«Та нунал мон понна вунонтэм кылёз»

Ульфат Бадретдинов – 11 книгаослэн «атайзы». Со Бурай ёросысь Алтау гуртын вордӥськыса будэмын. Солэн сюресэз литератураен 1969-тӥ арын «Дась лу!» газет пыр герӟаськем. Ӵапак соку 12 аресъем пияшлэн нырысетӥ выжыкылэз газетын печатласькем. Со дырысен Ульфат Шайхутдинович газет-журналъёсын юн кусып возе.

Нырысь ик зал тыр люкаськем калык гожъясьлэн улонэзлы, солэн вордӥськыса будэм гуртэзлы, матысьёсызлы сӥзем киноез учкиз (авторез С. Карпов). Собере ваньзы Ульфат Бадретдиновлэн книгаосаз «выйизы». Татышлы ёросысь удмурт нылъёс но пиос, Янаул ёросысь Максим школаысь пиналъёс гожъясьлэн котькуд книгаезъя презентациос возьматӥзы. 

Сцена вылын гожъясьлэн кылбуръёсыз гинэ ӧвӧл, кырӟанъёсыз но чузъяськизы, сценкаосыз но возьматэмын вал. Удмурт кылъя дышетӥсьёс нылпиосты ужрадэ дасян сярысь пыр-поч сюлмаськиллям.

Творческой ӝытлэн сценарияз пиналъёсты ӧтён - со ужрадэз дасясьлэн авторлэн произведениосыз шоры лэчыт синмын учкемез, дыр. Ульфат Шайхутдиновичлэсь гожъямъёссэ огъя эскероно ке, со пичиослэсь дуннезэс туж быгатыса возьматэ угось: нылпилэсь паймемзэ но, кышкамзэ но, шумпотэмзэ но усто усьтыны быгатэ. Веросъёсаз пумиськись тросэз учыръёс авторлэн улонысьтыз басьтэмын. Солэсь книга бамъёссэ усьяса, Алтау гуртэ но, солэн ульчаосаз но, авторлэн пичи дыраз но вуиськод…

Та ӝытэ дано гожъясез ӟечкыланы гуртоосыз но вуизы. Ӵош шудыса будэм эшез Виктор Марданов Ульфат Шайхутдиновичлы школа аръёссэ тодаз вайытӥз. Нош «Инвожо» калык ансамбль шулдыресь кырӟанъёссэ кузьмаз.

Гуртысьтыз тямыс классъем школаез йылпумъяса, У. Ш. Бадретдинов Можга педучилищеын дышетскем. Та ӝытэ солы студент аръёсаз но берытскыны кылдӥз. Солэсь адӟем карыса Можга педучилищеын тодон-валан басьтэм сузэръёсыз Фируза Фаизова но Рамзия Янсубаева сое отчы «вуттӥзы». Со сяна, гожъясез ӟечкыланы вуизы БР-ысь удмуртъёслэн НКЦ-енызы кивалтӥсь Салимьян Гарифуллин, НКЦ-лэн Кенешезлэн секретарез Татьяна Шайбакова, «Ошмес» газетлэн редакцияз ужасьёс, библиотекарьёс, удмурт кылъя дышетӥсьёс, Татышлы ёросысь гожъяськыны яратӥсьёс Лилия Гараева, Ирина Кабипянова, Елена Нуриахметова но Лена Исламова, Калтасы ёросысь Бадӟым Качакысь но Янаул ёросысь Максим школаосысь дышетӥсьёс, Выль Татышлыысь, Улысь Балтачысь но Калмиярысь кырӟаны-эктыны усточиос, культура юртъёсын ужасьёс.

Трос шуныт кылъёс чузъяськизы та ӝытэ. Ужрадэз нуись Ирина Самигулова йылпумъян лэсьтыса шуиз:

- Бадӟым тау, Ульфат Шайхутдинович, тунсыко геройёсты, пуштросо книгаосты понна. Тӥ - визьмо, шуныт сётӥсь, мылкыдэз бурдъясь, пальпотон кузьмась, дыраз визьноданы но ушъяны быгатӥсь адями. Пумиськонъёсмы азьланяз но трос мед луозы на. Сюресты дор палъёсады, Башкортостанэ, камсьӧр удмуртъёс доры, котьку мед вуттоз.

Ульфат Шайхутдинович ужрад сярысь малпанзэ «Одноклассники» соцсетьын шараяз. Со гожтэ:

- Кылъёс вератэк но валамон: та нунал мон понна вунонтэм кылёз. Башкортостанын кадь монэ нокытын уз данъялэ. Кызьы шуо, татын вордски, татын ик кулэ луи. Татысь ик мынам геройёсы но. Ӟуч гожъясь, публицист Валентин Распутин гожтэ: «Человека писателем делает его детство». Та кылъёс мыным тупало.

Веранзэ Ульфат Шайхутдинович притчаен йылпумъяз, кытын яркыт возьматӥз котьку адямилыко луонэз.

       Миляуша БУЛАТОВА.