Гуртооссэ выль иворъёсын шумпоттэ

- Гуртамы газет-журнал басьтӥсьёс трос ӧвӧл ни. Ужаны кутскыку, дас ар талэсь азьло, соос трос вал. Сюлэсь трос открыткаос вузаллямы, нош али басьтӥсь но ӧвӧл ни, - вера Эвелина Фёдоровна.

Байшадыос пӧлын озьы ке но мыло-кыдо лыдӟиськисьёс вань на. Эвелина Хайдарова Ида Фаюршинаез, Муслима Садриеваез, Людмила Тимербаеваез, Зухра Багаутдиноваез пусйиз. Пенсиысь дышетӥсь Муслима Тимерахметовна, кылсярысь, «Ошмес, «Алга», «Приусадебное хозяйство», «Пальчики оближешь», «Сваты. Заготовки» изданиосты, пе, басьтэ.

- Нош «Ошмес» газетэз гуртады тросэз-а лыдӟо? – тунсыкъяськисько почтальонкалэсь.

- Мукет изданиосын ӵошатыса, «Ошмесэз» тросэз басьто. Таяз паларын сое дас одӥг коркан лыдӟо. Кылем арын со кӧнялы ке тросгес вал. Кызь экземплярозь но вуылэмез луиз.

Эвелина Фёдоровна ачиз но газет-журналъёсын, книгаосын эшъяське. «Весь лыдӟиськыны яратӥсько, -  вера почта нуллӥсь. - Калыклы сётъяны ваем газет-журналъёсты ваньзэ лыдӟыса потӥсько».  

Марина НИКОЛАЕВА.

Бурай ёрос.