудиез пуштытӥз, дас куать тушмонъёсты пленэ кутӥз. Соос пӧлысь кыкез офицер но дас ньылез солдат».

Шумилино станциез мозмытыкузы но Двина шурез выжыкузы кышкатэк но сэзь ожмаськемез понна, 1944-тӥ арысь  22-тӥ пӧсьтолэзе Ульмас Шакировлы Совето Союзлэн Героез ним сётэмын. Удмурт батырлэн ож сюресэз таин гинэ ӧз йылпумъяськы. Солы Польшаез, Белоруссиез, Литваез, Латвиез ортчоно луиз на. 

Совето Союзысь Геройлэн ож бере улон сюресэз            

Вордскем гуртаз Ульмас Шакирович 1945-тӥ арысь коньывуон толэзе вуэм. Секыт аръёсты, тылӝуо нуналъёсты со трос пол син азяз пуктылӥз. Вордӥськем гуртаз бертыса, У. Шакиров ож дыръя куашкам хозяйствоез выльдыны басьтӥське, школаын пиналъёсты дышетэ, укмыс ар ӵоже «Молотов» колхозэн кивалтэ. Со кивалтыку колхоз котьку азьветлӥсьёслэн радазы луэм.

Ульмас Шакиров школаын физкультура но труд урокъёсты дышетэ. Озьы ик удмурт кылэз дышетон но узырмытон вылын ужаз. Та удысын сюлмысь ужамез понна солы «Калыкез дышетонысь отличник» гадьпус сётэмын.

Ульмас Шакирович Шарзия кузпалыныз ӵош вить нылпи будэтӥзы. Соос пӧлысь котькудӥз, атайзылэсь адӟем карыса, улон сюресэтӥ йыгмыт вамышъяло. Кык пиосыз – Владислав но Павлюс – милициысь подполковникъёс луизы. Ралия нылзы семьяеныз Аскиноын улэ. Нош Григорий но Владимир пиоссы улонэн люкиськизы ни.

1998-тӥ арысь гудырикошкон толэзе гуртамы бадӟым ыштон вуиз. Секыт висемез бере ми пӧлысь дано гуртомы кошкиз. Батырез берло сюресаз быдэс гурт келяз. Ми, Асавка школаын дышетскись пиналъёс, данъяськиськомы гуртамы сыӵе Герой улӥз шуыса. Со сярысь шуныт тодэ ваёнъёс, солэн подвигез котьку улозы милям сюлэмъёсамы. Ми но со кадь сэзь, визьмо луыны тыршомы, уго табере школамы Совето Союзысь Геройлэсь нимзэ нуллэ. Ульмас Шакирович улэм урамлы но солэн нимыз сётэмын. Мон шумпотӥсько, Геройлэн урамаз улӥсько шуыса. Нош удмурт батырмылэн гурт шорамы юнматэм бюстэз пеймыт уйёсы сак уте кадь милесьтым ческыт уммес.   

 Луиза МИНИАХМЕТОВА.

Балтач ёросысь Асавка гурт.

Редакцилэсь: Луиза Миниахметова та исследовательской уженыз Анай кыллы, гожъяськонлы но культуралы сӥзем республика форуме пыриськиз. Дышетскисез отчы дасяз удмурт кылъя но литературая дышетӥсез В. Н. Ишназарова.   

 

2113

Оставить сообщение:

НАШИ ПАРТНЕРЫ